Romanos 2

1 Enzeêe la yala nú tsequichiaêlu bee bene, tunu rriêilu scua sequichiaêlu leêcatsia liêilu, xne rriêilu tucu nú rriêibeei. 2 Pero liaêahua nediyaêahua nú tucutsia Diose rlualu tucu nú necane chenu rdeteênu castiya lubee bene enu rriêi beenú necha neca, nú unila luhua. 3 Nu liêilu enu sequichiaê nú xneca rriêi bee bene nu leêca esquie rriêilu, la riêilu elliebacuê nútia tsilaêalu lu castiyaê Diose. 4 Liêilu rluachulu nú ñia rriêi Diose lulu, rluachulu lunú ruaêa arquiê Diose liêilu, nu rluêcu arquiênu liêilu nu la riêilu beyaê nú lunú rluêcu arquiênu liêilu scua. necane nú rluêculu tiempo nú cheêe arquiêlu lu stulalu. 5 Pero liêilu chiquiê nzitilu nu la niarquiêlu cheêe arquiêlu lu stulalu, nu leêcatsia liêilu rriêilu nú recahuaxilá stulalu para bichia chenu deteê Diose castiya bee bene nu hualu Diose lu cuendaê bee bene liêinu enu rlualu tucu nú necane. 6 Bichia zeêe deteê Diose lunú riala cada tucua bene lunú xneca uriêilla. 7 Nu bee bene enu la tsanaê arquiê nú rriêi nzeêca nu rlaêna eluxene nú nuê liñibe, nu rlaêna nú huañi nzeêca lu Diose para nú luêcu bee nzeêe cuerpo nú la nitiluaê nu deteê Diose elunehuañi nú leca xunga laxu lubee nzeêe. 8 Pero bee bene enu la zucuê Stichiaê Diose chiquiê rlenu lubee nzeêe nu deteênu castiya beei, xne luhuare nú chenalabeei stichiaênu nú neli neca, nzenalabeei inziu nú necha neca. 9 Chiquiê nehuana zeca beei nu cuu arquiêbeei lunú rriêi beei nú necha neca, sia bee bene Israel nusia bee bene enu la neca bee bene Israel. 10 Pero yebee bene enu rriêi nú neca nzeêca ñia nzu arquiê Diose lubeei, nu rriêinu nú la chenu arquiêbeei nu chuêubeei liñibe, sia nú necabeei bee bene Israel nu sia nú lacabeei bee bene Israel. 11 Xne teriallu rriêi Diose tucu nú necane luye bee bene. 12 Yebee bene enu la chulu leyê Diose nú udeteênu lu Moisés nu rriêi dula, la chiulue lu cuendaêlla tucu nú rni ley cuaê, pero ye bee bene enu nuêlu ley cuaê, tucu nú rni ley cuaê esquie chiuêulue lu cuendaêlla. 13 Xne la neca lunú rieneêtsia bee bene ley cuaê nú la luêculla dula lu Diose sino que bee bene enu sucuê nú rni ley cuaê bee nzeêe neca enu la luêcu dula lu Diose. 14 Pero bee bene enu la neca bee bene Israel nu rriêi nú neca nzeêca sin nú chulubeei ley cuaê, nu rriêibeei tucu nú rni ley cuaê sin nú chulubeei, sino que elliebacuê eêcubeei xiuêu nú neca leyê beei, 15 xne lunú xneca nehuañihua rlubeê nú elliebacuêhua xiuêu ta nú neca nzeêca nu ta nú la neca nzeêca rriêihua, luhuare nú rluêcuhua ley cuaê, nu leêca mismo liêibeei riêibeei beyaê chenu rriêi nzeêcabeei urre chenu la riêi nzeêcabeei. 16 Scua aca bichia chenu hualu Diose lu cuendaê ye beenú aêchiê rriêi bee bene equie cuendaê Jesucristo tucu nú rni stichiaênu nú rixiuleêa. 17 Nee liêihua enu neca bee bene Israel, nelliñiahua nú necahua bee beneê Diose nu cuna nú recahua ley nú udeteê Diose lu Moisés. 18 Nu rnihua nú nediyaêhua xa niarquiê Diose nú huañihua nu equie cuendaê leyênu rriêihua beyaê ta nú neca nzeêca riêihua. 19 Nu secahua nú acahua nihua lubee bene enu laca ley cuaê, cuna lubee bene enu lachulu Stichiaê Diose. 20 Secahua nú liêihua acahua zeteêhua bee bene enu lecalí xi reca cuna bee bene enu lleênatsia reca, xne equie cuendaê ley cuaê recahua nu nuêluhua ye nú neli neca. 21 Pero scua tucu nú nehuañihua, ¿xiquienú mejora la zeteêxuhua liêihua nú xneca huañihua luhuare nú rnihua lubeelá bee bene nú xneca huañi beei? Xne liêihua rnihua nú la neca nzeêca nú riêi bene eluhuanaê, ¿nu xiquie nú rriêihua eluhuanaê? 22 Rnihua nú la neca nzeêca nú luêcu niyu stucu unaêa nu la luêcu unaêa stucu niyu, ¿nu xiquie nú rriêihua scua? Leêca rana arquiêhua bee diose enu urecheê bee bene nu, ¿xiquie nú rcachiêhua liñi indu elu nchiucuê bee diose cuaê? 23 Chiquiê nelliñiahua nú recahua ley pero saêna netúhua Diose equie nú la zucuêhua nú rni ley. 24 Enzeêeca rni lu ichiê Stichiaê Diose: “Bee bene enu laca bee bene Israel seêta beei Diose equie cuendaê nú rriêihua." 25 Neli nú sibiê nú rquie seña elunecachiê bee niyu, tunu zucuê bee bene ley nú udeteê Diose lu Moisés, pero tunu la zucuê bee bene tucu nú rni ley cuaê lecaxi zibiê nú nequie seña elu necachiê bee bene che. 26 Pero tunu tucu bene enu la nequie señacuaê elu necachiê, nu sucuêlla tucu nú rnibiyaê ley, necalla xi neca tucu bene enu nequie seña, mase nú la nequie señalla. 27 Nu bee bene enu la chulu leyê Diose nu sucuê stichiaênu nu nehuañi xi nehuañi enu nuêlu ley, che mase nú la nequie señalla tucu nú rnibiyaê ley, pero lunú nuêlulla Stichiaê Diose, che lunú xneca nehuañilla riêihua beyaê nú la nehuañihua tucu nú riala nú huañihua, equie nú la riêihua tucu nú rnibiyaê leyê Diose mase nú nuêluhua ley cuaê nu nequie señahua. 28 Xne la neca lunú rala bene lu iliu Israel nú necalla bene Israel, nu la neca lunú nequie señalla nú necalla bene Israel ante Diose. 29 Sino que enu neli neca bene Israel neca bee enu diquinuê arquiê sucuê stichiaênu nu la neca nú nequietsia señalla, nu niê nú sucuêlla beelá bee custumbre nú rluêcu bee benecuaê, sino que necane nú nzu Espíritu Santo cuna bee bene, nu bee bene enu nehuañi scua Diose neca enu sucuê aya liêilla, nu la neca bene enu sucuê aya liêilla.