Epeso 5

1 Nmî Mî ntee a tóó, yinté dmyinê ya, mu kópu u dîyêo tpêoo módó tpêoo mââ ngê a pyódu nmyoo, nmyi nuu ghi dmi nódo a tóó. 2 Yesu Kédisu nódo nmyi nuu ghi dmi ntee a tóó, nmyi tîdê mbwó yoo yi nuu ghi dmi yinté nmyi nódo myednyêoo ya. Chóó Lémi u nuu u kópu yi dêuu ngê, nmî lêêê dîyêo chóóchóó yêângo, chóóchóó kpêê ngê yó. 3 Nmî Mî u yoo vyêo nmyi ghê dniye, u lêêê dîyêo kîdmyengê pyââ ti mââ ti, nmyi gha dmi tupwótupwó ngê mêkîngê pyaa dmi, tpile ndapî yi mbêaami ngê nangmê pyódu. Pi knî yêoo nmyi pi dmi yi kópu knî yi pêuu kîngmê nyêee ngmê. 4 Myenté doo u ntââ dono kópu dé nmyi kwo kîdangmê pwii, pyââ pêuu danêmbum ngê kêê nangê têoo, yinté pi nkwitinkwiti ngê kêê myenangê têoo, ngmênê nmî Mî pêee dmyinê kwunokwuno. 5 Ala kópu nmyi lama choo ya, pyââ ti pyu, ó pini nêii u gha tupwótupwó, ó tpile ndapî yi mbêaami, yinté pini nmî Mî Mupwo yi kêê kêoo daangmêwa ghê, mu kópu u dîyêo tpile ndapî yi mbêaami ngê u tpile dé u yâpwo ngê dpî pyódu té. U nuwêo u tpile knî yi pêuu a kwo yédi, nmî Mî pêuu daa kwo yédi. 6 Pi ngê kêomodanê kópu knî yi mbêmê kîngê dóó nmyo. Yélini nmî Mî ka daa ngêaa nyédi, yinté kópu a dêuudêuu tumo, vyîlo yi kópu knî yi lêêê dîyêo wa kpada té. 7 Yinté yéli yi vyêo nangmê ghê. 8 Wunê mgîdî vyêo nmyee a kwo, ngmênê nmî Lémi ngê u kwo a kââdî nmyoo, u wo nmye pyede. Wo u yoo yi kópu dé yidmyinê dêuudêuu dé, 9 dmyinê mbêaambêaa, nmî Mî u nuu u kópu dé dmyinê dêuudêuu dé, pi nangmê dóó. 10 Nyââ, nmî Lémi u nuu u kópu dé dmyina a pywêêmî dé, myedmyinê dêuudêuu dé. 11 Mgîdî u kópu knî yêoo yoo daa ngêêpî tumo, nangmê dêuu, ngmênê nmyi wuu yi kópu dono yilî yi pwo dnyêoo ya, pi knî ye dmyinê kwódukwódu dé. 12 Kópuni tumutumu a dêuudêuu tumo, mywenemywene u kópu dé. Ala pweepwee pee yedê daanê dêêê té, kminté mywene nmye amî ghê. 13 Nyââ, nmyo lam ntee tpile dé, kópu yilî yintómu yi pwo nmyi wuu dmi choo ya, pi knî yêoo u ngwo pêdê wêee yêe, yi kópu daa mbêaambêaa dé, dono dé. 14 Wêêênî tpile yilî yintómu mbêaambêaa ngê anyi mêuu té. Yi kópu u lêêê dîyêo nmî wéti ngmê kêoo ala kópu a tóó, Yélini mbwee ntóó ntee tpile dé, a pii dmyeno, Yesu Kédisu u wuu nmyi pwo wa kéé. 15 Dpêee mgîdî u yoo, ngmênê Yesu Kédisu u wuu nmyi pwo a tóó. Yi kópu u lêêê dîyêo u maa mbêaambêaa ngê dmyinê kîgha. Yélini yi lama nmî Lémi daa tóó, yi ntêanê mênangmê yââ, ngmênê nmî Lémi u nuwêo u pono dmyinê vyápê. 