HECHOS 17

1 Co’se’ mdoo Pab ned nda Pab ryop Sil, ngua riid Pab ryop Sil le’n thìb yèezya’ co’ lèe Amfip, no nguri’th Pab ryop Sil le’n thìb yèezya’ co’ lèe Ampoloñ. Ngoloa, mzin Pab ryop Sil ciuda Tesalónica. Le’n ciuda Tesalónica ndub thìb sinagog che’n mèn nación Israel co’ naban le’n ciuda Tesalónica. 2 Sya, cad xon huiz co’ nac huiz descans, ndyee Pab ryop Sil co’te’ ndub sinagog mèn nación Israel xalque’ nac mod co’ ngue no Pab ryop Sil. Mdoodi’s no Pab mèn le’n sinagog le’n son sman. 3 Nambìi mda’ Pab cuent loo mèn xal ndub di’s co’ ndub loo libr co’ nac xti’s Diox le’ Crist mquinque’ mxactìi. No co’se’ ngolo nguth Crist, mquinque’ ngro xban Crist. Mbez Pab loo mèn, ne: âLeque cón che’n yub Jesús, co’ ngue tan cuent loo gu’ nalle’ nac cón che’n Crist tac Jesús nac Crist. 4 Co’se’ mbìn mèn nación Israel di’s co’ mblo Pab yalbàn, ngola’s mèn loo cón che’n Crist. No thidte mqueltàa mèn con Pab ryop Sil. Ngola’s huax mèn grieg co’ ndyub xib no co’ ncòo’ yéc loo Diox. Ngola’s huax mèngot co’ más nxyo’f lèe no nxyo’f xti’s làth mèna no co’ más ndyu’ làth mèna, ne, loo cón che’n Crist. 5 Co’se’ ñèe taamas mèn co’ nac mèn nación Israel ndxela’s huax mèn loo cón che’n Jesucrist, ngòo xyàn lezo’ mèna no mbyan lezo’ mèna. Mbli mèna mandad par mdyop ndxep mènbi’ ye’rsin’ co’ angnzi teexù’ le’n ciuda. Mbli ryete mèna par ngo too di’s làth mèn le’n ciuda. Mbli mèna ngòc nguàal con’ liz Jasón tac mbli mèna xtùuz liz Jasón nzo casloo Pab ryop Sil. Mblya’s mèn ngo’ mèn Pab ryop Sil tya par ta’xù’ mèna Pab ryop Sil loo xtàa mèn par guth mèn Pab ryop Sil. 6 Per mastale’ ngua cua’n mèn Pab ryop Sil liz Jasón, ne’ngzalte mèna Pab ryop Sil liz Jasón. Ale le’le’ Jasón mdo’fxax mèna. Mbe’ mèna Jasón loo mèn nac zin’ co’ nac mèn nac zin’ che’n ciuda Tesalónica. Mbe’ mèna ndxep mèn co’ ndxàc hues por cón che’n Jesucrist loo mèn nac zin’, ne. No mbez yèe mèna. Mbez mèna: âMèn ndxè’ nac mèn co’ ngue li ngòc nguàal con’ dib athu loo izlyo’. Nalle’ nde mèn ndxè’ axta par nedrè’, ne. 7 No nde nxon’, mda’ Jasón liz Jasón par nguled mèn. Ryete mèn co’ ndxela’s xal ndxela’s mèn ba’ mbixyath. Ya indlide mèn ba’ cas xal nac di’s co’ ndub loo ley che’n gobiern co’ ñibe’ mèn ciuda Rom che’n nación Ital. No más de cona, mbez mèn ba’ nzo tedib rey co’ más ñibe’ loo mèn. Reya mbez mèn ba’ lèe Jesús. 8 Texal mbìn mèn nac zin’ di’sa, no mèn co’ mqueltàaa, nguátbèe mèna contra mèn co’ ndxela’s loo cón che’n Crist. 9 Per Jasón no taamas mèn co’ ndxàc hues por cón che’n Jesucrist mdoo thìb mbi’ par gunii mbi’a por cón che’n Jasón, no cón che’n mèn co’ ndxàc hues por cón che’n Jesús, par mblá’ mèna Jasón no mèn co’ ndxàc hues. Sya, mbla’ mèn nac zin’ ndyàa Jasón con mèn co’ ndxàc hues por cón che’n Jesucrist. 10 Luega hora, mèn co’ ndxàc hues por cón che’n Crist mbli par mbii Pab ryop Sil le’n ciuda Tesalónica leque yál’a. Nda Pab ryop Sil par thìb yèez co’ lèe Berea. Luega tedib huiza ngua Pab ryop Sil sinagog che’n mèn nación Israel co’ nzo ban le’n yèeza. 