Tpyuu 15

1 Nyepênyepê u kópu ndîî u danêmbum mêuu ala, kópuni mbóó pêuu nî módu. Enjel pyudu yi danêmbum, nêii knî yêoo yoo yi kpadakpada u mbwaa dêââ pyudu a tpyé têoo, Chóó Lémi yélini ye a nodêenodêe yédi, yi ngwo dêudêumbiyêe wa kpada têoo, Chóó Lémi u nodêenodêe chedê ngê u ngwo amê pyódu ngmê. 2 Enjel yoo ghêlî kêii dîpî mêuu too, yi ngwo ntii ntee tpile ngmênî módu, kââyikuu yedoo kwo, ndê dóó u mênê dnye kwo. Yoo myêoonî módu, yélini tpile tpêoo ngê daa dyênê too. Tpile tpêoo nêii u pi wono yono yêa mê wonoyêa mê wéni (666), ala yéli u pwo lee dniye, u yâpwo tpile ka myedêdnye ngêpê. Ntii ntee tpile u nkîghêê dnye kwo, nmî Mî chaa kîgha u lêêê dîyêo wéti u tpile dnye tpyé dé. 3 Dini ghi nêii ngê nmî Mî u dpodo pyu Mósisi ngê Yisîléli tpémi Yichip u mênê a pwêii too, Ntii Mtyemtye mî ngmêê ngópu, yi ngwo ntee dnya a wéti, yélini nî módu, yinté myednye wéti. Sipi tpêoo u pi mbêmê nmî Mî dnye chaa kîgha, kópu, Nmî Lémi, nmî Yâpwo, ṉgwêdêwêdî ntâkopádi. Kópu, Kópu ndîî nêii nye dêuudêuu too, nyepênyepê u kópu dé. Kópu, Nyi pi dyêêdî yintómu yi king. Kópu, Ṉgópu yilî yintómu ndê kópu dé, dono kópu choongmê dêuu ngê. 4 Kópu, Nmî Lémi, pi yintómu knî yêoo adnyi chââchââ ngi, m̱i mudu yêi adnyi kmîmî, mu kópu u dîyêo nyi ntee pini daa mêuu a tóó, nyi mu ngmidi Yâpwo ndêndê. Kópu, Pi dyêêdî yintómu ṉgîma amî ghê dmi, yi yi mbodo dmi ngê kêame ṉga wa ghê dmi, mu kópu u dîyêo dipi knêaadi ngê, pi yintómu knî yêoo ṉgópu dyuu mbêaa dê mêuu têoo. 5 U kuwó dini ghi ngê nmî Mî ngê u yâpwo ghi ndêndê mbóó pêuu a ngópu a kpêmî ngê, 6 enjel pyudu yêi a pwii wo. Yi kpîdî dmi kpaapîkpaapî dé, myednya a wuu mbele. Yi mbalêti dmi yi yodo pêuu dnye ya, nkól ntee tpile dé. Tpile tpêoo páádi knî nêii nmî Mî u nkîghêê dnye kwo, ngmê ngê kpadakpada u mbwaa kuu pyudu ye yêângo. Yi mbwááni dêââ pyudu knî nkól ngê lêâmo tumo. Pini nêii chedê ngê daawa pyódu, nmî Mî, u nodêenodêe u mbwaa kuu yi ntówo too. 8 Yi ngwo nmî Mî u wuu ndîî ngê pyodo, u wêdêwêdê ndîî ngê mye pyodo. Yi kópu dê yi lêêê dîyêo u yâpwo ghi kêoo dpudu ndîî ngê pyodo, kóó a ngêêdî. Nê wêee ngê, nê, Doo u ntââ pi yêi daawa kee, u dî wéni nêii ngê enjel pyudu knî yêoo kpadakpada u mbwaa kuu pyudu knî dyámê mbêmê wa a pii têoo.