1 Corintios 6

1 Tunu nuêhua enu rliunu saê enu nzeli arquiê Jesucristo, xiquie nú nzahua lubee usticia para nú tsuxcuaêa nú secahua, luhuare nú chahua lubee saêhua enu nzeli arquiê Jesucristo. 2 ¿Xieê lariêihua beyaê nú enta bichia nú bee enu nzeli arquiê Jesucristo neca bee enu lualue lu cuendaê bee bene iliulabe la? Nu tunu liêihua lualuhua lu cuendaê bee bene iliulabe, xiquie nú lacahua lualuhua lu lleênatsia nú secahua cuna bee saêhua enu nzeli arquiê Jesucristo. 3 ¿Xieê la riêihua beyaê nú hasta bee ángele lualuaêahua lu cuendaê la? ¡Xneca nú la lualuaêahua lu cuendaê bee bene iliulabe quieê! 4 Enzeêe chenu rliunuhua saêhua, ¿xiquie nú nzahua lubee bene enu laca bee beneê Jesucristo para nú tsucheê lunú xi secahua? 5 Rnia scua luhua para nú tuêhua. ¿Xne xieê letahua leca niê tucu enu aca lualue lu cuendaê bee saêhua enu nzeli arquiê Jesucristo chenu nuê xi seca beella la? 6 Pero liêihua chenu rliuhua luhuare nú riêihua scua aêla rdeteê cuendahua saêhua lubee usticia, enu la chenala inziuê Diose. 7 Chiquiê necha nú rliunu saêhua. Nzalá nú uriquiêhua lunú xi rriêinu beella liêihua. Nu mejora nú uyalaê beella steneêhua. 8 Pero luhuare nú zelahua nucuaê aêla liêihua rcachiêhua bee steneê bee saêhua, nu rriêinuhua beella beenú la yala riêinuhua beella. 9 ¿Xieê lariêihua beyaê nú bee bene enu necha rriêi leca modo chuêu liñibe elurnibiyaê Diose la? La zelahua nú zequienu bee bene liêihua xne elurnibiyaê Diose la chuêu bee bene enu rriêi eluhuexe, nu bee enu rluêcu ulaêna lu stucu diose enu laca diose nu bee niyu enu rleê saê niyu, nu bee niyu enu rnaêtse bee unaêa enu laca unaêa, nu bee unaêa enu rnaêtse bee niyu enu laca niyuê. 10 Leêca esquie bee huanaê, nu bee bene enu neyiê rcuaêa, bee uniqui nu bee enu seêta bee bene, nu bee enu rcuaêna nú xneca modo axi steneê bee bene, la chuêu bee nzeêe elurnibiyaê Diose liñibe. 11 Nuêhua enu uhuañi scua huaêtu, pero nee lecaê xi nahua lu Diose, nu nee necalahua para Diose, nu nebacuêlahua xi neca tucu enu la luêculi dula ante Diose equie cuendaê poderê Jesucristo nu equie cuendaê Espíritu Santoê Diose nú nehuañi cuna liêihua. 12 Neli nú nuê beyaê riêá yee lunú niarquia pero laca yeene neca nzeêcae. Nu nuê beyaê riêá xitse lunú niarquia, pero la neca nzeêca nú zela nú riêi bee nucuaê ana lua. 13 Nuê bee bene enu rni: Bee elubacu necane para xlaêcu bee bene, nu xlaêcu bee bene neca para bee elubacu. Neli nucuaê, pero nitilu Diose rucu bee nucuaê, pero laca neli nú cuerpoê bene neca para nú riêi bene eluhuexe. Xne cuerpoêahua necane para Diose, nu liêinu necanu enu rnibiyaê lu cuerpoêahua. 14 Nu tucu nú uriêi Diose nú uhuañi zeca Jesucristo lu eluti, leêca scua riêinu nú huañi zecaêahua lu eluti cuna poderênu. 15 ¿Uriêihua beyaê nú neca cuerpoêahua xi neca tucu parte cuerpoê Jesucristo. Enzeêe leca modo nú naêtseêahua cuerpoê Jesucristo nú rniaêahua neca cuerpoêahua para nú naêtseêahua unaêa huexe? Nu leca modo nú riaêahua scua. 16 Xieê la riêihua beyaê nú bene enu rnaêtse tucu unaêa huexe, necabeei xineca tucutsia bene. Liêihua nediyaêhua nú lu ichiê Stichiaê Diose rni: “Rucu beei neca beei xi neca tucutsia bene." 17 Pero bee bene enu neca tucu necatse cuna Jesucristo, neca tucu necatsela beella cuna liêinu equie cuendaê Espíritu Santo. 18 Enzeêe ubiêyahua liêihua para nú la riêihua saê clasiaê eluhuexe cuaê. Ye beelá bee dula la nitilu cuerpoê bee bene, xi rnitilu eluhuexe cuerpoê bene. 19 Xne uriêihua beyaê nú cuerpoêhua neca induê Espíritu Santo nú uliquiê Diose luhua, nu lunú nzula Espíritu Santo cuna liêihua la nibiyaê eêcuhua luhua. 20 Xne Jesucristo udixiula stulahua chenu ungutinu lu cruse. Enzeêe ubiêyahua cuerpoêhua nu la xitse riêinuhuane xne scua riuê arquiê Diose, xne liêinu rnibiyaênu luhua.