Kap 125

1 Mɨŋat amɨnyo egɨp egɨpni Yawekon tosok yaŋsi nandaŋ amɨn uŋun Saion Kabap yombem. Kabap uŋun dɨma nɨmnɨmɨgek tebaisi tokdɨsak. 2 Ɨleŋ da Jerusalem aŋgwasɨŋek toŋ uŋun da tɨlak Yawe da abɨsok ae don paŋgwasɨŋek mɨŋat amɨni kɨlani akdɨsak. 3 Amɨn yokwi da amɨn kɨlegɨ dakon mɨktɨm toktogɨ kɨlani dɨma ani. Yaŋ ani kaŋ, amɨn kɨlegɨ yokwi akdaŋ. 4 Yawe, amɨn tagɨsi butni kɨlegɨ uŋun amɨnon aŋpak tagɨsi aŋyobi. 5 Mani mɨŋat amɨnyo iyɨ dakon aŋpak yokwini yolek aŋ, uŋun yo yokwisi aŋ yobi. Yokwi pakpak amɨn do yo yokwisi aŋ yobi. Israel amɨn yaworɨ tagɨ egɨpni.