MAEKOS 15

1 Yokoriapo intok, jume’ te’opopo saiwame, bempo’im bepa che’a ama yo’o ya’arime, intok jume’ yoemratau che’a ama yo’o ya’arimmak, intok bem maejtommak, intok si’ime ya’uraamak nau, wepulsi nau a’ lutu’uriateka, Jesujta, mampo nau suma’ita, Pilaato’ teamtau tojak. 2 Pilaato intok inen au nattemaek: âJaisa empo juna’a, ju’u juriommeu ju’u rei âti au jiakai. Jesus intok: âLutu’uria, em noka’u âti a’ yoopnak. 3 Jume’ te’opopo saiwame, bempo’im bepa che’a yo’o ya’arime, juebenakut betana a’ na’atejoka ama aanen. 4 Pilaato intok juchi au nattemaek: âJuebena weemtat betana em na’atejowa’po, jaisa empo ka’am yoopnabae âti a’ temaekâ. Jaisa empo kaita am yoopna machi. 5 Taa ju’u Jesus, kia junuentak juni’i, ka’am yoopnak. Pilaato intok, tu’isi au a’ suum eeyatuan. 6 Taa juname’e taewaimmet intok, pajko taewaituko, junuen a’ bo’o jooriawa’po aman, ya’uraapo eta’ita, kia jabeta juni’i, bem a’awaka’uta, jiokoiritaka, su’u tottojiwan. 7 Junama’a intok ye’e’eta’awa’po, watemmak, senu eta’itukan, Barabaj teame. Bwe’ituk juna’a, watemmak nau eaka, ya’uraata beje’eka aulammake, yee su’awamta weetuan. 8 Ju’u bu’uura ama yajaka intok, junuen a’ bo’o jooriawa’po aman, pajko taewaituka’ betchi’bo, senuk ama su’u tojina’po betana a’ teuwaan. 9 Pilaato intok: âJaisa eme’e, juka’ juriommeu yo’o ya’ari’ teamta nee su’u toji’ii’a âti am temaek. 10 Bwe’ituk aapo ju’u Pilaato tu’isi ju’unean, yo’o ya’uraata, Jesujtat kopteka, aman au tojiwaka’po. Bwe’ituk ju’u te’opopo yo’o ya’uraa, ka’a bibitpean, juka’ yoemrata che’a am eeya i’akai. 11 Taa jume’ te’opopo che’a ama yo’oora, juka’ bu’uurata amemak eene’ betchi’bo, ameu nookan, Barabajta su’u tojitune’po betana. 12 Junak san beja ju’u Pilaato: âJaisa eme’e nee aet nesau’ii’a, inika’a juriommeu yo’o ya’ari’ teamtat âti am temaek. 13 Bempo intok chai nokpo inen jiian: âKuuset popontaka, me’etune âti chaaen. 14 Taa ju’u Pilaato intok, inen ameu jiia: âJitasa ka tu’ika ya’alataka, eme’e kuuset a’ muk i’a âti am temaek. Taa bempo intok, che’a kusisi chaaeka, inen jiia: âJiba kuuset popontaka, me’etune âti jiakai. 15 Ju’u Pilaato intok, si’ime juka’ yoemrata ama anemtamak, tu’isi tawaabaekai, Barabaaj teamta jiokoi tebok. Juka’ Jesujta intok, bat a’ bemmucha’ateboka, chukula, kuuset a’ popontune’ betchi’bo aet nesawek. 16 Junak intok jume’ sontaom, jum yo’o ya’uraa karita korapo wajiwa a’ kibachak. Juna’a intok Pretoorio’ tea. Junama’a intok, si’ime ju’u sontaoraa, emo nau tojak. 17 Junama’a intok, unnaa sik saalaim teebem wokimmeu tajtia supetuawak. Intok juka’ juyata tu’isi wichakamta jijjo’aaka, a’ koona yaaka, a’ kobawapo aet a’ yechak. 18 Junama’a intok, sep au tebote pat: âJaisa empo jiia, juriommeu yo’o ya’ari âti au jiu japtekâ, emo a’ yo’orituamcha aneka. 19 Intok bwe’u bakae, kobat a’ bebaka, ko’okosi a’ jooan. Intok aet’im chit wat watten. Intok a’ yo’oremcha aneka, kia jak wa’am a’ eeyaka, au tonommea jajapten. 20 Junuen jaanam aet noksuka intok, jume’ sik saalaim supem, bem a’ supetuaka’um, juname’e a’ yecha’ariaka, jiba a’ supewampo a’ kobatuak. Intok kuuset a’ popontune’ betchi’bo, yeu nuk saka’awak. 21 Senu o’ou intok, Sireene’ bwiara’ tea’a betana joome, juna’a intok Simo’ teaka, intok Rupo’ teamta intok Alejanro’ teamta achai, waj betana yebijsusekan. Junama’a wa’am a’ weyeo intok, Jesujta aniasaiwakai, juka’ kuujta pu’aktatuawak. 22 Intok senu ili bwia kawiu, kolkota’ tea’po tojiwak. Juna’a intok, kuaktituko, Mukia koba, ti jiubae. 23 Junama’a intok, juka’ pa’asi ba’awata, wantiriata cha’atuamta miira’ teamtamak nau kuutita, a’ ji’ii’aka, au ji’obek. Taa aapo intok, ka’a je’eka. 24 Intok kuuset a’ poponsuako, aet chukula, a’ supewam, naikisi reebeik am na’ikimtek. Jume’ reebeim intok, we’epulaim amemak tawane’ betchi’bo, ja’atepo nau yeuwak. 25 Intok kuuset a’ poponwa’po, tua batan jiao junen ya’awak. 26 Intok a’ na’atejoka junuen a’ ya’awaka’po, ju’u ji’ojtei inen ji’ojteitukan: “Juriommeu yo’o ya’arituka’ betchi’bo”, ti ji’ojteitukan. 