Hebreos 11

1 Nu nee lunú nzeli arquiê bene Diose, necane nú nediyaê nzeêcaêahua nú neli aca tucu nú nelluaêaquieêahua nú aca, nu neli nzeli arquiaêahua lunú aca, mase nú la lañiaêahuane. 2 Bee beneêahua enu udetela uyaêna nzeêca beella lu Diose equie nú uchili arquiêbeella liêinu. 3 Equie nú nzeli arquiaêahua Diose rriaêahua beyaê nú cuna stichianu urecheênu iliulabe cuna liñibe cuna ye nú nuê lue, nu lecaxi uquiêñianu nú urecheênue. 4 Nu Abel lunú diquinuê arquiêlla uchili arquiêlla Diose enzeêe máse neca nzeêca uêna nú udeteêlla lu Diose, luquela nú udeteê Caín, enzeêe uyaêna nzeêcalla lu Diose xne uyucunu uêna nú udeteêlla nu máse nú ungutila Abel pero rieneêscaêahua nú xa uchili arquiêlla Diose. 5 Equie nú uchili arquiê Enoc Diose enzeêe nzia nehuañilla liñibe nu lá atilla, nu lá llelaê bee bene liêilla xne unguyaêla Diose liêilla liñibe. Nu lu ichiê Stichiaê Diose rni: “Nú ante nú uyaê Diose Enoc uyuê arquiênu xneca uhuañilla." 6 Lecati huañi tucu nú riuê arquiê Diose tunu la chili arquiêlla liêinu. Titse bene enu niarquiê chebica lu Diose, rquiêña nú chili arquiêlla nú nuê Diose nu leêca rquiêña nú chili arquiêlla nú deteê Diose nú uninu nú deteênu lubee bene enu rlaêna liêinu. 7 Equie nú uchili arquiê Noe Diose enzeêe chenu uni Diose lulla nú aca lunú lasca lañiêlla aca, che uzucuêlla nú uninu, nu urecheêlla tucu barco nú tsilaêalla cuna bee beneêlla equie cuendaê nú uni Diose lulla nú nzeêta aca. Nu lunú uchili arquiê Noe Diose unga achee nú zeca bee bene enu lá chili arquiê Diose castiya. 8 Leêca scua lunú uchili arquiê Abraham Diose, enzeêe uzucuêlla nú uni Diose chenu uninu lulla nú uchiuêulla lachilla nu challa lu yuu elu uni Diose nú deteênu lulla, nu uchiuêulla lachilla nzalla sin nú riêilla beyaê cae. 9 Nu lunú uchili arquiêlla Diose, uzuculla lu iliu nú uni Diose nú deteênu lulla xi neca tucu bene rene, nu uzuculla liñi carpa leêca scua uhuañi Isaac cuna Jacob liêibeella enu leêca riala yucu yuu zeêe. 10 Scua uhuañi Abraham xne nediyaê nzeêcaêlla nú nzialla huañilla eyeche nú urecheê Diose, eyeche nú leca xunga enta bichia nú nitilu. 11 Leêca scua Sara, lunú uchili arquiêlla añinzuca nú leca modo luêculla enduê, nu leêca unguxulalla para nú luêculla enduê, pero uduê Diose fuerzaêlla para nú acalla naa lu iliulabe nu uluêculla tucu enduê lunú uchili arquiêlla nú Diose neli saêalunu stichiaênu. 12 Scua ungae añinzuca nú unguxula Abraham nu uluêculla enduê, nu uluêculla huaxi bee familiaêlla xi huaxi bee belaa liñibe, cuna xi huaxi bee eyuxi ruêu inzatuê nú leca modo bacuê. 13 Ye bee benecuaê uchili arquiêbeella Diose hasta nú unguti beella nu añinzuca nú lá lañiê beella lunú ucuaqui uêna Diose lubeella pero lunú uchili arquiêbeella enzeêe nediyaê beella nú aca tucu nú uni Diose lubeella nú aca, nu ñia nzu arquiêbeella. Nu nediyaê nzeêcaê beella nú chiucu chuna tsia bichia nzeêta beella lu iliulabe quieê nu la yeêta beella para nú huañili beella. 14 Nu bee enu rni scua. Scua achee nzeêca rlubeê nú rcuaêna beella nú camero aca lachi beella. 15 Xne tunu rriêiscaê beella elliebacuê lachi beella elu uchiuêu beella che nuê modo nú abenchilaê zeca beella eyeche zeêe. 16 Pero máse rriêibeella elliebacuê tucu luhuare elu máse neca nzeêca nú neca liñibe. Enzeêe la tuê Diose nú necanu Dioseê beella, nu utsucheêlanu elu cuaêa beella liñibe. 17 Equie nú uchili arquiê Abraham Diose enzeêe chenu udeteê Diose preu Abraham nú nze utilla enduêlla Isaac xi neca uêna lu Diose, uzela Abraham añinzuca nú tuculiê Isaac neca enduêlla, nu añinzuca nú nediyaêlla nú uni Diose lulla: 18 “Equie cuendaê enduêlu Isaac dala huaxi bee familiaêlu." 19 Pero nediyaê Abraham nú rluêcu Diose poder para nú riêinu nú huañi zeca bee benenguti chenu udete Abraham preu scua neca xi neca nú unguti enduêlla nu uhuañi zeca enduêlla lu eluti. 20 Leêca esquie lunú uchili arquiê Isaac Diose, unilla nú cha nzeêcae lu cuendaê enduêlla Jacob nu Esau, nu unilla nú xi enta zeca cada tucu beella. 21 Leêca scua lunú uchili arquiê Jacob Diose, leêca unilla nú cha nzeêca lu cuendaê rucu bee enduê José, chenu yamerotsia atilla. Che uricuêlla yalla equie xcalla nu unacuêlla lu Diose. 