SAN MATEO 14

1 Leque le’n huiza mbìn thìb mbi’ co’ ngro’ lèe Herod, co’ mnibe’ loo mèn co’ nac mèn gulàaz che’n mèn galile tiempa, cón che’n Jesús. 2 Sya, ndxab Herod loo mèn co’ ngòc moz Herod co’ ngo no Herod: âPeser Juàn Bautist nac mbi’a. Thìb descuid pá ngro xban Juàn làth mèn nguth cona ndxàp mbi’a con’ la’s nii mbi’ no la’s ya’ mbi’ par ndli mbi’ chol yalguzye’. 3 Tataa ndxab Herod loo mèn co’ nqueltàa no Herod. Tac Herod neeque’ le’ Herod mnibe’ loo solndad ya tedó’ solndad nii Juàn Bautist con thìb caden le’n lezi’f ante por cón che’n thìb xa’got co’ ngro’ lèe Herodi co’ ngòc sa’l Lip, hues Herod. 4 Tataa mnibe’ Herod ngòc loo Juàn Bautist tac de yalquìite ndxab Juàn loo Herod indxàalte que no Herod xa’got Lip xal xa’gotpe’ Herod. 5 Leque hora ngulàa xyàn lezo’ Herod. Mblya’s Herod ngnibe’ Herod loo solndad par ya yuth solndad Juàn. Per Herod mzyeb gunèe Herod mèn co’ nziri’ huiza. Tac ryete mèna mbli xtùuz cón che’n Juàn no mbez mèna loo xtàa mèn le’ Juàn ante ndyoodi’s cón che’n Diox. 6 Per huiz co’se’ mbli Herod thìb lni co’ ngòc huiz co’ ngóol lèe Herod, sya, thìb mza’ co’ nac rsap Herodia, asembli mza’. Ngro’ mza’. Mbil’ nii mza’ loo Herod no loo mèn co’ nziri’ no Herod, mèn co’ mbli Herod convid. No anze’f thìb gust mda’ lezo’ Herod gunèe Herod mod co’ mbil’ nii mza’. 7 Ale mde’th Herod Diox loo mza’ no loo rye mèn co’ nziri’ no Herod. Ndxab Herod loo mza’ le’ Herod li ryethe con’ ndlya’s mza’ o ta’ Herod ryethe con’ ndlya’s mza’ par càa mza’. 8 Le’ xna’ mza’ na, ndoole’ mquil’ mza’. Ndxab xna’ mza’ loo mza’: âGuuz loo rey Herod ta’ rey yéc Juàn Bautist càal loo thìb plat. Le’ sya, co’se’ mbere mza’, ndye’th mza’, ndxab mza’ loo rey Herod: âRey, daa ndlyaz ta’ U’ yéc Juàn Bautist càan loo thìb plat nalle’. 9 Co’se’ mbìn Herod tataa ndxab mza’ loo Herod, anze’f mxi lezo’ Herod por con’ li Herod. Per com le’ Herod mde’th lèe Diox, ¿lé’?, no ngro’le’ di’s ro Herod loo ryete mèn co’ nziri’ con Herod, mèn co’ mbli Herod convid, le’ Herod li con’ ndlya’s mza’, ¿lé’?, mnibe’ Herod ya xi solndad yéc Juàn Bautist loo thìb plat par càa mza’. 10 Sya, que nzo ne’ ñee lezo’ Herod, mtel’ Herod solndad par ngua cho’ solndad yéc Juàn le’n lezi’f. 11 Ngoloa, ndye’th no solndad yéc prob Juàn loo thìb plat. Mda’ solndad yéc Juàn loo thìb plat mcàa mza’. Le’ mza’ na, xexte ngro’. Ngua ta’ mza’ plat con yéc Juàn loo xna’ mza’. 12 Ngolo mbeth solndad Juàn, mzin myen’ xin’ mté’th thebol Juàn Bautist. Ngua lo’ myen’ thebol Juàn lezi’f. Ngua ca’s myen’ thebol Juàn. Ngoloa, ngua ta’ myen’ cuent loo Jesús cón ngòc loo Juàn Bautist. 13 Co’se’ mbìn Jesús con’ ngòc loo Juàn, mbii Jesús tya. Ngòo thidte Jesús le’n thìb yòoyaa con myen’ xin’ mté’th Jesús par ya Jesús xà’le’ tedib lugar. Per mèn co’ ngure no Jesús tya mbìn le’ Jesús ndale’ loo nít loo lagun. Sya, ngro’ tee rye mèn co’ nzo ban par neda angnzo ro lagun. Nda nque mèna xís Jesús. 14 Texal ngro’ Jesús le’n yòoyaa, ñèe Jesús nziri’le’ huax mèn loo Jesús. Nalyat ngòc lezo’ Jesús gunèe Jesús mèna. Mblyat lezo’ Jesús gunèe Jesús mèna. Mteyac Jesús rye mèn yíiz co’ nde no mèna loo Jesús. 15 Co’se’ ñèe myen’ xin’ mté’th Jesús nde zèle’ izlyo’ huiza, ngua myen’ loo Jesús. Ndxab myen’ loo Jesús: âMzyèle’ izlyo’, Tad. Neeque’ U’ co’te’ nziri’ na’ ndxè’ nac thìb lugar nagán. No yende chó mèn nzo co’ tho’ co’ hua mèn trè’. Más huen gunii U’ Diox loo mèn ba’ par bii mèn par ya cua’n mèn con’ hua mèn le’n yèez ba’ no le’n ranch co’ nziri’ le’n yii ba’. 