1 Timoteo 3

1 Neli, neca bedichiaê quieê tunu nuê tucu bene enu rriêi elliebacuê nú nibiyaê leta bee bene enu nzeli arquiê Jesucristo, neca nzeêca nú niarquiêlla riêilla scua. 2 Pero bene enu nibiyaê rquiêña nú acalla tucu bene enu nehuañi nzeêca tucu nú rialane para nú la zeêta bee bene liêilla, cuna nú nechialla tucutsia unaêa, nu acalla tucu bene enu nehuañi nzeêca cuna nú luêculla elliebacuê nzeêca para nú luêcu bee bene ulaêna lulla, cuna nú acalla enu siempre nuê arquiê nú deteê elu yaêna bee bene niêlla, nu acalla tucu bene enu chiquiê reca para nú acalla zeteêlla bee bene. 3 Cuna nú la acalla uniqui nu la acalla bene enu nelachi, nu la laênalla nú riêilla ana dimiê bee bene, rquiêña nú riêi nzeêcalla lu titse bee bene, nu aca lleêna arquiêlla, nu la acalla bene enu riuêtsia arquiê dimi. 4 Leêca rquiêña nú acalla tucu bene enu nibiyaê nzeêca niêi, nu zeteêlla bee enduêlla nú zucuê beei ye nú zucuê beei cuna nú luêcu beei ulaêna. 5 Xne tunu tucu bene la acalla nibiyaêlla niêlla, ¿xa acalla nibiyaêlla lubee beneê Diose che? 6 Enzeêe, bene enu apenatsia nzeli arquiê Jesucristo, la yala nu nibiyaêlla lubee bene enu nzeli arquiê liêinu para nú la aca nelliñalla nu la zecalla castiya nú riala bezeêlu. 7 Nu hasta bee bene enu la chili arquiê Jesucristo riala chulu liêilla nú nehuañilla tucu nú riala nú huañilla para nú la yaêna netúlla urre riêi bezeêlu ana lulla. 8 Nee leêca esquie, bee diácono bee enu rriêi elietsa lu bene enu rnibiyaê rquiêña nú aca beella bene enu rluêcu bee bene ulaêna lu, cuna nú tsaêalu beella stichiaê beella, nu la aca beella bee uniqui, nu leêca la laêna beella nú riêitsia beella ana dimiê bee bene. 9 Nu tsutaê arquiêbeella lunú ulubeê Diose luaêahua nú nzeli arquiaêahua, nu riêibeella puro elliebacuê nzeêca. 10 Enzeêe rluti rquiêña nú acaxu preo beella, para nú biêya xa rriêi beella, nu tunu la luêcu beella niê tucu falta che nuê modo nú aca beella diácono. 11 Leêca esquie bee unaêa enu riêi elietsa liñi indu, rquiêña nú riêi beella tucu nú riala riêi beella para nú luêcu bee bene ulaêna lubeella nu la yala nú aca niquichiaê beella, rquiêña nú huañi nzeêca beella, tucu nú riala nú huañi beella, cuna nú tsaêalu beella stichiaê beella lu yeene. 12 Bee diácono rquiêña nú nechia beella tucutsia unaêa beella, nu leêca nibiyaê beella niêi beella cuna lubee enduê beella tucu nú rialane. 13 Xne tunu riêi bee diácono tucu nú rialane, luêculá bee bene ulaêna lubeella, nu niêtemeê la lliqui beella nibeella nú xa nzeli arquiêbeella Jesucristo. 14 Nzuculua nú la leaê nzelabiêya liêilu Timoteo, pero rquieêa carta quieê lulu, 15 xne tunu rleêa nú nzelabiêya liêilu, nediyaêlaêlu xa riala nú huañilu ante beelá bee beneê Diose, enu nehuañi nu nzutaê arquiê lunu, nu seteêbeella stichiaênu nú neli neca. 16 Liêihua nediyaênzeêcaêahua nú chiquiê rluêcu Jesucristo poder liêinu enu ulubeê Diose luaêahua nú chili arquiaêahua: Ubeêtanu lu iliulabe xi neca tucu bene, uni Espíritu Santo nú la luêcunu dula, nu ulañiê bee ángele liêinu nú ubeêtanu lu iliulabe. Ubeneê bee bene iliulabe stichiaênu, nu diqui bee luhuare lu iliulabe uyali arquiê bee bene liêinu, nu uquienu liñibe nzianu.