16 Ala ngwo yoo dono yi vyêo nmye wee. Módó kîdmyengê ya, ngmênê kópuni mbêaambêaa u ntââ ngê nmye dpî pyaa dmi, dmyinê dêuudêuu dé. 17 Mbodo podo ngê nangmê pyódu, ngmênê nmî Lémi u nuu u kópu dé dmyina a pywêêmî dé, myedmyinê dêuudêuu dé. 18 Mbwaa ndanî têdê kîdmyengê ghétighéti, yi kópu ngê wa dyênê nmyo. Ngmênê nmî Mî u Ghê Dmi nmyi mênê ntênê choo ya, yinê choo mbêpê kîgha nmyo. 19 Wéti nêii nmyi lama a kîgha too, myenté wéti nêii nmî Mî u puku yedê a pyede, myenté wéti nêii Yesu u yoo knî yêoo ala ngwo dê vyi têoo, yi wéti knî yêe nmî Lémi nmyi gha knî yi vyêo yinté dmyinê chaa kîgha. 20 Tpile yintómu knî yi lêêê dîyêo, dye ghi yintómu nmî Lémi Yesu Kédisu u pi mbêmê nmî Mî Chóó Lémi dmyinê kwunokwuno. 21 Numo dnye dmyinê nyêmî dé, mu kópu u dîyêo Yesu Kédisu u dnye nmye nyêmî ngmê, myêee chââchââ ngmê. 22 Yepe yoo, nmî Lémi u dnye ntee nmye nyêmî ngmê, nmyi moo yoo yi dnye dmi yinté myedmyinê nyêmî dé, 23 mu kópu u dîyêo Yesu u yoo yi mbodo ngê ntee a tóó, mââ mye yinté, u kpâm u mbodo ngê yinté a ya yédi. Yélini yi kêii Yesu ka nmo kêlîmî té, nmî mbodo ngê pyodo, mu kópu u dîyêo nmî Mbwámê ngê mye pyodo, nmî lêêê dîyêo u ngwo pwene. 24 Nyââ, Yesu Kédisu u dnye ntee nmo nyêmî ngê, yepe knî yêoo dye ghi yintómu yi moo yoo yi dnye dmi yinté dnyêoo nyêmî dé. 25 Yéé yoo, ala kópu a nyêee yó. Yélini yi kêii Yesu Kédisu ka nmo kêlîmî té, nmî nuu ghi dmi nódo a tóó. Yi kópu nmî lama a tóó, mu kópu u dîyêo chóóchóó nmî lêêê dîyêo yêângo. Ntee nmo wunê vyuwo, nmyi kpâm knî ye yinté myedmyinê vyuwo, yi nuu ghi dmi nmyi nódo ntênê dnyêoo ya. 26 Yesu Kédisu ngê u yi doo kwo, A yoo yi dono mbwaa ngê nî ghêê té, a kópu dyuu mbêmê a kede paa nî têee té. 27 U yi u ngwo a kwo, A chóó a yoo ngê nî pyódu té, yoo mbêaa ngê nî pyódu té, dyââpe yi pêuu daadî ya, dono yi mênê myedaadî ya. 28 Mââ yoo, nmyi chóóchóó nmyi nuu ghi dmi nmyi nódo ntee a tóó, nmyi kpâm yoo yi nuu ghi dmi nmyi nódo yinté myednyêoo ya. Pyââ mbodo mââ, u lêêê dîyêo nêii u kpâm ka a vyuwo yédi, chóó u pââ ka a vyuwo yédi. 29 Pi chóóchóó u kwo daawa diyêa, ngmênê a mbonombono ngê, u kwo a vyuwo yédi. Myenté pi ka u kpâm kîngî diyêa, u kpâm ka mbêaambêaa ngê choo vyuwo. Yinté Yesu Kédisu nmo wunê vyuwo yédi, 30 nmî mbodo ngê a tóó, nmo u yoo. 31 Nyââ, pini nêii u kpâm ka a vyuwo yédi, chóó u pââ ka a vyuwo yédi, mu kópu u dîyêo puku yedê alanté a tóó, Mââ u pye mî yi kêlê dpo pwii, u kpâm kêii ngmidi ngê dpî pyaa knî. 32 Yi kópu u mênê tumu kópu ndîî ngma tóó, na a ka u ntêu kópu ala, Yesu Kédisu ngê u yoo u kede paa têângo. 33 Yi kópu u dînê mye yinté, pi ngê u kpâm u kede paa dpî têoo, ngmidi ngê dpî pyaa knî, ntênê u kwo choo vyuwo, myenté yi pyópu ngê u moo ntênê choo chââchââ.