SAN LUCAS 7

1 Co’se’ ngolo mdoodi’s Jesús loo mèn co’ mqueltàa loo Jesús, mxen Jesús ned. Nda Jesús par ciuda Capernaum. 2 Le’n ciuda Capernaum ngo thìb mbi’ co’ ngòc capitán. Mbi’a ngòc mèn gulàaz che’n mèn ciuda Rom. Mque no mbi’ thìb moz. No nde nxon’, anze’f nque’ lezo’ mbi’ gunèe mbi’ moz mbi’. Mxac len moz axta yamerle’ mtin liz moz. 3 Co’se’ ndxòn capitán le’ Jesús nteyac mèn yíiz, mtel’ capitán plá mèngool co’ nac mèn nación Israel loo Jesús par ya na’b mèna di’s loo Jesús par ya teyac Jesús moz capitán. 4 Mèngoola mbii gax loo Jesús. Mtlo mèngoola, nalyat mbez mèngoola loo Jesús. Ndxab mèngoola: âTad, ndxàalque’ li U’ favor ya lyath no U’ capitán. 5 Tac capitana anze’f nque’ lezo’ ñèe capitán mèn nación na’. No mnibe’ capitán mxít te’f mèn thìb sinagog nu’ cón che’n capitán. 6 Sya, mxen Jesús ned. Nda no Jesús mèngoola. Co’se’ nda zin’ gaxle’ Jesús con mèngoola liz capitán, capitán mtel’ plá amiu capitán par ya sál’ amiua Jesús. Ndxab mèn co’ ndxàc amiu capitana loo Jesús: âTad, indlya’ste capitán li xol capitán U’ tac nden’ capitán inzyál’te capitán yòo U’ liz capitán. 7 Cona, ne’nglide capitán ryes ngui’th yub capitán loo U’ par ngui’th cua’n yub capitán U’. Cona, mtel’ capitán nu’, nde nu’. No gunee capitán di’s loo nu’ co’ ta’ nu’ cuent loo U’. Taandxè’ gunee capitán: Tad Jesús, daa ngue na’b loo U’, bli U’ favor, ante ñibe’ U’ le’ moz daa yac. Ndxelazquen yac moz daa. 8 Tac leque yub daa nzo xan’ yalñibe’ co’ nac yalñibe’ roo no ngue non solndad co’ ñibe’en loo. Chele’ daa gab loo thìb solndad par ya solndad thìb mandad, solndad ya. No chele’ daa gab loo tedib solndad par yi’th solndad loon, solndad yi’th loon. No chele’ daa ñibe’ loo moz daa par li moz daa thìb zin’, moz ya lii. 9 Co’se’ mbìn Jesús di’s co’ ndxab mèna, ante mbui’ Jesús no ante gunaa Jesús cón che’n capitana. Mbui’ Jesús loo mèn co’ nziri’ co’ nda nque xís Jesús. Ndxab Jesús loo mèna: âLìcpe’ ba’i, ne’ ne’ làth rye mèn nación Israel iñèeden nec thìb mèn co’ anze’f ndxela’s no co’ ndxàp yalxla’s loo Diox xal capitán ba’. 10 Co’se’ mbere mèn co’ ngòc amiu capitán co’ ngua sál’ Jesús con mèngoola, ndye’th mèna con mèngoola par liz capitana, ale ñee mèna mbyacle’ moz capitán tac Jesús mteyac moza axta co’te’ ndoo Jesús ned nda Jesús. 11 Ngolo ngòc con’a loo moz capitana, tedib huiz co’ nde nquea, mxen Jesús ned. Nda Jesús par tedib yèez, yèez co’ ngro’ lèe Naín. Nda no Jesús ryete myen’ xin’ mté’th Jesús. No nda nque rye mèn co’ mqueltàa loo Jesús xís Jesús. 