Nlir aAmos 9

1 N ya uPonzhinan sat ka̱ atak nshì iya̱m awop. Uza̱ là pa̱, «Lə̀p nggwan nzhi awop pa̱ gənggəng na mbang nzhi á yənggət. Chwan oza̱ á tàk ka̱ apal ishi nkpaktak onəm. Aɓo onəm te, mi gbá̱ng ká̱ ndokchi. UNəm pa̱ uzəng i pətər ka̱t, uro ya i lár ka̱t. 2 A yà pa̱ oza̱ atáng aShəwol te, awo mi i fa ká̱ oza̱ ka̱ ta. A yà pa̱ oza̱ a kyen ka̱ ashe apaɓur te, mi fəng ká̱ oza̱ ka̱ ta. 3 A yà pa̱ oza̱ a bwam kà̱ ìtə́ngtə́ng aɓam aKarmel te, mi ram oza̱ mi fəng ká̱ ka̱ ta. A yà pa̱ oza̱ a bwam ka̱ avəng ìwá te, mi nak awù aga ashe ndəng i kyen oza̱. 4 A yà pa̱ okpa ìkum oza̱ a wur izwal ká̱ oza̱ te, mi nak mí gbá̱ng oza̱ ká̱ ndokchi. Mi pá ìwu óza̱, ka̱kul inga, inəna̱n ka̱t.» 5 UPonzhinan uYawe uga nggatək dok apambin te apambin sərak, nkpaktak onəm oga ashishe təm ká̱ aɗor. Nkpaktak mbin i wong kang i fər, wa ìgum ndəng awang aNilu aga aMasar. 6 Uza̱ va me nzhi iponzhi wò ka̱ ashe apaɓur, kang uza̱ bang akukum ka̱ apambin. Uza̱ wór ndəng ìwá tar ka̱ apambin. Aɗiɗin pa̱ uYawe. 7 UYawe ɓəp pa̱, «Ónəm oIsa̱rila, o rəng pa̱ o ji onəm oKush ji ka̱ atak mi ɗò? Mmami na n fa ká̱ oga aIsa̱rila kà̱ mbin aMasar, ká̱ oFilisti ka̱ aKafto. Kang onəm oga aAram te, ka̱ aKir ka̱t ɗò?» 8 «Dər, uPonzhinan uYawe kà̱ ndər iponzhi iɓá̱ngɓa̱ng oga aIsa̱rila va̱ ta̱, mi zhì na i le ka̱ apambin. Káp ká̱ nnà te, mi nzhì nkpaktak nzhi àYakup ka̱t,» uYawe à là. 9 «Mi nak mí yənggət oga aIsa̱rila ka̱ ashe nkpaktak oga mbin, wa nva mí yeka̱n ikur ká̱ ìkpáng ìga atum, apir pa̱ zəng i yà ká̱ nlar ka̱t» 10 Onəm oga nnap mɓá̱ngɓa̱ng pa̱ kpaktak te mí zhì oza̱ ká̱ ndokchi. Onəm va kà̱ nlà pa̱, «Iya̱m ro i yà ká̱ ǹya yi ka̱t.» 11 «Kà̱ ìlum va̱ ta te, mi me nzhi aDawuda kà̱ɗi . Mi ɗa̱mshi oga mɓol akamsəlang, mi wong ká̱ oga agúng va̱ shin kang mi me oza̱ wa nva ka̱ yà, 12 ka̱kul na oza̱ à ka̱m aɓo oga aEdom va̱ re, ka̱ nkpaktak oga mbin va̱ ka̱ yà mí wór oza̱ pa̱ ojem á.» UYawe va i ga nnənəm à là. 13 «Fye, nra na kà̱ mɓa.» UYawe là pa̱, «Iya̱m i yál nna mmá gba̱l nshàng ìram chit ka̱t, kang nkáng ndəng ìba̱ngba̱ng ǹsámsàm nna i ga mpyal mɓəɓal. Aɓam i na ndeng ìba̱ngba̱ng ichángchàng va i ɓəl ka̱ apal oga aɗuktum. 14 Mi le ká̱ onəm mi oIsa̱rila ka̱ atak izwal, oza̱ i me oga ìtong oza̱ va̱ ra agúng i təm kà̱. Oza̱ i ɓál ìba̱ngba̱ng oza̱ i wá ndədəng, oza̱ i wap ìram ìkáká, i ri iyəya̱m. 15 Mi ɓál oza̱ ka̱ ashe mbin oza̱, mí yà ká̱ ntur oza̱ lap kà̱ mbin va̱ nná óza̱ ka̱t.» UYawe, Inan wo à là.