16 Sya, mcàb Jesús loo myen’. Ndxab Jesús: âInquinte bii mèn, yey. ¿Máa yob yéc gu’, na? Fta’ gu’ con’ hua mèn. 17 Myen’ ndxab loo Jesús: âYende cón ngue no nu’ arid trè’, yey. Pente ngue no nu’ ga’y pan no chop mbèel no maste. 18 Jesús ndxab loo myen’: âQue de no gu’ con’ ngue no gu’a trè’. Ãeene’. 19 Sya, gunii Jesús loo mèna. Ndxab Jesús: Nabe’ste gure tub gu’ loo huan ba’, ey. Ngoloa, mxen Jesús ga’y pana no chop mbèela. Mbui’ Jesús loo bé’. Ndxab Jesús: Ay, Dio’s. Diox quix U’, Diox, por pan ndxè’ no por mbèel ndxè’. Sya, mchì’x Jesús pana no mbèela. No mbli Jesús par mbyar’ pana no mbèela. Mda’ Jesús pana no mbèela loo myen’ xin’ mté’th Jesús. Le’ myen’ xin’ mté’th Jesús na, mbli’tha loo mèna. 20 Ryete mèna nduhua rsè axta plóthe mblya’s mèna. Ngolo nduhua rsè mèna, msè myen’ xin’ mté’th Jesús si’ fchop cardor pan no mbèel co’ mbyan’ xo’f. 21 Mèn co’ nduhua rsèa ngòc ga’y mil mèn, ante mènbi’. Xà’que’ mèngot no xà’que’ myen’ bix. Indxòode cuent mèngot no myen’ bix co’ nduhua. 22 Ngoloa, mnibe’ Jesús loo myen’ xin’ mté’th Jesús. Ndxab Jesús loo myen’: âGòo gu’ le’n yòoyaa ba’. Ftlo gu’, fteteegu’ yòoyaa. Ya ner gu’ par zin gu’ tedib lad ro lagun. Yiloa, ndal que’en ba’. Láth nda myen’a, Jesús gunii Diox loo mènléy’ co’ nziri’a. 23 Ngolo gunii Jesús Diox loo mènléy’a, mxen Jesús ned. Nda Jesús loo thìb yii co’ ndub gaxte tya par cuez thidte Jesús Diox. Co’se’ ngulàa yál’ izlyo’ huiza, thidte Jesús mbyan’ loo yiia. 24 Le’ myen’ xin’ mté’th Jesús na, láth co’se’ nda tetee myen’ yòoyaa grolthe loo lagun, ngro’ thìb mbiidó’ co’ mtau’ ned nda yòoyaa. Nde nxon’, mxít too mbii nít. Ngo mbii nít le’n yòoyaa. No ngüin mbii nít cho yòoyaa. 25 Xtil’a, cuar ngro’ too gax Jesús loo myen’. Nde tee nii Jesús loo nít loo lagun loo myen’. 26 Co’se’ ñèe myen’ xin’ mté’th Jesús nde tee Jesús loo nít loo myen’, anze’f mzyeb myen’ no ngo no lezo’ myen’. Ngrozèe zeb myen’. Ndxab myen’: â¡Ay, con’ mal nde go’, cara! ¡Con’ mal nde go’, cara! 27 Per Jesús gunii loo myen’. Ndxab Jesús loo myen’: âNe’zyebte gu’, ey. Blo gu’ valor loo gu’. Daa na. 28 Sya, ndxab Pedr loo Jesús: âTad, chele’i U’, bli U’ par teniin loo nít par galen loo U’ axta co’te’ ndoo U’ ba’. 29 Sya, ndxab Jesús loo Pedr: âNeeca. Que de, tá. Sya, ngulàa Pedr loo yòoyaa. Mtlo Pedr, mdee nii Pedr loo nít par ya Pedr co’te’ ndoo Jesús. 30 Per co’se’ mda’ Pedr cuent anze’f thìb mbii nzo’f loo lagun, mzyeb Pedr. No co’se’ mden’ Pedr mtlole’ ngue dep Pedr le’n nít, mtlo Pedr, ngrozèe Pedr. Mbez Pedr: âTad, Tad, jer que de. Guree U’ daa par lyá’ daa trè’. 31 Texal mzin Jesús loo Pedr, chàa, nguree Jesús ya’ Pedr. No ndxab Jesús loo Pedr: â¡Jaa, Pedr! Pente ndxela’sl, ¿lé’? ¿Chonon ne’ngàptel yalxla’s loon par ne’dyeptel le’n nít, à’? 32 Co’se’ mquée Jesús loo yòoyaa con Pedr, xèegà nguled mxyo’f mbii loo nít loo lagun. 33 Le’ sya, co’se’ gunèe ryete myen’ co’ nzo le’n yòoyaa con’ co’ ngòca, mdub xib myen’ loo Jesús. Mcòo’ myen’ yéc myen’ loo Jesús. No ndxab myen’ loo Jesús: âLìcpe’ ba’i, Tad, U’ nac xgan’pe’ Diox. 34 Ngoloa, tolo mtetee myen’ yòoyaa loo nít loo lagun axta mzin myen’ tedib lad ro lagun con Jesús co’te’ nac loo xyòn mèn che’n làaz mèn genesaret. 35 Co’se’ mblibe’ mèn yèezya’ che’n làaz mèn genesareta Jesús na, mde’th mèna di’s loo rye mèn yèez gaxa. Co’se’ mbìn mèna le’ Jesús nzo tya, mbi’th no mèna huax mèn yíiz loo Jesús co’te’ ngo Jesús. 36 Nalyat mna’b mèna di’s loo Jesús par ta’ Jesús lugar ante gàal mèna ro xab Jesús yac mèna loo yíiz co’ ndyac mèna. Tataa mod ryete mèn co’ ante mbuàal ro xab Jesús mbyacque’.