Romanos 15

1 Liaêahua enu nzutaê arquiaêahua lunú nzeli arquiaêahua Jesucristo rquiêña nú riaêahua elietsa lubee bene enu lascaê tsutaê arquiê lunú nzeli arquiê Jesucristo luhuare nú riaêahua lunú niarquiêtsiaêahua. 2 Sino que yeêahua rquiêña nú laênaêahua nú ñia tsu arquiê bee saêahua. Nu rquiêña nú riaêahua lunú seca beella nú neca nzeêca, para nú riaêahua elietsa lubeella nú nzeriêilábeella beyaê xneca riala chenala beella inziuê Diose. 3 Xne niê Jesucristo né riêi tucu nú niarquiêtsianu sino que unga tucu nú nequie lu ichiê Stichiaê Diose elu rni: “Liêá uyucuêa ye bee bedichiaê chiêquiê nú riala ni bee bene lulu." 4 Ye nú nequie lu ichiê Stichiaê Diose hasta huaêtu nequiene para nú riaêahua beyaê xneca huañiaêahua, nu equie cuendaê Stichiaê Diose nzeêta nú rluêcuaêahua paciencia, nu la llacaêahua telluaquieêahua lunú nelluaquieêahua nú atiaêahua. 5 Diose enu rriêi nú rluêcuaêahua paciencia, nu rriêi elietsa luaêahua para nú la llacaêahua, liêinu riêinu elietsa luhua para nú huañihua nu aca tucunecatsehua cuna beelá bee saêahua tucu nú uriêi Jesucristo. 6 Para nú yehua tucutse nihua bedichiaê nzeêca lu Diose, paê Jesucristo. 7 Enzeêe scua tucu nú uyucu Jesucristo liêihua nú necahua bee beneênu, leêca scua uriêihua lu ye bee saêhua enu nzeli arquiê Jesucristo, equie nú rluêcuhua ulaêna lu Diose. 8 Nia luhua nú ubeêta Jesucristo lu iliulabe para nú uzeteênu Stichiaê Diose lubee bene Israel nu scua ubeêtanu uzibiênu lubeella che scua uyalu tucu nú ucuaqui uêna Diose lubee beneêahua enu udetela nu scua unga achee nú Diose sí saêalunu stichiaênu. 9 Nu leêca ubeêta Jesucristo lu iliulabe para nú equie cuendaênu nuêbee bene enu laca bee bene Israel nibeella bedichiaê nzeêca lu Diose xne ruaêa arquiênu liêibeella, tucu nú nequie lu ichiê Stichiaê Diose elu rni: Hasta lubee bene enu laca bee bene Israel nia nú ñia nzeêcalu, nu leêca ulaa bee canto nu ñia ni lu cuendaêlu. 10 Leêca rni stucu luhuare Stichiaê Diose: Liêihua enu laca bee bene Israel, ñia utsu arquiêhua tucu nú ñia nzu arquiê bee bene Israel. 11 Nu stucu luhuare Stichiaê Diose rni: Ye bee bene enu laca bee bene Israel uniêhua bee bedichiaê nzeêca lu Diose Pa liñibe. Cuna yebeelá bee bene iliulabe, uniêhua bee bedichiaê nzeêca lunu. 12 Leêca uni profeta Isaías: Lu familiaê Isaí chiuêu tucu bene enu nibiyaê lubee bene iliulabe, nu hasta bee bene enu laca bee bene Israel chili arquiê liêinu. 13 Diose enu rriêi elietsa luaêahua nú nzeli arquiaêahua, riêinu nú ñia nzu arquiêhua nu riêinu nú nzuxe arquiêhua lubee saêhua xne nzeli arquiêhua liêinu, nu equie cuendaê Espíritu Santo chiquiê nucuaêaquiehua lunú liquiênu luaêahua. 14 Bee saêa enu nzeli arquiaêahua Jesucristo liêá nediyaa nzeêcaa nú rriêi nzeêcahua lubee saêhua, nu chiquiê recahua hasta rnihua bezeteê lubee saêhua nu seteêhua bee saêhua. 15 Añinzuca nú scua nuêbee luhuare lu carta quieê uquieêa bee bedichiaê nú juerte rcu arquiêhua unia luhua nú xneca huañihua nu liêá rnia scua luhua equie cuendaê poderê Diose nú uliquiênu lua. 16 Para nú zibiêa lu Jesucristo nu ixiuleêa bedichiaê nzeêcaê Diose lubee bene enu laca bee bene Israel para nú huañibeella tucu nú niarquiê Diose nú huañi beella, nu la luêcu beella dula ante Diose equie cuendaê Espíritu Santo. 