12 Co’se’ nda zin gax Jesús ro yèez Naín, ñèe Jesús ne’ mèn thìb thebol. Nda ca’s mèn thebola panteón. Thebola ngòc angoluxte mbyòo loo guna’ co’ nac xna’ thebol. Ngòc guna’ co’ nac xna’ thebola thìb viud, ne. Anze’f thìb mèn yèeza mqueltàa con xna’ thebol par nda ca’s mèna thebol. 13 Co’se’ gunèe Tad Jesús guna’a, mblyat lezo’ Tad Jesús gunèe Tad Jesús guna’. Ndxab Tad Jesús loo guna’: âNe’gón’tel, ey. 14 Sya, mbii gax Jesús. Mbuàal Jesús caj che’n thebol. Le’ mèn co’ ne’ thebol na, ngo too. Nguled mèna cuante. Ndxab Jesús loo thebola: âMbyòo, na ngue nii lool: Goo che. 15 Le’ sya, mbyòo co’ ngutha, chàa, ngro xban mbyòo no ngo che mbyòo. No mdub mbyòo. Mtlo mbyòo, mdoodi’s mbyòo. Sya, mdix mèna caj loo yòo. Le’ Jesús na, mxen ya’ mbyòo. Mxít too Jesús mbyòo. Ndxab Jesús loo xna’ mbyòo: Xgan’l ndxè’, ey. 16 Co’se’ gunèe mèn ngolo ngòc con’a, ryete mèna mzyeb. Mtlo mèna, ndxab mèn di’s natú’ no di’s roo di’s xèn loo Diox. No mbez mèna: â¡Ay, Dio’s! Thìb mbi’ roo no thìb mbi’ xèn nac mbi’ co’ nde làth na’ co’ nde’th di’s co’ ndxab Diox loo na’. Mbez mèna, ne: âYub Diox nde lyath no na’, na’ co’ nac mèn nacionpe’ Diox, cara. 17 No mbyath mbyèn cón che’n con’ mbli Jesús loo mbyòoa loo ryete mèn yèezya’, co’ nee di’s, co’ nac rye yèezya’ co’ nac che’n làaz mèn jude no taamas yèez co’ nziri’ gaxte loo yèezya’ che’n làaz mèn jude. 18 Juàn Bautist mbìn con’ co’ mbli Jesús tac myen’ co’ ngòc myen’ xin’ mté’th Juàn Bautist mda’ cuent cón che’n con’ co’ nde tee ndli Jesús loo mèn loo Juàn. Sya, mtel’ Juàn mèn co’ ngua mandad par ngua xi mèna chop myen’ xin’ mté’th Juàn par tyoodi’s no Juàn myen’ ro lezi’f co’te’ nzo Juàn. 19 Mtel’ Juàn ryop myen’a loo Jesús par ñibdi’s myen’ loo Jesús ñeene’ ché’, lìcque’, nac Jesús Crist co’ ndxath no co’ mxyo’f di’s yi’th o ché’ ndxàal cued mèn yi’th tedib mbi’ co’ nacpe’ Crist. 20 Sya, ngua ryop myen’ co’ mtel’ Juàna loo Jesús. Ndxab myen’ loo Jesús: âJuàn Bautist mtel’ nu’ par ñibdi’s nu’ loo U’ ñeene’ ¿ché’ U’ nac Crist co’ ndxath yi’th o ché’ ndxàal cued nu’ yi’th tedib mbi’ co’ nacpe’ Crist, cà’? 