1 YWAN 1

TSC

‹ Chapter 0 1 YWAN — All Chapters Chapter 2 ›

1 Ndaa ifàpà mɔ̈ɔ̈ yàkäl fà nsɛmà. Bi kàwem ya. Bi kàmɛn ya u mii abi ŋakwo. Bi kàsyeebà ya, anà an’kɔɔ abi màbä ya. 2 Ntɔn mɔ̈ɔ̈ kàkyer ayàmɛnà, anà bi kàkyer un’man, bi kun’tɛɛl imbäl anà bi kàlakyään mɔ̈ɔ̈ a mbul a in’tye awà kàkäl apà Taa anà kàyàmɛnà ntɔn bi. 3 Ndaa kàmɛn bi anà kàwem bi, bi ikyäänà ya akà bɛ sye, ntɔn bɛ sye làkäl unsà un’tüüb anà bi. Kyekà, un’tüüb abi wà un’tüüb ibà bi awà anà Taa anà Mwan ande Yɛsu Klistɔ. 4 Isàkal naa bi kàlasöönà indiir abi, yà ntɔn un’sak abi ukäl wàŋàkwo. 5 Le làsaŋ kàwem bi akà Yɛsu Klistɔ anà ikàlakyäänà bi: Nzam wà pɛɛlà, anà amu nde làpib latɛy. 6 Isàkal naa bi iswaŋà ngaal naa bi ibà un’tüüb anà nde, wɛɛ mɔ̈ɔ̈ abi wà unsà làpib, bi ibà baar a loor, bi ifàsyääl anki ndandaa. 7 Isàkal naa mɔ̈ɔ̈ abi wà uboo a pɛɛlà, asànaa nde ŋakwo wà uboo a pɛɛlà, bi ibà uboo un’tüüb bi a bi, anà an’kil a Yɛsu, Mwan ande, màfàpöŋ man’be abi manswà. 8 Isàkal naa bi iswaŋà ngaal naa bi man’be matɛy, bi ban’bwiy bi ŋàkwo ndwaŋ, anà ndandaa yatɛy amu bi. 9 Wɛɛ, isàkal naa bi ban’kyey man’be abi, Nzam wà lää anà balàbal: nde asidwääl man’be abi anà asipööŋ unsà indiir byanswà mpa abyà balàbal. 10 Isàkal naa bi ikyeyà uyɔl naa bi man’be kàkyer anki, bi bun’buulà mbuur a loor, anà ndaa ande yatɛy amu bi.

‹ Chapter 0 1 YWAN — All Chapters Chapter 2 ›

1 YWAN 1

Cite / Share This Page