MAEKOS 5

1 Intok sekka’ana bawe betana, bwiara Kalaara’ tea’po yajak. 2 Aapo Jesus intok, kuta kanoapo yeu siika, junama’a intok senu yoeme, kokkoarim ma’ari’po jiba a’aneka, intok bebeje’eri ka tu’i jiapsi eerita a’ jiapsipo aet aneka, Jesujtau yeu sikaa, a’ nankek. 3 Juna’a intok, kokkoarim ma’ari kari ya’arim jiba jojo’an. Intok kia sisi’iwok wikiam ya’arimmea juni’i, ka a suma’atun. 4 Bwe’ituk jue benasia, sisi’iwok wikiammea, intok mampo ae a’ suma’im susumawan. Intok mampo yee ammea susumammea chatchaawan. Taa juname’e wikiam intok, aapo a’ utte’awammea am chuk chuktan. Intok mampo ae a’ suma’im juni’i, chuk chukti wiiken. Intok kia jabe juni’i ka’a yu’een. 5 Juna’a intok, tukaariat intok taewait naa buusti, kaupo jiba chai sisimen. Intok kokkoarim ma’ari’po jiba weaman. Intok tetammea jiba ko’okosi au joo sisimen. 6 Intok Jesujta mekka’ekut bichaka, au tajtia buiteka, au tonommea kikteka, a’ yo’ori taitek. 7 Junak intok ju’u bebeje’eri jiapsi, aet wajiwa aneme, kusisi inien a’ chaituak: âJesus âtiiaâ, Lios, si’imem bepa yo’orisi machik u’usi âtiiaâ. Jitasa empo nemak lutu’uriak. Liojta betchi’bo eu ne ujbwana, ka bat ko’okosi em nee ya’ane’ betchi’bo âti au jiiak. 8 Bwe’ituk ju’u Jesus, inen jaibu au jiulatukan: âEmpo, bebeje’eri ka tu’i jiapsi, inie yoemta jiapsipo wajiwa betana yeu weye’e âti au jiulatukan. 9 Jesus intok, junau, ka tu’i jiapsitau: âJaisa empo teak âti a’ temaek. Juna’a intok, inen a’ yoopnak: âBu’uuraapo te ta’eewa, bwe’ituk tu’isi juebenate âti a’ yoopnak. Bem nokpo intok, Lejionpo ta’eewan. 10 Junak intok juname’e bebeje’eri, ka tu’i jiapsi e’eri, tu’isim Jesujtau jiokot jiaka am au ujbwana, junama’a bwiaraapo pa’akun mekka bicha ka bem yeu beeptune’ betchi’bo. 11 Junama’a intok, senu kawiu jeela, kowim tu’isi juebenaka ama ji’ibwa sasakan. 12 Juname’e si’ime intok, bebeje’eri jiapsi ka tu’i e’eri, Jesujtau tu’isi jiokot jiaka, au ujbwanan: âJuname’e kowimmeu itom bittua’e, amet itom kimune’ betchi’bo âti au jiakai. 13 Junak intok ju’u Jesus junen ameu a’ chupak. Juname’e ka tu’i jiapsi eeri intok, junae yoem jiapsitat yeu sajaka, juname’e kowi jiapsimmet kiimuk. Juname’e intok wooi miil kowimtukan. Intok si’ime, kau bemte’utchi, luula tenneka, baweu ko’om watteka, ama am kokkok. 14 Jume’ intok, am suuame, junama’a yeu tenneka, wasampo bem ama wa’am kate’epo, a’ etejo sasakan, intok bwe’u jo’arau yeu yajaka, ket junuen a’ lutu’uria yaak. Junama’a jo’aakame intok, aman bicha yeu sajaka, aman a’ bit betchi’bo, intok jita ama yeu sika’apo aman aet ju’uneebokai. 15 Intok Jesujtau yajaka, waka’a bat naataka juebena bebeje’erita ka tu’u jiapsi eerita a’ jiapsipo wajiwa aet anemta, tu’isi supetuaritaka, yuma’isi suakamtam ama bichak. Intok aet emo jiapsi womtak. 16 Intok jume’ waate ama aneme, bat naataka juka’ bebeje’eri jiapsi ka tu’i eeriakamta, jachin au yeu a’ sika’apo aman, junammeu a’ etejon. Intok kowimmeu, jachin ameu yeu a’ sika’apo juni’i, ket bempo’immeu a’ etejok. 17 Junak intok, si’ime jume’ ama jo’aakame, Jesujtau ujbwan japtek, junama’a bem bwiaraapo betana, pa’akun bicha yeu a’ weene’ betchi’bo. 18 Junak intok juka’ Jesujta, kuta kanoau a’ ja’amubaao, ju’u bat naataka juka’ bebeje’eri ka tu’i jiapsi eeriakamta, junammea jiokot au bichaka’u, juna’a, Jesujtau ujbwanan, aamak weebaekai. 19 Taa ju’u Jesus ka junen e’eak: âEm jo’au bicha siime âti au jiiakâ. Liojta, juka’ tu’uwata enchi a’ ya’ariaka’po aman, intok tua enchi a’ jijiokoloka’po aman, am etejoriane âti au jiiak. 20 Junak intok juna’a, sep siika, intok Lekaapolij tea’po, juka’ Jesujta, tu’uwata au a’ yaaka’po aman, intok tua a’ jijiokoloka’po aman, naas a’ etejo taitek. Junama’a jo’aakame intok, tu’isi a’ suum e’eiyaak. 