21 Le’xque’ hor co’se’ mzin myen’a loo Jesús, Jesús ngue teyac huax mèn yíiz co’ mque no chol yilíiz ye’rsin’. No ngue go’ Jesús xpii meexù’ loo mèn. No mdub Jesús xnìi ngudloo huax mèn sieu. 22 Jesús ndxab loo myen’: âByàa gu’. No fta’ gu’ cuent loo Juàn ro lezi’f con’ co’ ngolo gunèe gu’ no con’ co’ ngolo mbìn gu’. Fta’ gu’ cuent xá mod mduben xnìi ngudloo mèn sieu no ngüi’ mèn sieua; xá mod mtoxcuan nii mèn coj par nalì ndyee mèn coj; xá mod mteyaquen mèn co’ ndxa’s no ndxèe yid lad; xá mod ndxòn mèn di’s, mèn co’ mcue’ nza; xá mod ngo xbanen mèn nguth. Le’ loo mèn prob na, ndethen no ngon yalbàn cón che’n di’s ndac che’n Diox loo mèn. 23 Huen nda mèn co’ ne’ten’te gàc ngòc nguàal con’ loo mèn por cón chenen no maste. 24 Co’se’ ngolo ndyàa mèn co’ mtel’ Juàn Bautist loo Jesús, Jesús mtlo mdoodi’s loo taamas mèn cón che’n Juàn. Ndxab Jesús loo mèn: âCo’se’ ngua tee hui’ gu’ co’te’ nagána, ¿cón ngua tee hui’ gu’ co’te’ nagána, à’? ¿Ché’ ngua tee hui’ gu’ thìb xan’ yíi co’ ngol’ mbii, cà’? Tyè’, ¿lé’? 25 ¿Cón ngua tee hui’ gu’, sya? ¿Ché’ ngua tee hui’ gu’ thìb mbi’ co’ noc xab thìb ned lar’ huen, cà’? Tyè’, ¿lé’? Gu’ nonque’ no naneeque’ gu’ le’ mèn co’ ndxoc thìb ned lar’ huen no mèn co’ ante nda’ gust lezo’, mèna más ñèe mèn co’te’ nac liz thìb rey, ¿lé’? 26 ¿Xá nee gu’? ¿Cón ngua tee hui’ gu’, sya? ¿Ché’ ngua tee hui’ gu’ thìb mbi’ co’ nde’th di’s co’ ndxab Diox, cà’? Aa. Lìcpe’ ba’i, gu’ ngua tee hui’que’ thìb mbi’ co’ nde’th di’s co’ ndxab Diox. No ngua tee hui’que’ gu’ thìb mbi’ co’ nac más mbi’ roo no mbi’ xèn leque chol mèn co’ mde’th di’s co’ ndxab Diox. 27 Cón che’n Juàn co’ ngua tee hui’ gu’a nac di’s co’ ndub loo libr co’ nac xti’s Diox co’ mbez: Na tel’ ner thìb mbi’ co’ ya te’th ner di’s ndac ndxè’. No lu’ mbi’ cón che’n lùu loo mèn par li nab mèn xtùuz mèn no lezo’ mèn loo cón che’n lùu ndoore’. No gàc con’a loo mèn xal co’se’ ntoxcua’ mèn thìb ned no ndli lal mèn thìb ned. 28 Na ngue nii loo gu’ nalle’: Yende chó mèn co’ nde teele’ ndxáal xàn’ nii xna’ mèn no xàn’ nii xud mèn tarte gáal thìb mbi’ co’ nac más mbi’ roo no mbi’ xèn co’ nde’th di’s co’ ndxab Diox leque Juàn Bautist. Mastale’, axta nalle’ par delant mèn co’ nac más be’the co’ ngue ta’ lugar par ñibe’pe’ Diox loo mèn, más huen nda mèna loo Diox leque Juàn Bautist tac Diox co xo’f más con’ co’ nac cón che’n Diox loo mèna leque con’ co’ mblo xo’f Diox co’ nac cón che’n Diox loo Juàn. 29 Co’se’ mbìn mèn di’s co’ ndxab Jesús cón che’n Juàn, ryete mèn co’ mbli Juàn bautizar no mèn co’ ndli cobrar cón che’n contribución co’ mbli Juàn bautizara, axta syare’ mblila’s mèna no mda’ mèna cuent le’ Diox nac Diox nalì loo ryethe con’ co’ ndli Diox. 30 Per mèn co’ ngòc mèn xley’ farise no mèn co’ ngòc maistr co’ ndlu’ cón che’n ley co’ mxo’f Moisés loo mèn nación Israel tiempa, mèna ne’ndalte ngli Juàn bautizar mèna. Mèna mtè’b di’s no mxìis no mèna con’ co’ mblya’s Diox angli Diox loo mèna. 31 Tad Jesús ndxab loo mèna: â¿Xá nee gu’? ¿Chó con’ tetaquen mèn co’ nziri’ tiemp ndxè’, à’? ¿Chó con’ nac lalque’ xal mèn ndxè’, à’? 