MAEKOS 8

1 Juname’e taewaimmet intok, ju’u yoemra tu’isi bu’uuka ama aanen. Intok im kaita bwa’amachiakan. Junak intok ju’u Jesus, a’ majta’ummeu chaaeka: 2 âInika’a yoemrata ne tu’isi na’a jiokoleka na’a bicha âti ameu jiiakâ. Bwe’ituk jaibu baji taewaim inim nemak aneka, intok kaita bwa’amachi âti ameu jiiakâ. 3 Intok ne ka’am ji’ibwatuaka’ateko, intok bem jo’arammeu bicha am saka’atuaka’ateko, bo’ot tebae, ka pappeaka, wattinemme. Bwe’ituk bempo’im betana, waate che’a mekka betana inim aane. 4 Jume’ a’ majta’um intok inen a’ yoopnak: âJaksa te tua, inim kaita auka’po, ama butti bwa’amta nu’uka, inika’a yoemrata a a’abojne âtim a’ temaek. 5 Jesus intok: âJaiki paanimsa eme’e nu’uka rejte âti ameu nattemaek. âWoo busanim âtim te’ekamme. 6 Junak intok, juka’ yoemrata, nat wikiaka am jootesaeka amet nesawek. Intok jume’ woo busanim paanim nu’uka, Liojtau bicha nok suka, am rebektataitek. Junak intok, a’ majta’ummeu am manak. Jume’ a’ majta’um intok, yoemrata bichapo am manak. 7 Intok ket ka jaiki kuchum nu’uka rejten. Intok ket juname’e nu’uka, Liojtau bicha noksuka, junae yoemrata bichapo mana’awak. 8 Intok si’ime, jiapsi yuma’isi, jobo’oji’ibwakamme. Intok yeu be’aka’uta, woo busan waarimtaka, tapunika toboktituk. 9 Intok junuen aman a’abojwame, toktim naiki miiltukan. 10 Intok am saka’atuasuka, a’ majta’ummak nau, sep, kuta kanoau ja’amuka, senu bwiarau, Lalmanuuta’ tea’u bicha siika. 11 Junama’a a’ yepsao intok, jume’ waate juriom, paiseom teame, aman au yajaka, aamak emo nok bwijlatukan, a’ ji’obila betchi’bo, Liojta betana, teekapo, senu machilaata ko’om weenemta a’ ju’unaktesaen. 12 Jesus intok, tu’isi bwe’um jiabijteka, inen jiiak: âJaisa betchi’bo tua, ini’i yoemra machilaata a’awa. Lutula wee’po, tiia, eme’e ka’a bittuanaa, juka’ machilaata. 13 Junama’a am to’o sika intok, kuta kanoau ja’amuka, sekka’ana, omot bicha siika. 14 Intok bem bwa’anee’uta, bem weeyanee’u, aawaj koptekamme. Junama’a kuta kanoapo bem kate’epo, wepul paanim jiba nu’uka kaaten. 15 Junak intok ju’u Jesus, essoi nokpo paiseom teame betana, intok Eroorej teamta betana, juka’ ka tu’ik bem yee majta’uta betana, emo ama suuasaeka ameu nookan. Intok reberuapo a’ teuwaaka ameu nookan. 16 Junak intok, jume’ a’ majta’um, naas emo temae japtek, inienim jiakai: âPaanim ka itom weeya’ betchi’bo jumak reberuata itou teuwa âtim jiian. 17 Junak intok ju’u Jesus amet ju’uneaka, inen ameu jiiak: âJaisaaka eme’e, paanim ka weeya’ betchi’bo eme’e nok saka. Jaisa eme’e kaitat mammateka, intok kaitat ju’unea ja’ani. Oo enchim jiapsim namakasi aula ja’ani âti am temaekâ. 18 Bwe’ituk eme’e, in ya’ala’uta enchim pusimmea bichaka’uta, intok in nokaka’uta enchim nakammea jikkajaka’uta, ili juni’i em ka’a jajjamlata benasi em aula. Katem a au waate juni’i. 19 Jaisa eme’e ka au waate ja’ani, mamni miilim yoemem a’aboj betchi’bo, jume’ mamni paanim in amet na’ikimteka’po. Intok jaikika waarimsa intok ama yeu be’ekame, jaiki waarimsa eme’e aman tapuniak âti am temaek. Bempo intok: âWoj mamni ama wooi waarim âti jiiak. 20 âIntok jume’ woo busan paanim, jume’ naiki miilim yoemem in ammea a’abojseka’posu, jaiki waarimsa ama toboktituk, ama yeu be’ekame betana. Bempo intok: âWoo busan waarim ama toboktituk âtim au jiiak. 21 Junak intok ju’u Jesus inen ameu jiiak: âJaisa betchi’bo eme’e ka a aet ju’unea, ju’ubwa in emou nokaka’uta betana âtiia. 22 Junak intok, Betsaira’ tea’u bicha sikaa, aman yepsak. Junama’a intok, senu yoeme, liptitaka ama au tojiwak. Intok aet a’ mamtene’ betchi’bo au ujbwanwan. 