MASMUR 67

1 Ransyeran Masmur. Nto irati akari po vatano matayao ukiny maugavo ransyerane rai ai. Ukinyo rai, wo itari raeyan dai. 2 Reamare Amisye winaemeno reansai muno Nyo kove raugaje reansai, reamare Nya kove mbaro reansai. 3 Wirati vatano mine tename so wo Nya mbekere raen, muno susye kotar tenambe wo raen, Winyirati Nyo mapaya kakai rai. 4 Amisy, reamare susye kotare wo kove raura seo Winai, reamare susye tenambe wo kove raura seo Winai. 5 Reamare vatan tenambe mine so manayanambe muno ukiny mananibe. Weye Winyi mbe akarive susye kotare mai tenambe mamaisyo Nya moyare rai, muno Nyo vatan tenambe mine so maugavo mavabe. 6 Amisy, reamare susye kotare wo kove raura seo Winai, reamare susye tenambe wo kove raura seo Winai. 7 Kopa so mo ama anare ntuna raije ama ine rauguje to, Amisy, Opirati wama Amisy, Po kove raugaje wansai to. 8 Amisye Po kove raugaje wansai to; koveamo susyo ntuna no mine tename so ubeaje Ai.