NGALÀTYÀ 1

1 Pɔl, ntööm, kà unsà ngwal a baar itàkal u mbwo a mbuur mwɛy anki, wɛɛ u mbwo a Yɛsu Klistɔ anà Taa Nzam awà kun’wiiy uboo a akü, 2 anà atɔŋ banswà abà anà mɛ, mɛ an’pà mbɔr akà Ikööŋ abyà u Ngalàtyà: 3 Wɛy kab a ngway anà duu a Taaràbi Nzam anà Mwol Yɛsu Klistɔ byàkäl anà bɛ. 4 Klistɔ kàpɛ mɔ̈ɔ̈ ande ŋakwo ntɔn man’be abi, ntɔn mukigyɔɔr u mɛɛn an’be mà, unsà ukwen a Nzam, awà Taaràbi. 5 Wɛy làkoo làkäl anà nde mbul a in’tye! Wöwöö. 6 Mɛ in’wà unsà ubem muman naa bɛ làbà nswɛy musàkɔɔb mbuur awà kàlabel u mbwo a kab a ngway a Klistɔ, ntɔn mulab Làsaŋ Aŋàbwaŋ lànsöön. 7 Ŋaa, Làsaŋ Aŋàbwaŋ asin lànsöön latɛy, wɛɛ bà anà baar uboboo abɛ bàkwen mukàlatwääl lingyoomà anà musɔɔm Làsaŋ Aŋàbwaŋ abar là Klistɔ. 8 Wɛɛ ŋàbawà, isàkal naa we anà mbuur mwɛy, itàkal bi, itàkal sye naa un’kyeey kan’fà du, kàmàlakyään Làsaŋ Aŋàbwaŋ lànsöön anà la akwà kàlakyään bi, wɛy ŋakaan kun’käär! 9 Bi kàkyàtɛn ya itaan, mɛ ya an’fàtɛn apanà naa: isàkal naa we anà mbuur mwɛy kan’yà mukàlakyään Làsaŋ Aŋàbwaŋ lànsöön anà la akwà làwɛl bɛ, wɛy ŋakaan kun’käär! 10 Ntɔn, apanà, nkye mɛ in’wàmuleŋ ubwaŋ akà baar lɛɛ akà Nzam? Naa nkye, mɛ in’kwen musà làbɔ̈ɔ̈n akà baar? Ilàkal naa mɛ alàkwen musà làbɔ̈ɔ̈n akà baar, mɛ alàfàkal anki un’syääl a Klistɔ. 11 Ntɔn, atɔŋ, mɛ alàkyään naa: Làsaŋ Aŋàbwaŋ kàlakyään mɛ, la kà là an’kyän a mbuur a mɛɛn anki. 12 Ntɔn la kà mbuur kan’pɛ anki, itàkal naa mbuur kan’lɔ̈ɔ̈ŋ, wɛɛ u mbwo a imɛɛy a Yɛsu Klistɔ. 13 Ntɔn, bɛ làkyàwem itaan nkääl kàkäl mɛ ayà uboo a iyudà: naa sye un’fur a nkyɛl nà mɛ kàkäl awà, umpal kàmɛɛyà mɛ Ikööŋ a Nzam nkwaaŋ ntɔn mupay kya. 14 Mɛ, mɛ kàkyen usà unsà iyudà, mulyaaŋ bàmbɔɔn uboo a nkööl amɛ anà uboo a làfuun amɛ u mbwo a un’kanà amɛ ntɔn nkääl a ankaa amɛ. 15 Wɛɛ Nzam, unsà kab a ngway ande, nde kan’sɔ̈ɔ̈l fà an’bäl a maa anà kan’bel mukun’syääl, nde kàmɛn naa yà ubwaŋ 16 nde kan’mɛɛy Mwan ande, ntɔn mɛ in’kyään Làsaŋ Aŋàbwaŋ ande akà baar mpa abà Ayudà, ukɔɔn alab an’lwɛŋ a mbuur, 17 itàkal mubeenà Yɛlusàlɛm ntɔn mukàbweey anà baar abà bàbulà antööm kusà a mɛ, mɛ kàkyen Arabi. Ungö apan mɛ kàfurà Damas. 18 Ungö a mbul tär, mɛ kàbeenà Yɛlusàlɛm ntɔn mukàbweey anà Petɔlà. Mɛ kàkyer ilä kwem aŋityeen apà nde. 19 Mɛ kàmɛn anki ntööm asin, nà Zyak mpɛl, un’tɔŋ a Mwol. 20 Ya amàlasöön mɛ yi, mɛ an’tɛn u mii a Nzam, kà loor anki. 21 Apan, mɛ kàkyen itiir a Silya anà Silisi. 22 Wɛɛ Ikööŋ a aklistɔ abyà u Yuday byàyöb anki ntabwey amɛ. 23 Bya byàwem mpɛl naa: « Mbuur akwà kàyimɛɛyà bi nkwaaŋ sɛmà itaan, ŋàbawà nde wàmuyilɔɔŋ làkwikilà alà kàsi nde muküünà mudwa la. » 24 Wɛɛ bya byàsyee Nzam làkoo ntɔn mɛ.