IMƐƐY 12

1 Idiim mwɛy kyàkölàköl kyàmɛnà u du: un’kaar mwɛy wàŋàbwaar taaŋ kàkäl anà nsöŋ ungyɛl a in’kɔl anà mpà a imwol a mbwaar kwem aŋiyweel udu a un’tswe. 2 Nde kàlàbɔr mwan, waa nde kàsyee in’kwɛŋ ntɔn in’swaŋ. 3 Apan, idiim asin kyàfàmɛnà u du: dalàgɔ a kölàköl làŋɔɔ làkäl amyà in’tswe nsambwaar anà mbwaŋ kwem, anà mpà a imwol udu a un’tswe umwɛy umwɛy. 4 Nde kàköŋà anà un’kyel ande ndam mwɛy amu ndam tär yà mbwaar a du, waa kàtɔɔm ya u mɛɛn. Nde kàmbär kusà a un’kaar awà kàlàbɔr, ntɔn mudyà mwan ande pa uyàtoo wa. 5 Kyekà, un’kaar awà kàbör mwan baal, awà asàkal un’kyɛɛŋ a in’sɛŋ myanswà anà un’aŋ a ibeenà. Mwan ande bun’syen akà Nzam anà akà kir ande là imwol. 6 Apan, un’kaar awà kàtiin u nsye a ipɔl, kà ikal kun’lɔ̈ɔ̈n Nzam ntɔn bun’dii kwo ilä nsaab mwɛy a nkam yweel a an’kwem an’syaam. 7 Apan, ità mwɛy kyàkyer asɛmà u du. Mishɛl anà akyeey ande bànwään anà Dalàgɔ. Dalàgɔ sye anà akyeey ande kànwään anà ba. 8 Wɛɛ dalàgɔ kàböŋ anki. Mishɛl anà akyeey ande bàkyer aböŋ u du. 9 Ipfür a dalàgɔ bun’tɔɔm u nsà. Wa wà ntäy wà itaan, bàfàbel naa ileŋ anà Satanà, awà afàlwab baar banswà. Wa bun’tɔɔm u mɛɛn, mbwo mwɛy anà akyeey awa. 10 Ungö apan, mɛ kàwem ndaa mwɛy yàngwal u du, yàmutɛn naa: « Lalà là taaŋ a ngweel a mɔ̈ɔ̈, là unkaak a ngwal anà là imwol a Nzam abi! Apanà ikɔ̈b kyà kà an’kɔɔ a Klistɔ ande. Ntɔn nde kàtɔɔm un’füün a atɔŋ abi u nsà, nde mbuur kàfüünà ba kusà a Nzam abi, mpib anà mwäänà. 11 Wɛɛ atɔŋ abi bàwɛl iböŋ udu a wa u mbwo a an’kil a mwan a un’kɔk anà u mbwo a ndaa bàtɛɛl ba imbäl. Ba bàkɔɔb mɔ̈ɔ̈ aba, ba bàkyey ukwà. 12 Kyakin, wɛy un’sak ukäl u du. Wɛy bɛ baar làfàkal u du làsäŋ! Wɛɛ ngyɛb akà bɛ u mɛɛn anà u ngyäl! Ntɔn ileŋ kyan’yàtyà akà bɛ, kyàŋàyɔl a un’fur a nkyɛl: Kya ikyàyöb naa taaŋ akya lan’sal ikikye. » 13 Mpal làmɛn dalàgɔ naa bàmutɔɔm u mɛɛn, laa làkàlab la un’kaar awà kàbör mwan baal. 14 Wɛɛ un’kaar kàwɛl an’paab, an’paab mɔ̈ɔ̈l mà nɛn a kölàköl ntɔn mufumà tii kà ikal bàlɔ̈ɔ̈n ntɔn nde u nsye a ipɔl, ntɔn bun’dii kwo mbul tär anà ndam, ukwɛl anà mii a ntäy. 15 Apan, ntäy kàlwe an’dà mbɔɔn asànaa mwɛy a kölàköl ungö a un’kaar, ntɔn ibɔ byun’syen. 16 Wɛɛ mɛɛn màyi mubay un’kaar: ma màduub mun ama anà mamin ngyäl awà kàlwe dalàgɔ. 17 Uboo a un’fur a nkyɛl a dalàgɔ akà un’kaar, la làkànwaan a ndam a baan a un’kaar yasäl, ba baar bàfàlab nswɛɛŋ a Nzam anà bye anà imbäl a Yɛsu. 18 Ungö apan dalàgɔ làkàmbar kà un’kɔɔl a ngyäl.