Salmos 12
TBL1 Busölá nedaʼ, Xan, tuʼ cabirö zoa nitú nu naca dxiʼa, en bitiʼ gaca nu idzöli nitú nu run ca rnna xtídzaʼa. 2 Taʼzíʼ yeʼe yúguʼtë bönachi luzë́ʼeguequi. Lu yöl-laʼ rizíʼ yëʼ quéguequi tuíʼilen luzë́ʼeguequi didzaʼ yúlajdoʼ. 3 Xan, buzóa dxisö nupa naʼ tuíʼi didzaʼ yúlajdoʼ, en buzagaʼ ruíʼigaca nupa tun ba zxön cuínguequi. 4 Taʼnná: “Güíʼiruʼ didzaʼ ca rizësö ládxiʼruʼ, ateʼ cuntu nu táʼbagaʼ rëʼu. ¿Nuzxi caz inná beʼe rëʼu ca naca didzaʼ ruíʼiruʼ?" 5 Rnnëʼ Xanruʼ: “Naʼa guídaʼ tuʼ nacuáʼ nupa tun ziʼ nupa taʼyadzaj taʼyudxi, ateʼ rinnë́ ládxiʼgaca nupa ni tuʼ zoa nu ribía no léguequi. Ca taʼzësö ládxiʼgaca, laʼ guídateaʼ dusöláʼ léguequi." 6 Huáca uzxöni ládxiʼruʼ didzaʼ ruʼë Xanruʼ. Nácagaca ca guíë plata ba nequi, le nudxiʼa gadxi luzuí tu lu guíʼ lálëʼe. 7 Liʼ caz, Xan, gun chiʼu léguequi, en usölóʼ léguequi lu náʼagaca nupa tuáʼ döʼ naʼa dza. 8 Gátiʼtës nacuáʼ nupa tuáʼ döʼ, cateʼ tun zxön bönachi le ruáʼ döʼ.