MINKUNGA 64

1 Wungwa, a Nzambi, bu ndilembo wakikisa maniongo mama keba luzingu luama va ntuala mbeni yoyi ndieti mona tsisi ! 2 Wutsueka mu zikhanu zintotukilanga mu lukutukunu lu nsueki lu batu bambimbi ayi mu lukutukunu lu nkangu wu batu bamvanganga mambimbi ; bobo badi bulawu. 3 Balembo bengula ludimi luawu banga sabala ; bantotulanga mambu mawu banga madionga meti vonda. 4 Beti lozila bu badi mu bibuangu bisuama mutu kambulu zaba diambu Beti kunlozila mu kinzimbukila, mu kambu mona tsisi. 5 Beti kukikindisa mu zikhanu zimbimbi ; beti tubana mu diambu di batamba mintambu miawu, Beti kamba : “A nani wela mimona e ?" 6 Beti yindula mambu makambulu masonga ayi beti tuba : “Tukubikidi lukanu lu fuana.” Bukiedika, mayindu ma tsi ntima ayi ntima wu mutu thipula bidi. 7 Vayi Nzambi wela kuba lozila madionga mandi mu kinzimbukila bela. 8 Wela balula ludimi luawu veka mu diambu diawu ayi kuba nata ku mbivusu babo bela kuba mona bela nikuna ntu. 9 Batu boso bela mona tsisi, bela yamikisa mavanga ma Nzambi ; ayi bela sudika momo kavanga. 10 Bika mutu wusonga kamona khini mu Yave ayi katombila suamunu mu niandi ayi babo badi mintima mi lulama banzitisa.