32 Nde niin thìb con’ loo gu’: Mèn co’ nziri’ tiemp ndxè’ lalque’ nac xal myen’ bix co’ nguith loo xbi’ co’se’ mbez yèe myen’, no ndxón’ myen’, no ndxecloo myen’ loo xtàa myen’. Mbez myen’ loo xtàa myen’: Daa mque dii loo flaut no ale ne’ngol’ niide gu’. Lomisque’, mbil’ ro bàanen loo gu’ no ne’ngxide lezo’ gu’ par ngón’ gu’. 33 Tataa nac gu’ tac co’se’ mbi’th que tee Juàn Bautist làth gu’, Juàn ne’nghuade pan axta plóthe xal ndxuhua chol mèn pan axta plóthe. No ne’ ne’ ngu Juàn vin axta plóthe xal ndxu chol mèn vin axta plóthe. Mbez gu’ loo xtàa gu’ cón che’n Juàn le’ Juàn mque no xpii che’n meexù’. 34 Ngoloa, ndalen, daa co’ mbal yáal làth gu’ xal ndxáal chol mèn. Na ndxuhua. No ndxun. Per ale mbez gu’ le’ daa ndxuhuacho’ pan no ndxucho’en vin. No ale mbez gu’ ndxàc amiu daa mèn co’ ndli cobrar cón che’n contribución no mqueltàan con mèn co’ ndxàp xquin no xtol. 35 Per yende chó mport nzo lezon cón che’n con’ co’ ndli gu’ xtùuz cón che’n Juàn no cón chenen tac mèn co’, lìcque’, ndxác, mèna nonque’ no naneeque’ mèna le’ con’ co’ ngue li Diox por cón che’n Juàn no por cón chenen nac con’ ndac. 36 Ngolo gunii Jesús di’sa, thìb mbi’ co’ ngòc mèn xley’ farise co’ ngua nee loo Jesús ya thuhua Jesús sa yèth liz mbi’ con mbi’, mbe’ mbi’ Jesús liz mbi’. No mdub no mbi’ Jesús loo mes. 37 Látha, mzin thìb xa’got ye’rsin’ co’ ngòp xtol co’ nzo ban leque le’n yèeza. Co’se’ mbìn xa’gota le’ Jesús nda liz mbi’ xley’ farise par hua no Jesús mbi’, ale negadi’s ngòo xa’gota liz mbi’ con thìb bote aceit perfum co’ natoxcua’ con quèe marm loo Jesús. 38 Ndxón’ xa’gota. Mbii gax xa’gota loo Jesús co’te’ mdub Jesús loo mes. Mtlo xa’gota, mtech xa’gota nii Jesús con nít loo xa’gota co’ ndxón’ xa’gota. Ngoloa, mtecui’s xa’gota nii Jesús con yis yéc xa’gota. Sya, msero xa’gota nii Jesús. Ngoloa, mtàa xa’gota aceit perfum co’ anze’f nazi’ ndlya’ nii Jesús. 