22 Leêca scua, lunú uchili arquiê José Diose, chenu yamero atilla, che unilla nú chiuêu bee bene Israel Egipto, nu unilla lubee bene zeêe nú xneca riêinubeella bee artaêlla. 23 Equie nú uchili arquiê paê Moisés cuna naêlla Diose, chenu ungulalla che ucachiê beella liêilla diqui chuna guu equie nú ñia rnalla, nu lá lliqui beella chenu uni arre nú ati ye bee enduê meê enu neca enduê niyu. 24 Nu chenu uruêcu Moisés, equie nú uchili arquiêlla Diose, lá niarquiêlla nú acalla enduê xinchiuêcu arre Egipto. 25 Para Moisés, máse neca nzeêca nú nehuana zecalla cuna bee bene saêlla enu neca bee bene Israel, luhuare nú riêilla dula nú tsanaê arquiêlla bee saêlla para nú luêculla lunú niarquiêlla nu riêilla bee nú la zibiê. 26 Para liêilla máse neca nzeêca nú nehuana ulleêcalla tucu nú ulleêca Jesucristo, luhuare nú luêculla ye bee eluxene nú nuê Egipto xne máse nzu arquiêlla lu eluxene nú atiêlla lu Diose. 27 Leêca esquie lunú uchili arquiê Moisés Diose, uchiuêulla eyeche Egipto nu lá lliquilla mase ulee arre Egipto lulla. Nu utsutaê arquiêlla lu Diose xi neca nú rlañiêlla Diose, liêinu enu la lañiê bee bene. 28 Equie nú uchili arquiê Moisés Diose, uriêilla eliñi baxcu, nu unibiyaêlla nú ucuatsa bee bene Israel reneê bee sanchi ruêu bee niêi beella para nú chenu dete ángele enu ruuti la úti nzeêe bee enduê rluê bee bene Israel. 29 Leêca esquie lunú uchili arquiê bee bene Israel Diose. Enzeêe uyaêla labe inzatuê nú lee nelu udete beella xi neca tucu yuu bichi. Pero chenu nzedete bee bene Egipto luhuare zeêe, hora zeêe udete zeca inzatuê luhuare zeêe nu unguti beei lue. 30 Leêca esquie lunú uchili arquiê bee bene Israel Diose che chenu uzaê achi bichia nú rduê beella vuelta diqui abenchilaê eyeche Jericó, che uluquie muro nú necacheê abenchilaê eyeche zeêe. 31 Leêca esquie lunú uchili arquiê unaêa huexe enu lee Rahab Diose, utsilaêanchu chenu unguti bee bene lachinchu, bee enu né zucuê Stichiaê Diose xne liêinchu uyucu nzeêcanchu bee bene Israel enu uya tsiêña eyeche zeêe. 32 Nu huaxi nú niláa luhua, pero lecaê tiempo nú ixiuleêa luhua equie cuendaê beelá bee bene xi neca lu cuendaê Gedeón, Barac, Sansón, Jefté, David, Samuel nu bee profeta. 33 Ye beella uchili arquiêbeella Diose nu uriêibeella ana lu huaxi nación, nu uriêi beella elu usticia tucu nú necane, nu ulañiê beella nú uyalu tucu nú uni Diose lubeella nú aca, nu utsacuê beella ruêu bee bichiee. 34 Leêca nuê beella enu utsiêqui bee bene lu quii nu lecaxi ulleêca, nu nuê beella enu utsilaêa lubee bene enu niarquiê úti liêibeella cuna espada, nu uyuêu juerzaê beella nu utsu naaqui arquiêbeella, añinzuca nú nechulaê nzu arquiêbeella, nu uyuêu juerzaê beella chenu uriêibeella xuu. Nu utiliacaê beella bee bene rene enu uliunu liêibeella. 35 Nu leêca nuê bee unaêa enu unguti bee familiaê, nu equie nú uchili arquiêbeella Diose, che uhuañi zeca bee familiaê beella stucu bese. Pero leêca nuê bee bene enu mase unguti, pero para liêibeella máse neca nzeêca nú nehuana zeca beella nu mase nú unguuti bee bene liêibeella, lá zela beella nú tsanaê arquiê beella Diose, para nú luêcu beella stucu elunehuañi nú necuqui nú máse seca. 36 Leêca nuê beella enu nehuana ulleêca, utsequichiaê bee bene liêibeella, nu udiñi bee bene liêibeella, nu ullicaêcu bee bene liêibeella cuna cadena, nu uduê bee bene liêibeella niêcuê. 37 Leêca nuê beella enu unguuti bee bene cuna quiee, leêca nuêbeella enu uchiecuê bee bene arliêtilluu cuna sierra, nu nuê beella enu unguti bee bene cuna espada, leêca nuê beella enu uyanze enzichiuê enzerquie, nu nehuana ulleêca beella, nu ulleêca beella elitsi, nu ungututsia beella itiê sanchi cuna itiê chipa nu nehuana uriêinu bee bene liêibeella. 38 Uyanzee beella enza lu dañi achi, nu enza dañi nu uyaêna beella liñi ye clasiaê bee yubeê. Bee bene zeêe lá yala nú ahuañi beella lu iliulabe quieê xne neca beella bee bene nzeêca. 39 Mase nú yebeella achee nú neli uchili arquiêbeella Diose, pero né yucubeella lunú ucuaqui uêna Diose lubeella. 40 Xne Diose uriêinu elliebacuê tucu nú máse neca nzeêca luaêahua, nu lá acae luego tucu nú uninu lubeella xne niarquiênu nú junto atiaêahua cuna liêibeella lunú ucuaqui uênanu luaêahua.