MALAKƆ 11

1 Mpal bàtɔ̈l ba tsütsü a Yɛlusàlɛm, tsütsü a Bɛtfagɛ anà Bɛtani, mper a mɔŋ a In’te a Ɔlive, Yɛsu kàtöm abööl uboo alɔŋki ande, 2 waa kàtɛn a ba naa: « Làkyen u bul lanà kusà a bɛ: Pa làkàbilà bɛ uboo a la, bɛ làkàman mwan a ntsür bàfàbel naa anɛs, udu awa mbuur ŋàtàlaar anki. Làtsuuŋ wa, lan’twääl awà. 3 Isàkal naa mbuur kan’tɛn a bɛ naa: “Ntɔn nkye làkyerà bɛ abun?” Lun’fuur naa: “Mwol we anà mfun a wa, waa làgyägyä nde ayàfuur wa apà.” » 4 Apan, ba waa bàkyen, waa bàmɛn mwan anɛ wàŋàbäm u nsà tsütsü a munàmbwo, u balàbal. Ba bàtsuuŋ wa. 5 Baar amwɛy bàkäl paa bafuul naa: « Ntɔn nkye làtsuuŋà bɛ mwan anɛ? » 6 Ba bafuur asànaa kàtɛn Yɛsu, ba waa bawɛy musyen wa. 7 Ba bàsyen mwan anɛ akà Yɛsu, waa bàyeel ipfɛy aba udu a wa, Yɛsu waa kàbwaay udu a wa. 8 Baar mbɔɔn bàyeel ipfɛy aba u mbwo, bumwɛy ibwiy a nkay bàtsüülà ba kan’ywaŋ. 9 Baar bàyikyeenà kusà anà baar bàyilabà bàkäl muyisà in’kwɛŋ naa: « Ɔsana! Nsaak ikäl akà mbuur ayà kikɔb a Mwol! 10 Nsaak ikal kà imwol kyan’yà, imwol a taaràbi David! Ɔsana kà ikal a dudu! » 11 Yɛsu kàkyen Yɛlusàlɛm, waa kàbilà u ndwà a Nzam. Ungö muler indiir byanswà byàkäl apà nde, taaŋ sye làkäl làŋàkyà, waa kàtoo, kàkyen Bɛtani anà Bàkwem Aŋiyweel. 12 Taaŋtyà, umpal bàtoo ba u Bɛtani, Yɛsu kàwen ngyal. 13 Apan waa kàtääl un’te a an’fige kàkäl anà nkay, nde kàkàler wa naa nkye nde akyàman undiir mwɛy. Wɛɛ mpal kàsin nde tsütsü, nde kàmɛn nkay mpɛl, ntɔn la làkäl anki paŋà a an’fige. 14 Lalan kàtɛn nde a wa naa: « Wɛy mbuur mwɛy ukɔɔn asàdyà imbɛŋ angye akà ikikye! » Alɔŋki ande waa bàwem. 15 Ba bàtöl Yɛlusàlɛm. Yɛsu kàbilà u ndwà a Nzam, waa kàsɛmà muböŋ baar bàyäälà anà bàsöömà u ndwà a Nzam: nde kàbuum mɛsà a agyɛɛŋ a ngim anà an’kir a ayääl a nkokà, 16 nde kàwɛy anki akà mbuur mwɛy mulyaaŋ anà undiir u ndwà a Nzam. 17 Nde kàlɔɔŋà, waa kàtɛɛnà a ba naa: « Nkye bàsön anki naa: “Ndwà amɛ bàsabeelà ndwà a ngyamàkà ntɔn in’sɛŋ myanswà”? Wɛɛ bɛ, bɛ ya làkyàbuul mboo a mbüüb! » 18 Amfum a angaŋ anà alɔɔŋ a in’kɔɔn bàwem ba ndaa ayin, ba bàleŋà mbwo mukun’dwa. Ntɔn ba bun’weemà bɔɔmà, ntɔn an’lɔɔŋ ande màtü un’sɛŋ a baar. 19 Mpal làbü sisye, Yɛsu anà alɔŋki ande waa bàtoo u bul a kölàköl. 20 Mpal bàkal ba mulyaaŋ u tutu, ba bàmɛn un’te a an’fige wàŋàyɔm tii kà in’swɛy awa. 21 Petɔlà kàyɔbà nde, laa kàtɛn nde naa: « Un’lɔɔŋ, ler, un’te a an’fige akwà kàküül ngye kan’yɔm wanswà. » 22 Yɛsu kafuur naa: « Làkäl anà làkwikilà akà Nzam. 23 Ndandaa mɛ alàkyään, isàkal naa mbuur kan’tɛn a mɔŋ wà naa: “Lwomà apan, kyen kàbü u ngyäl”, ukɔɔn asà nkyɛɛr u mpem ande, wɛɛ nde usi làkwikilà naa ndaa kan’tɛn nde ikyer akwo, ya sye laa isàkwo ya ntɔn nde. 24 Lalan mɛ alàkyään naa: indiir byanswà làlɔm bɛ unsà ngyamàkà, làkäl anà làkwikilà naa bɛ bya lan’wal, bya byàbɛ. 25 Umpal làwà bɛ umbäär u ngyamàkà, isàkal naa bɛ làwe anà nkir a mbuur, lun’dwääl nkul, waa Taaràbɛ awà u du uyàladwääl sye nkul a ibii abɛ. [ 26 Wɛɛ bɛ làsàkɔɔn adwääl nkul a ibii, Taaràbɛ awà u du uyàladwääl anki sye nkul a ibii abɛ. ] » 27 Ba ban’yàfurà Yɛlusàlɛm. Umpal kàkäl Yɛsu muyiyoolà uboo a ndwà a Nzam, amfum a angaŋ, alɔɔŋ a in’kɔɔn anà andweer bàyàsin apà nde, 28 waa bàtɛn a nde naa: « Unsà ikɔ̈b nà akyerà ngye indiir abi? Itàkal naa nà kapɛ ikɔ̈b mukyer bya? » 29 Yɛsu kàtɛn a ba naa: « Mɛ alàsà mfuul mwɛy mpɛl, lan’fuur, waa mɛ in’yàtɛn a bɛ naa unsà ikɔ̈b nà mɛ in’kyerà indiir abi. 30 Nkye ndüümà a Ywan yàfü du lɛɛ akà baar? Lan’fuur! » 31 Ba bàyweerà ba a ba naa: « Kya bi isàtɛn naa: “U du”, nde ayifuul naa: “Ntɔn nkye mpa lun’si bɛ làkwikilà?" 32 Wɛɛ, nkye bi itɛn naa: “Akà baar”…? - Ba bàtiinà un’sɛŋ a baar bɔɔmà, ntɔn ba banswà bàsii naa Ywan kàkäl ŋangɔɔm ndandaa. » 33 Lalan bàfuur ba akà Yɛsu naa: « Bi iyöb anki. » Apan Yɛsu waa kàtɛn a ba naa: « Mɛ sye alàkyään anki unsà ikɔ̈b nà mɛ in’kyerà indiir abi. »