11 Mèn nación Israel co’ nzo ban le’n yèez Berea ngòc más mèn nado’ leque mèn nación Israel co’ nzo ban le’n ciuda Tesalónica. Mèn nación Israela dib nzo yéc no dib nzo lezo’ mdyal mèna mbìn mèna di’s cón che’n di’s ndac co’ mblo Pab yalbàn. No atate huiz mcua’n mèna di’s loo libr co’ nac xti’s Diox par li la’s mèna ñeene’ ché’, lìcque’, nac di’s co’ ngo Pab yalbàn loo mèna. 12 Pues, huax mèn ngola’s loo cón che’n Jesucrist por mbli la’s mèn lìcque’ nac di’s co’ ngo Pab yalbàn. No leque tiempa, ngola’s huax mèn nación Grieg co’ nac mèn yèez Berea no ngola’s mèngot co’ ndyu’ loo mèn no ngola’s mènbi’ co’ ndyu’ loo mèn, ne. 13 Per co’se’ mbìn mèn nación Israel co’ nzo ban ciuda Tesalónica le’ Pab ngue go yalbàn co’ nac di’s ndac che’n Diox loo mèn yèez Berea, ngua li mèn nación Israel par ngòc ngòc nguàal di’s loo mèn yèez Berea par nguátbèe mèn yèez Berea contra Pab ryop Sil. 14 Per mèn co’ ndxàc hues por cón che’n Crist lueg lueg mtel’ Pab par ya Pab par cost, co’ nee di’s, par ned ro níttó’. Le’ Sil ryop Timote na, mbyan’ yèez Berea. 15 Mèn co’ ndxàc hues por cón che’n Jesús co’ mblyath no Pab par nda Pab par cost, mèna mbe’ Pab axta ciuda Aten. Lueg mbere mèna, ndye’th no mèna di’s co’ ndxab Pab loo mèna par ta’ mèna cuent loo Sil no loo Timote par ya sál’ Sil ryop Timote Pab le’n ciuda Aten. No luega tyee Sil ryop Timote xal ta’i lugar loo Sil ryop Timote. 16 Láth ngue bed Pab zin Sil no Timote le’n ciuda Aten, anze’f nxi lezo’ Pab no imbe see teede lezo’ Pab por ñèe Pab anze’f thìb mdo’ no gunab ngue no mèn ciuda Aten. 17 Por cona, mdoodi’s no Pab mèn co’ nac mèn nación Israel le’n sinagog mèna. No ndyoodi’s no Pab mèn co’ ndyub xib no co’ ncòo’ yéc loo Diox. No atate huiz ndryo’ Pab par ndyoodi’s no Pab mèn loo xbi’, mèn co’ nzyál’ Pab par neda. 18 Ngo ndxep mèn co’ mbli stud cón che’n thìb xley’ co’ ngòc xley’ che’n thìb mbi’ co’ ngro’ lèe Epicur no taandxep mèn co’ mbli stud cón che’n thìb xley’ co’ ngòc xley’ che’n thìb mbi’ co’ ngro’ lèe Stoic. Mèna mtlo mdoodi’s no xtàa mèna cón che’n Pab. Ndxab ndxep mèna loo xtàa mèna cón che’n Pab: âNda toodi’s no na’ mbi’ ba’ ñeene’ cón ñee mbi’ loo na’. Mbi’ ba’ axta arid ndyoodi’s. Taandxep mèna mbez: âNdyac na’ mbi’ ba’ ndyoodi’s cón che’n tedib Diox co’ tarte libe’ na’. Tataa mbez mèna tac Pab ngo yalbàn cón che’n di’s ndac co’ nac co’ ndlu’ cón che’n Jesús. No ngo Pab yalbàn le’ mèn co’ nguth ryo xban. 19 Sya, mbe’ mèna Pab thìb lugar co’ lèe Areopag co’te’ mque no mèna costumbr par queltàa mèn par co’x mèna loo xtàa mèna no tub rez mèn cón che’n con’ roo con’ xèn co’ ndxàc loo xtàa mèn no làth xtàa mèn. Tya, mnibdi’s mèna loo Pab. Ndxab mèna: âMbi’, ¿ché’ nzo mod gòn nu’ cón che’n di’s cub co’ ndyoodi’sl loo mèn ba’ par ta’ nu’ cuent xá naca, à’? 20 Tac di’s co’ ndyoodi’sl loo mèn tarte gòn nu’ di’s ba’ thidtene. Cona, ndlya’s nu’ ta’ nu’ cuent cón nee ryethe di’s co’ ndyoodi’sl ba’. 21 Tataa ndxab mèna loo Pab tac mèn co’ nac mèn ciuda Aten no taamas mèn tith co’ nzo ban le’n ciuda Aten, mèna yende chó zin’ ndli. Ante nzi mèna par gòn mèna chol di’s co’ ndxòn mèn ndyoodi’s tedib mèn no par gòn mèna cón che’n chol con’ cub co’ ndxàc. 