27 Aamak intok, naa buusti, wooi etbwareom aamak lopola bem kuusimmet poponwak. Senu a’ batatana, senu intok a’ miko’otana. 28 “Ka tu’i yoememmak junuen ya’atuk”, ti jiakame, junama’a chupuk ju’u senu ji’ojteipo, jakwoo naateka junuen teuwarituka’u. 29 Ama amet wa’am kateme intok, kialim jaana aet jiaka, au koba wiu wiuten, intok inenim au jiian: âEmpo che’a, juka’ Liojta te’opota tatabeka’ateko juni’i, intok baji ta’apo juchi emo a’ ya’ane, ti bat naataka junuen jiusukame, 30 empo, emo jinne’uka, kuuset ko’om weye’e âtim au jiian. 31 Intok ket jiba junaensu jume’ te’opopo saiwame betana, ama ya’uram, bem maejtommak nau, jaanam aet nookan, inenim jiakai: âWatem jinne’uk. I’an intok, aapo ka a au jinne’u âtim nau jiianâ. 32 Empo âtiianâ, ijra’eliitammeu Krijto yo’o ya’ari’i teame, junum kuuset em poponikut betana ko’om weye’e intok junuen enchi ayuko, ite a’ bichaka, te enchi sualne âtim au jiakai. Jume’ intok, aawit ama ket kuuset poponwakame, ka tu’isi aetana nookan. 33 Intok tua luula kateko naateka, si’ime bwiat, bajim jia’apo tajtia, ka machisi tawakan. 34 Intok junama’a, bajim jia’apo, ju’u Jesus kusisi chaaeka, inen jiian: âEloi, Eloi, lama sabaktani. âIni’i noki intok, inen jiubae: “Lios in achai, jaisa betchi’bo empo kia nee jimaalataka, neaj koptilata benasi aulaa”, ti jiubae. 35 Junama’a intok, senu ama aneme, junuen a’ jia’apo aman a’ jikkajaka: âEliaj teamtau a’ chaae âtiia. 36 Junama’a lautipo intok, ju’u seenu, senu weemta, ejponja’ teamta, juna’a intok komoniawak, ba’ata nunu’ee, binaakretae a’ komoniaka, tebe bakapo a’ sumaka, aman jikau au a’ noitak, intok inen jiakai: âChubala em bo’o bicha âtiiaâ. Jumak juni’i ju’u Eliaj teame au a’ chaae’u, au yepsaka, ko’om a’ yecha’ane âti jiiak. 37 Taa ju’u Jesus, junama’a lautipo, kusisi chaipat, muukuk. 38 Junak intok, jum bwe’u te’opopo, unnaa bwe’u tajo’orim, ama wajiwa cha’aka’um, nasuk’aman, jikat naateka, ko’om tajti, siutek. 39 Ju’u intok, sontao ya’ut, aapo’ik bichapo ane’u, junuen a’ jiaka a’ mukuka’po aman a’ mammateka, aapo’ik betana inien a’ teuwaak: âLutula wee’po, ini’i o’ou, kuuset poponiakame, Liojta usiwai âtiia. 40 Intok mekka’ekut, waate jaamuchim aman ja’abweka, a’ bitchun. Juname’ nasuk intok, ju’u Maria, bwe’u jo’ara Maareena’ tea’a betana jometaka ama aanen. Intok ju’u senu ju’ubwa yo’otume, Jakoobo’ teamta intok a’ saira, Jose’ teamta, juname’e ae, ket ama aanen, Maria’ teame, intok ju’u Salome’ teame. 41 Juname’e jaamuchim intok, jum bwiara Kalilea’ tea’po intok, tu’isi a’ suuaka, aet emo tekil makritukan. Intok wate juebena jaamuchim ket junalensu aet emo tekil makritukan, Jerusalen tea’po, jum yee a’ majta’apo, aamak naj kuaktisukame. 42 Junae taewait, kupteo, ket jeo jomteo, juchi yokoriapo intok sabalatubae’ betchi’bo, intok aet yum jo’etuneeo, junaka’a sabalata, kee yumao, si’imeta baa ya’asubaeka ean. 43 Junue betchi’bo senu yoeme, Jose’ teame, Arima tea’ tea’po jo’aakame, juna’a intok ya’utuka, yo’oriwan. Intok ket jiba junalensu, juna’a, Liojta utte’a nesawata inim aniau ko’om a’ yuma’ane’po aet bo’o bichakan. Juna’asan, au ou bujtaka, Pilaato’ teamtau kibakek. Intok juka’ Jesujta takaata a’awak. 44 Ju’u Pilaato intok, lauti a’ mukuka’ betchi’bo, a’ suum’eeyak. Juka’ ya’uttau intok chaitebok, juka’ Jesujta muksuka’po, oo kee a’ muke’epo aetana ju’uneebaekai. 45 Intok ya’utta betana, Jesujta muksuka’po junuen lutu’uriata makwaka, juka’ Jesujta takaa, Jose’ teamtau su’u tojiwak. 46 Juna’a Jose’ teame intok, bwe’u tosai tajo’orim jinuka, chukula intok ko’om a’ yechaka, bwe’u tosai tajo’orimpo a’ biijtaka, kau sibapo, wojo’oriata ya’ari’po, junama’a a’ tekaka, intok juka’ pattiriata, tetae ya’arita, junae a’ pattak. 47 Ju’u Maria, bwe’u jo’ara Maarena’ tea’po jometaka, intok senu yoeme, Jose’ teamta ae Maria’ teame, juname’e a’ bichak junum a’ tekri’po.