21 Jesus intok, juchi kuta kanoapo, jiba junama’a bawepo, omot bicha yeu sikaa, omot yeu yepsak. Junama’a intok, bawe mayoau jeela a’ aneo, tu’isi juebenaka ama au nau yajak. 22 Junama’a intok, seenu, juriom emo nau totojiwaka’po, ama yo’o ya’arime, intok Jairo’ teakai. Juna’a ama Jesujtau bicha yeu sikaa, au yepsaka, au tonommea kikteka, 23 tu’isi au ujbwanak: âJu’u in maara, unnaa ko’okoe, intok abe muuke âti au jiianâ. Empo aman au sikaa, aet mamte’e, tiia. Bwe’ituk junuentuka’ateko, juna’a, au inne’eteka, jiapsine âti au jiiak. 24 Jesus intok aamak siika. Junak intok, juebena yoemra aamak sajaka, nasuk a’ weeyaka, kia nau a’ pitta sakan. 25 Junama’a intok, senu jamut, woj mamni ama wooi wasuktiapo, ojbota jiba wo’otan. 26 Intok juebena yee jijittome a’ jittolatukan. Intok si’imeta a’ jipue’uta amet wiutak. Intok kia junuentaka juni’i, yu’in eewamta kaita jajamek. Che’a juni’i, ka tu’i simen. 27 Intok Jesujta ama ane’e betana ju’uneyyaka, juebena yoemrata ama ane’epo, nasuk aman kibakeka, Jesujtau amatana au yepsaka, a’ supewammet mamtek. 28 Bwe’ituk inen au eetuan: “Kia ne a’ supewammet mamteka’ateko juni’i, ino ne ine’etenee”, ti au eetuak. 29 Junak intok junama’a lautipo, ju’u ojbo sep cha’atuk. Intok junae ko’okoata betana au a’ inne’eteka’po aman, a’ takaawata tu’isi maisi a’ inne’an. 30 Junak intok, ju’u Jesus, senuku tu’uwatunemta aapo’ik takaapo yeu simlatau ju’uneyyaka, bu’uu yoemratau bicha kuakteka, inen ameu nattemaek: âJabesa ju’u in supemmet mamtekame âti ameu nattemaek. 31 A’ majta’um intok, inen au jiiak: âEmpo yekaka ju’unea, yoemrata tu’isi enchi nau pitta’po, intok: “Jabetasa junen em supemmet, et mamteka’po”, nattemae ja’ani. 32 Aapo intok, ju’u Jesus, nape konila, si’imem naj bitchutaitek, ju’uneebaekai, jabeta aet mamteka’po. 33 Junak intok ju’u jamut, au yoakai, intok au majjaituaka, jachin au yeu simla’po aman, ju’uneakai, Jesujtau yepsaka, aapo’ik bichapo, tonommea kikteka, aapo’iku au yeu bwiseka, au nookan Jesujtawi. 34 Junak intok ju’u Jesus inen au jiiak: âIn jamut yoemia âtiiaâ, em a’ suale’ betchi’bo, emo ine’etela’e. Kaachin eaka weene. Intok inia em ko’okoata betana emo ine’etelatakai âti au jiiak. 35 Ket junuen a’ nokaosu, ju’u yo’o ya’arime, Jairo’ teamta jo’aa betana, waate ama au yajak, inien jiakai: âEm mara muukuk âtim au jiianâ. Kat intok inika’a yee majtamta suate bicha âtiian. 36 Taa ju’u Jesus inien jiuwamta jikkajaka, yo’o ya’aritau Jairo’ teamtau, inen jiiak: âKate’e jachin emo eetua’e âti au jiiakâ. Net yoem’ea’e âti au jiiak. 37 Intok kaabeta intok aamak wee’ii’ak, taa juka’ Peo’ teamta jiba intok juka’ Jakoobo’ teamta, intok juka’ Joanta, Jakoobo’ teamta saira. 38 Junak intok, juriom emo nau totojiwa’po betana, ju’u ama yo’o ya’arimta jo’apo yepsak. Intok juebenammeu, bwanaka, te’inemmeu yepsak. 39 Jesus ameu kibakeka, inen ameu jiiak: âJaisa em aulamtaka, ama butti jiia âti am temaekâ. Ju’u usi jamut ala, kia beja kotche, taa ka mukia âti ameu jiiak. 40 Junuen a’ jiao intok, juebenaka kiala’a atbwaka, jak wa’am a’ eeyan. Junak intok, aapo ju’u Jesus, pa’akun bicha si’imem yeu beebaka, usi jamutta bo’okau, a’ malawata intok a’ japchiwata, intok aamak rejteme, wajiwa bicha am nunuk. 41 Junaka’a usi jamutta intok, mampo bwiseka: âTaliita kuumi âti au te’eka. Ini’i noki intok, kuaktituk, inen jiubae: “Usi jamut, eu ne junen jiia, enchi ne yejtesae”, ti jiubae ini’i nooki. 42 Juna’a usi jamut intok, sep yejteka, naj weetaitek. Bwe’ituk woj mamni ama wooi wasukten. Inia weemta betana intok, jume’ ama aneka a’ bichame, bem jiapsipo, tu’isi a’ suum e’eiyaak. 43 Taa ju’u Jesus intok, tu’isi ameu ujbwanaka, kaabeta a’ ju’uneyyane’ betchi’bo, kaabeta am etejoriasaen. Intok juka’ usi jamutta a’ ji’ibwatuanesaen.