39 Co’se’ ñèe mbi’ xley’ farise co’ ngua nee loo Jesús ya thuhua Jesús liz mbi’ con’a, mbli mbi’ xtùuz. Ndxab mbi’ loo lezo’ mbi’: Chele’ mbi’ ndxè’, lìcque’, nac thìb mbi’ co’ nde’th di’s co’ ndxab Diox, ngnon mbi’ no ngda’ mbi’ cuent chó nac xa’gota no chó loo xa’got nac xa’got co’ ngue gàal mbi’. Pues daa nanee le’ xa’got ba’ nac thìb xa’got ye’rsin’ co’ ndxàp xtol. 40 Sya, ndxab Jesús loo mbi’ xley’ farise: âMon, ndlyazen niin thìb con’ lool, cara. Mbi’ mcàb loo Jesús. Ndxab mbi’: âGunee U’i loon, Maistr. 41 Jesús ndxab loo mbi’: âNgo chop mbi’ co’ ngro’ te’f loo thìb mbi’ co’ ntechè tmi loo mèn. Thìb mbi’ ngro’ te’f casque’ thìb mil pes. Le’ tedib mbi’ na, ngro’ te’f casque’ thìb ayo pes loo mbi’a. 42 Ryop mbi’a ne’ngácte nguix tmi loo mbi’ co’ ntechè tmi loo mèn. Mblyat lezo’ mbi’ gunèe mbi’ ryop mbi’ co’ ngro’ te’f tmia. Mton’ mbi’ yalgute’f co’ ngro’ te’f ryop mbi’a. Per nalle’ lyazen ñeel loon, Mon, de loo ryop mbi’ co’ ngro’ te’fa, ¿chó mbi’a más mque’ lezo’ mbi’ co’ mton’ yalgute’f che’n ryop mbi’a, à’? 43 Mon mcàb loo Jesús. Ndxab Mon: âNdyaquen le’ mbi’ co’ mtechè tmia más ngulat lezo’ gunèe mbi’ co’ más ngro’ te’fa leque tedib mbi’. Jesús ndxab loo Mon: âLìcque’ con’ neel ba’. Yende cón niin lool. 44 Látha, xèe ngüi’ Jesús loo xa’gota. Ndxab Jesús loo Mon: â¿Ché’ ngue hui’l con’ ngue li no xa’got ndxè’ daa, à’? Anon ngòon lizl, ne’nda’del nít loon par ntechen niin. Per ndxe’leque’, xa’got ndxè’ mtech niin con nít loo xa’ co’ ndxón’ xa’. No mtecui’s xa’got ndxè’ niin con yis yéc xa’. 45 Ne’nserodel cuaten. Per xa’got ndxè’ anon ngòo xa’, thidteneque’ ngue sero xa’ niin. 46 Ne’ntàdel aceit yéquen xal nac mod co’ ndli mèn. Per xa’got ndxè’ mtegad aceit perfum co’ anze’f nazi’ ndlya’ niin. 47 Por cón che’n con’ co’ ngue li xa’got ndxè’ loon, anze’f ndlu’ xa’got ndxè’ nque’ lezo’ xa’got ndxè’ ñèe xa’got ndxè’ daa. Por con’ co’ ngue li no xa’got ndxè’ daa, ngue lu’ xa’got ndxè’ le’ xa’ non le’ Diox mton’le’ ryethe xquin xa’ no xtol xa’ co’ ngòp xa’. Lomisque’, ngue niin lool, Mon, le’ mèn co’ nden’ le’n lezo’ mèna indxàpte mèna xquin mèna no xtol mèna, no nden’ mèna inquinte mèna le’ Diox ton’ xtol mèna, mèna indlu’de nque’ lezo’ mèna ñèe mèna xtàa mèna. 48 Le’ sya, ndxab Jesús loo xa’gota: âNgot, mton’len xtol lùu, ndee. 49 Le’ mèn co’ ndxab Mon ya thuhua mèn sa lua’ liz Mon na, mèna nzi ndub no Jesús loo mes, ne. Mtlo mèna, mbez mèna loo xtàa mèna: â¿Xá nee gu’? ¿Chó mbi’ ndli mbi’ ba’ cuent nac mbi’ tac ale mbez mbi’ axta xtol mèn no xquin mèn nton’ mbi’? 50 Per Jesús ndxab loo xa’gota: âLùu mblyá’le’ loo ryethe con’ ryes tac ngola’sque’l loon. Nabe’ste byàa. Daa mblile’ le’ lùu nagàl yo lezo’ loo cón che’n Diox, ndee.