17 Nu xiquie nú rni nzeêcaa lu cuendaa como beneê Jesucristo nú necaa equie nú sibiêa lu Diose, 18 pero lecaxi aca nia nu rriêá tunu leca nú rriêi Jesucristo elietsa lua, xne liêinu rriêinu elietsa lua para nú riêá elietsa lubee bene enu laca bee bene Israel para nú chili arquiêbeella Diose nu zucuê beella stichiaênu, nú nzelila arquiêbeella, equie nú unila lubeella nu lunú rlañiê beella xneca nehuañia. 19 Nu leêca xne ulañiêlaêhua ye bee milagro cuna ye beenú uyanu arquiêhua unga equie cuendaê Espíritu Santo. Che scua udixiuleêa bee bedichiaê nzeêcaê Jesucristo yebee luhuare, desde Jerusalén nu hasta lu iliu nú lee Ilírico. 20 Xne scua neca elliebacuê nú rriêá, nú ixiuleêa bedichiaê nzeêcaê Jesucristo. Pero la ixiuleêene elu uquixie rixiuleêela benene sino que rixiuleêene elu lascaêlí yeneê bene equie cuendaê stichiaê Jesucristo. 21 Tucu nú nequie lu ichiê Stichiaê Diose elu rni: Bee bene enu lascaê yeneê equie cuendaênu chulu beella liêinu, nu bee bene enu lascaê riêi beyaê equie cuendaênu riêi beella beyaê. 22 Lunu uyaêa ye bee luhuare elu unila luhua nú nzaêa enzeêe lá lluchaêa ayelabiêya liêihua añinzuca nú huaxi bese uniarquia ayelabiêya liêihua. 23 Pero nee lunú ulaêxulá rixiuleêa Stichiaê Diose ye bee luhuare caêa nu como hasta huaêtu niarquia nzelabiêya liêihua, 24 enzeêe nee rriêá elliebacuê nú nzelabiêya liêihua chenu nzaêa España. Nu chenu nzelabiêya liêihua, nu chenu udetela bee bichia nú ñia nzu arquia nú ubelabiêya liêihua, che riêihua elietsaa nú nzaêa España. 25 Pero nee rluti nzaêxua Jerusalén nzeyua elietsa lubee saêahua enu nzeli arquiê Jesucristo nucuaêa zeêe. 26 Xne bee bene lu iliu Macedonia cuna bee bene lu iliu Acaya enu nzeli arquiê Jesucristo uriêi beella elliebacuê nú quieteê saêbeella melu nú deteê beella lubee bene enu seca elitsi nucuaêa Jerusalén, enu leêca nzeli arquiê Jesucristo. 27 Nu elliebacuê eêcubeella uchiuêu nú xeêla beella elietsa cuaê, añinzuca nú scua riala riêibeella lubee bene Israel xne neca xi neca nú neziêqui beella lubee bene Israel xne equie cuendaê bee bene Israel uriña Stichiaê Diose lubeella, nu nee liêibeella enu laca bee bene Israel, neca nzeêcae nú riêi beella elietsa lubee bene Israel cuna lunú rluêcu beella. 28 Enzeêe chenu laêxua lunú rriêá nu detecuendaa elietsa cuaê lubeella, che nzaêa España nu chenu deteêa lachihua che nzelabiêya liêihua. 29 Liêá nediya nzeêca nu chenu nzelabiêya liêihua nuê huaxi nú nia luhua equie cuendaê Jesucristo. 30 Nee equie nú yeêlaêahua seêcalaêahua Jesucristo, nu equie nú seca Espíritu Santo liaêahua nacua luhua nú riêihua elietsa lua nacuaêahua lu Diose equie cuendaa. 31 Naêcuhua lu Diose nú riêinu elietsa lua chenu nzua leta bee bene Judea enu lá chili arquiê Jesucristo, nu leêca naêcuhua lunu nú bee saêahua enu nzeli arquiê Jesucristo bee enu nucuaêa Jerusalén, yucu beella elietsa nú nzaêa nzetsaêna para liêibeella. 32 Enzeêe tunu zela Diose nú acane scua che ñia nzu arquia nzelabiêya liêihua, che nuê beyaê tselachia diquila nú nzua cuna liêihua. 33 Nu Paêahua Diose enu rliquiê nú nzuxe arquiaêahua nzu cuna liêihua. Amén.