22 Sya, mdoo Pab loo mèn lugar co’te’ lèe Areopag. Ndxab Pab loo mèna: âMèn ciuda Aten, ngüi’en no ndan cuent axta arid mènley’ nac gu’ loo chol con’ co’ mbez gu’ nac Diox. 23 Tac co’se’ mque tee’en le’n ciuda gu’, huax con’ gunèelen xá ndxác gu’ ndli gu’ cas loo huax con’ co’ mbez gu’ no ndli gu’ cuent nac Diox gu’. No gunèen thìb còo’ co’te’ ndub di’s co’ mbez: Con’ ndxè’ nac còo’ che’n thìb Diox co’ tarte libe’ mèn. Hui’ gu’ nexa. Yende cón niin loo gu’ cón che’n di’sa. Huenque’ mbez di’sa. Pues Diox co’ tarte libe’ gu’, lèepe’ Dioxa nac di’s co’ ndub loo còo’ co’te’ ndub Diox gu’. No cón che’n Dioxa nac co’ tan cuent loo gu’ tac, lìcpe’ ba’i, gu’ tarte libe’ Dioxa. 24 Diox co’ mxèn’ izlyo’ no co’ mblec izlyo’, Diox co’ ngue xèn’ rye loothe con’ co’ nziri’ loo izlyo’, Dioxa ñibe’pe’ loo bé’ no loo izlyo’. Dioxa inzo bante le’n gudo’ co’ ntoxcua’ ya’ mèn. 25 Inquinte lyath no mèn Diox loo chol con’ co’ ndli mèn cuent nde che loo Diox. Yende chó con’ ndxàc falt loo Diox thidtene. Ndxe’leque’, yub Diox ndli par nzi ban na’ loo izlyo’ ndxè’. No ndli Diox par ngue xèn’ Diox na’ loo izlyo’ ndxè’. No mbli Diox par ngure taamas con’ co’ nziri’ loo izlyo’. 26 No thidte ren, no thidte bél’, no thidte zith mbli Diox par mxèn’ Diox mèn par cue ban mèn rye nación dib athu loo izlyo’. No mbli Diox ngure thìb thìb nación dib athu loo izlyo’ co’se’ ngòc lín’ no tiemp co’se’ ngure thìb thìb nación co’te’ ngòc lugar co’ nziri’ thìb thìb nación nalle’. 27 Tataa mbli Diox loo mèn dib athu loo izlyo’ par bel’que’ ngác ncua’n mèn Diox thìb mod tedib mod axta ngzal Diox loo mèna. Tac, lìcpe’ ba’i, itithte nzo Diox loo thìb thìb na’. 28 Loo Diox nzi ban na’. No ndli Diox nquée ndlyàa na’ loo izlyo’. No ngue xèn’ Diox na’ loo izlyo’ ndxè’ xal mbez di’s co’ ndxab ndxep mèn co’ nzo làth gu’ co’ ntoxcua’ di’s che’n thìb discurs co’se’ ndlab mèna ye’s che’n discurs. Mbez mèna: Nac na’ mèn guliz Diox. 29 Le’ sya, chele’ na’ nacque’ mèn guliz Diox, indxàalte li na’ xtùuz le’ Diox nac thìb gunab co’ natoxcua’ con or, co’ natoxcua’ con plat, co’ natoxcua’ con quèe, co’ nac con’ co’ ntoxcua’ mèn xal alithe ndye’th xtùuz yéc mèn. 30 Diox mbli xal mèn co’ ne’ñeede co’se’ ngòc tiemp co’se’ ngure mèn nau’ yéc nau’ loo mèn. Per nalle’ Diox ñibe’ loo mèn dib athu loo izlyo’ le’n tiemp ndxè’ par lyàa yéc mèn no lyàa lezo’ mèn no se’ mèn mod co’ ndxàp mèn loo Diox par lyá’ mèn loo con’ ryes. 31 Tac Diox mcui thìb huiz co’ gàc thìb huiz co’se’ nalìte no nambìite tub rez Diox cón che’n ryete mèn, que naca naban mèn, que naca nguth mèn. Gàc con’a loo mèn por cón che’n thìb mbi’ co’ mcui Diox no co’ mblo’ xà’ Diox par tub rez mbi’a cón che’n ryethe mèn. No mblu’ Diox loo na’, lìcque’, tub rez Diox cón che’n mèn por cón che’n mbi’a, tac mbli Diox ngro xban mbi’a làth mèn nguth. 32 Co’se’ mbìn mèna le’ Pab ndxab le’ mèn nguth ryo xban, ale mxìis mxyán’ ndxep mèn. Le’ taamas mèna ndxab: âMás huen gòn nu’ di’s co’ ngue toodi’sl ba’ tedib huiz tac ya ngo tacle’ lezo’ nu’ nzi yòn nu’ tant di’s co’ ndyoodi’sl ba’. Ngo zanle’ nu’, ne. 33 Sya, mbla’ Pab, ndyàa mèna. 34 Per làtha ngo ndxep mèn co’ mqueltàa no Pab. No ngola’s mèna di’s co’ mdoodi’s Pab cón che’n Jesucrist. Làth mèna ngo thìb mbi’ co’ ngro’ lèe Nich. Mbi’a ngòc thìb sos co’ nqueltàa no mèn co’ nqueltàa co’te’ lèe Areopag. No ngo thìb xa’gota làth mèna, ne, co’ ngro’ lèe Damars. Ngo taamas mèn làtha, ne, co’ ne’needen chó lèe.