Salmos 52

1 ¿Bizr chee̱ na’ dxucá’ana szren cuinu’ chee̱ da cale̱la da nunu’, lue’, benne’ wal-la? Tu zúazqueze xel-la’ dxexache lazre’ chee̱ Dios. 2 Tu dxuchálajzquezu’ chee̱ da cale̱la da gunu’ chee̱ le sa’ ljwezru’. Da dxenníu’ naca na ca tu xia da nalále̱’e̱, dxezí xe̱’u ljwezru’. 3 Nazrí’idxenu’ da cale̱la quézcala da xrlátaje, ne dxedánnedxenu’ da we̱n lazre’ quézcala da li. 4 Nazri’inu’ xúgute̱ dizra’ da dxulucá’ana ditaj na bénneache, lue’, benne’ dxezí xe̱’u. 5 Chee̱ le̱ na’ guzría xi’ Dios lue’ tu chí’izqueze. Waxe̱le̱’ lue’, ne xequé̱’e̱ lue’ naga zúaquezu’, ne gucuase̱’ lue’ naga zaj zra’ benne’ ban ca’. 6 Xelelé’e benne’ xrlátaje ca’ da nigá, na’ xelezrébequeze̱’. Xuluzrízrqueze̱’ chiu’ lue’, xelenné̱’: 7 “Le na’ xque, benne’ nigá quebe bxren lazre̱’ Dios chee̱ gucu’uje̱’ le̱’. Bxren lázrequeze̱’ ca naca xel-la’ gunní’a zrente̱ chee̱’, ne guzúaqueze̱’ lu da cale̱la da dxune̱’." 8 Neda’ naca’ ca tu xaga olivo xa’a lu xu’u lizre Dios. Tu dxuxrén lázrezqueza’ xel-la’ dxexache lazre’ chee̱ Dios chadía chacanna. 9 Güe lá’anaqueza’ Lue’ chadía chacanna lawe’ da be̱nu’ da caní, ne cueza lazra’ lau Lue’ lawe’ da naca na xrlátaje lau xúgute̱ benne’ chiu’ Lue’.