1 Kódin 8

1 A tîdê mbwó yoo, pweepwee pee yedê póó nêii a ka nmyinê dyêââ ngópu, myomoni kópu pêuu nmye nînê dêêê, tpile tpêoo nêii kêomo yâpwo ka a yémî ngópu, u pîpî pêuu. Nmî lama ka tóó, Kêomo yâpwo daa ndêndê ngê yâpwo njini, u lêêê dîyêo nmî vyêo pi ngmê knî yêoo yinté tpile tpêoo mbyuu ka a pîpî tumo, yinê ye u kópu daa tóó. Ngmênê pi woni knî ye kwódu ye u kópu, yi tpile tpêoo mbyuu dêuudpî ma ngmê. A tîdê mbwó yoo, nêii yoo yi lama yinté a tóó, apu, Kêomo yâpwo daa yâpwo njini, yi yéli daadnya a mbodo ndîî mbodo ndîî, wo yéli yi pi dmi daadnya a dyede. Nmyi nuu ghi dmi numo nódo dnyêoo ya, nmyi mbwó yoo yi pi dmi namê dyede. Nêii nódo u tîdê mbwó yoo yi nuu ghi dmi a pyede, yi gha dmi a wêdêwêdê kîgha too. 2 Pini nêii ngmênê u kwo kópu yilî yintómu u lama a pyede, yi pini dnyinté a nuwêo yédi, 3 ngmênê nêii nódo Chóó Lémi u nuu ghi a tóó, Chóó Lémi u lama pini, kóó kuwa daamî kââ. 4 Dini ghi nêii ngê kuwa pini ngmê ngê tpile tpêoo dpî vyêa, kêomo yâpwo u pi u ngwo dpî vyi, u ntââ yi tpile tpêoo mbyuu anmî ma, mu kópu u dîyêo nmî lama ka tóó kêomo yâpwo daa yâpwo ndêndê, Chóó Lémi mu ngmidi yi yâpwo ndêndê. 5 Kêomo tpile pi knî yêoo yâpwo yilî a chââchââ tumo, ngmênê nmînê nmo yâpwo mu ngmidi ndêndê, Chóó Lémi. Yi pini nmî Mî, tpile yilî yintómu yinê lêâmo too, u lêêê dîyêo nmo pyede. Kêomo tpile yoo yi lémi yilî, a chââchââ tumo, ngmênê nmî Lémi ndêndê mu ngmidi, Yesu Kédisu, pini nêii Chóó Lémi kêii dyámê pê lêâmo ngópu, ghê kamî nmo yinê myedê kpo. 7 Ngmênê pi woni knî yi lama yi kópu dnyinté a tóó. Yesu u yoo vyêo ghêlî kêii daa ghê dniye, mêââ yilî yi kêoo kêomo yâpwo knî ye dnyimo a ngêpê, kêomo yâpwo knî yi lêêê dîyêo tpile tpêoo kpêê ngê dnyimo a yiyé dé, mbyuu dnyimo a pîpî dé. Ngmênê ala ngwo yinté ntini daa pîpî tumo. Yinê ye kêomo yâpwo u pi pêuu a têa, apu, Chóó Lémi ka tupwótupwó ngê angmanmî pyódu. 8 Daa nté u lêêê dîyêo Chóó Lémi ka yoo mbêaa ngê anmî pyaa dmi. Nêii ngê yi ntini dpî kpîpî, Chóó Lémi ka dono ngê dêuudpî pyódu. Myenté, nêii ngê yi ntini dpî ma, yi kópu mbêmê Chóó Lémi ka pi mbêaa ngê dêuudpî pyódu. 9 A mbwó, ḻama ka tóó, kêomo yâpwo dé daa yâpwo ndêndê dé, u lêêê dîyêo yinté ntini nye pîpî too. Ṉga u ntââ, ngmênê Å̱îdê mbwó yoo yi pêuu chi nuwêo. Pini nêii u lama yi kópu dnyinté a tóó, nangê lvêêdî. 10 Kêomo yâpwo u ngomo kêoo kmaapî têdê nangmê nî. Yinté pini ngê yêi wa mêuu ngi, yi ntini pee myêoowa ma, ngmênê u kwo dono kópu ayi dêuu, chóóchóó nmî Lémi u yoo kuwa wa ghê. 11 Kópuni ḻama a tóó u lêêê dîyêo lukwe dîyêo m̱wó anyinê lvêêdî. Yi pini u lêêê dîyêo nmî Lémi Yesu Kédisu pwene. 12 Lukwe dîyêo nmî Lémi Yesu Kédisu pêuu anyi dono, pini nêii u lêêê dîyêo pwene anyinê lvêêdî, m̱wó yoo yi pêuu amêii dono, yi nuwêo dmi anyi dyênê. 13 Nê nê a nuwêo alanté. Ntini nêii ngê a mbwó wa a lvêêdî, yi ntini mêdaanî ma, u dî pwopwo. U ya a nga daa kwo, A mbwó a lêêê dîyêo ngma a lvêêdî we.