2 San Juan 1

1 Ya̱, tub yu bel nu zu riiñ ni Crisht, zeeda̱ gyicy ii lo ru tub biñ mñaa nu pcui Ãgyoozh nu gac nim gal nu lo de iêñ ru. Ya̱ rishli rca̱ de ru, nunu walab ya̱ ziêl, sinu niê ziêl dela mbecy nu rad lagy de coz rishli, rca dey de ru. 2 Ya̱ rca̱ de ru nu nac nu rad lagya̱ de coz rishli ni Crisht nañ lardo̱o̱ tiem na gal nu par tub la. 3 Orzeê Ãgyoozh Uz den nunu Jesucrisht Iêñ mi gyicy dem faboor nu nap gyicy num der, nunu gashni lagy mi de ru, nunu gyicy mi nu cheti ri añ ni der. Ni gyicy num den nu nac nu rad lagy na de coz rishli ni Crisht, nunu nu nac nu rca den losaên. 4 Ya̱ tonaê la bet lagya̱ ornu bdzeela̱ la be de iêñ ru. Nunu bzaaca̱ nu rded dey gal mod nu rlagy ñi gal nu mnii Ãgyoozh uz den nu gyicy na. 5 Orzeê na ya̱ rnishba̱a̱ lor zan na, nu rlagy ñi nu ca tub ca tub ziêl den losaên. De riidz nu ca̱a̱ lo gyicy ii, nii walab tub mod cub nu ne̱e̱ nu gyicy ru, sinu laab nii mod nu bi güeñ der nese nu loga la. 6 Benu ca den Ãgyoozh, orzeê ricy na de coz nu rniim. Orzeê de riidz nu güeñ der nu mniim nese nu loga la, ndeê nu ca tub ca tub ziêl den losaên. 7 Tees gyishlombecy ii tonaê la zigy de mbecy rguu chesa dey. Wagnii dey nu Jesucrisht biid mi gyishlombecy ii nu rishli byac mi mbecy. De mbecy nu ni ricy zeê, yu zeê nac yu mbecy rguu, nunu zay contr ni Crisht. 8 Bzu der cuidad nis nit lo de ir nu gyad nu nac de riiñ nu bicy ru, sinu gyad zaê la i der. 9 Cyu ziêl mbecy nu rlagy ded lo par lo de coz nu blyuu Crisht, yu zeê a̱ê yuê loy Ãgyoozh. Tees mbecy nu tub lo ziêl coz blyuu Crisht caa ic yu, de yu zeê nac nuy Ãgyoozh Uz den gal nu Iêñ mi Jesuuz. 10 Benu tub mbecy cyid yu lat der, zeê walab nu rlyuuy coz nu blyuu Crisht, orzeê cueê niir nu chuêy nañ yuê. Ni cueê nii nur yu ñgyoozh. 11 Gun cyu ziêl mbecy nu nii nuy mbecy zeê ñgyoozh, orzeê gal gaa la nay nu mbecy nu shiñ ricy zeê. 12 Yuê zañ coz nu rlagya̱ ne̱e̱ lo der, tees walagya̱ ne̱e̱ lo der lo gyicy. Ya̱ drish lo̱ nu gad mod nu yap güi̱i̱ der. Orzeê ne̱e̱ du̱ de ru lo nu loo la, gun orzeê nu blaazhaê zir gyet lagy den. 13 Niê ziêl de iêñ bily ru, de yu nu pcui Ãgyoozh nu gac nim, de yu zeê zeed dey ñgyoozh ni der.