23 Junak intok, junaka’a yoemta liptita, mampo bwiseka, junama’a ili ka bwe’u jo’ara a’ ane’epo, pa’akun bicha yeu a’ nuk siika. Intok a’ pujpo a’ chitta amet yaak. Junak intok ae bepa mamteka, jaisa ka’a bicha ja’ani, ti au nattemaek. 24 Juna’a yoeme intok, ili bit jeelaika, inen jiiak: âYoemem ne naj kateme ne bicha âtiiaâ, taa kia juyam benasi mamachime. 25 Intok juchi intok a’ pusiwammet aet mamteka, junak intok si’imeta tajpa’alasia machisi bittaitek. 26 Junak intok ju’u Jesus, junaman ka bwe’u jo’arau bicha, ka intok a’ weesaen, juka’ tu’uwata au a’ yaaka’uta ka junaman a’ etejo’ii’akai. Kiali’ikun a’ jo’awau bicha a’ simsaeka a’ tejwak. 27 Junama’a intok ju’u Jesus, a’ majta’ummak, jum bwe’u jo’ara Sesarea piliipo’ tea’po, waate ka bwere jo’aram au jeela joka’um, junama’a wa’am yeu siika. Bo’ot intok a’ majta’ummeu nattemae taitek: âJume’ yoemem, nee jabesa ti jiia. 28 A’ majta’um intok inen au jiiak: âEnchi Joan yee babatoowame’etiia. Waate intok enchi Eliaj tiia. Wate intok, jume’ bat naataka, Liojta betana yeteu noktuawame betana enchi weye’etiia. 29 Junak intok aapo inen ameu nattemaek: âEme’e intok, nee jabesa’atiia. Peeo intok: âEmpo ju’u Krijto âti au jiiak. 30 Junak intok ju’u Jesus, aapo’ik, kaabetau a’ etejosaeka am tejwak. 31 Intok inen a’ utte’a, tiia, juka’ emo benasi yoemta, jiokot au a’ bitne’po, intok junama’a yo’o ya’arim betana kaita’po a’ bitna’po betana. Intok ama bem maejtom, intok ama te’opopo nesaweme, jume’ che’a ama yo’o ya’arime betana, intok me’etune. Taa baji taewaita weyeo, jiabijtene, tiia. 32 Inika’a weemta intok, machisi ameu a’ teuwaan. Junak intok ju’u Peeo, aapolaik omot bicha yeu a’ nuk sikaa, junuen a’ jiaka’ betchi’bo, ili a’ nok buitaitek. 33 Junak intok ju’u Jesus, amau bicha, jume’ waate a’ majta’um naj bitchuka, omti nokpo, Peotau inen jiiak: âMekka jakun bicha weami’ise’e. Bwe’ituk, kia che’a tu’isi, Satanajtumta benasi neu jiia. Bwe’ituk Liojta betana weyemtate’e ka ju’unea. Taa inim bwiapo, yoemratat betana weyemtat jiba’e ju’unea âti au jiiak. 34 Intok yoemratau chaitebok, intok a’ majta’ummeu intok: âKia jabetaka juni’i âti ameu jiiakâ, in lutu’uriata nemak atteabaeme, juna’a intok inim aniapo weyemtae ae emo alleetuawamta, ka intok junae au taka alleetuabaeka’eene. Bwe’ituk junuen au utte’atune. Taa in ea’po aman jiba an sisimne. Intok inien aneme, che’a tu’isi, kia kuujta pu’atemcha weene. 35 Bwe’ituk si’ime wa’a i’an lautipo inim aniapo, si’ime weemtatchi, junae tana jiba au eetuaka jiapsa’ateko, junuen auka’ateko, juka’ Liojtau bicha yuu jiapsinamta ka teune. Taa si’ime wa’a nee betchi’bo intok inie in tu’i nokta betchi’bo, jachin ya’awaka’ateko juni’i, intok kia me’ewaka’ateko juni’i, juna’a ala, junae, jiapsi jinne’uritune. 36 Bwe’ituk jita tu’uwatasa ama jajamne, ju’u yoeme, si’ime juka’ aniapo ujyoriata a’ atteako, chukula intok, mukuko, ju’u a’ jiapsiwa Liojtau a’ weenee’u, ka au lutu’uriatuka’ateko. 37 Bwe’ituk ju’u junuen mukukame, juchi inim jiapsibae’eteko, kia jaiki tomita beje’etuaka’ateko juni’i, kaachin juchi jiapsine. 38 Bwe’ituk kia jabe juni’i, nee tana, intok in tu’i nokta betana au tiutuakame, inim bwiapo inim jiapsame nasuku, jume’ ka tu’uwata weetuaka, ka Liojta jiba emo yo’orituame, juname’ebichapo emo tiutuakame, nejpone ket emo benasi yoemtaka, ket juname’e betana ne ino tiutuane, jume’ in yeu pu’arimmak, intok Lios achaita ujyoria at teamak ne a’abo ko’om yepsako.