MAEKOS 10

1 Junama’a yeu sika intok, Jurea bwiaraapo ama naa buustia siika. Intok batwe Joran waetana yepsak. Junama’a intok, juebenaka juchi aman au nau yajak. Aapo intok, jiba am majta’a benasia am majtan. 2 Jume’ waate juriom intok, paiseom teame, ama au yajaka, kiala’a ji’obila’ betchi’bo au nattemaek: âJaisa, senu a’ jubiawata a jimmaanee ja’ani âtim au nattemaen. 3 Taa aapo ju’u Jesus intok, inen am yoopnak: âJu’u Moiseejtuka’u, jaisa emot a’ nesawek âti am temaek. 4 Bempo intok: âJu’u Moiseejtuka’u ala âtiianâ, jubiarita to’o sim betchi’bo, ya’uraapo, ji’osiata yeu jimmaanesaeka a’ nookak. Juname’e ji’osiammea intok, senu, a’ jubiawata a to’o simne âtiian. 5 Jesus intok am yoopnaka: âEnchim namakak jiapseka’ betchi’bo âtiiaâ, juna’a Moiseejtuka’u inika’a nesauta ji’ojtetebok âtiiaâ. 6 Taa aniata naateka’po naateka, ju’u Lios ka junuen a’ waatan. Bwe’ituk inien ji’ojtei, ju’u Lios, o’outa ju’unaktek, intok jamutta ju’unaktek. 7 Inia betchi’bo san ju’u o’ou, a’ malawata intok a’ achaiwata to’o sikaa, a’ jubimak jiapsine. 8 Ka intok wooi yoemem benasia tawane. Inien san beja, woiriaka juni’i, nappat, wepul yoemta benasi eeyatune. 9 Inia betchi’bo san, wooi jiapsita nau tojirita, Liojta wepul jiapsita ya’arita, inim bwiapo, ju’u yoeme, kaachin junaka’a a na’ikimtene âti ameu jiian. 10 Chukula intok, senu jo’arapo, junae weemta betana, jume’ a’ majtim au nattemaek. 11 Aapo intok am yoopnaka: âKia jabe juni’i âtiiaâ, a’ jubiawata jimmaakame, intok ta’abwik jamuttamak jiapsa’ateko, juna’a, tua a’ juprita a’ kunabeu lutu’uriawame, junaka’a, ta’abwi jamutta ama lutu’uria makako, juna’a, tua a’ jamut juprita betchi’bo ka tu’isi tawane. 12 Intok ket junalensu, kia jamuttaka juni’i, a’ kuna jimmaako, intok ta’abwi o’outamak yejteko, juna’a, tua a’ kunabeu lutu’uriapo, junaka’a ta’abwi o’outa au kunatuakamta, tua a’ kunawata betchi’bo ka tu’isi tawane. 13 Waate intok, junama’a, ili usim, Jesujtau tojan, amet am mamte’ii’akai. Taa a’ majtiwam intok, aman yeu am tojammeu, ameu emo omtituan. 14 Jesus intok junuen am bichaka, au o’omtituaka, a’ majtimmeu inen jiiak: âInime’e ili uusim ela’po a’abo neu tojinaa, katem ammeu suua âti ameu jiiakâ. Bwe’ituk, inime’e ili usim benasi emo eetuame, juka’ Liojta utte’a nesawata kateka’po au lutu’uriane, ama jiapsine’ betchi’bo âtiiaâ. 15 Lutula wee’po ne inen jiia, kia jabetaka juni’i, Liojta utte’a nesawata, ili usita benasi ka au eetuaka’ateko, junaka’a, Lios utte’a nesawata kateka’po, ka a aman kibakne âti ameu jiiak. 16 Juname’e ili usim intok, we’epulaim am iba’ibaktaka, amet mamaka, ameu tu’uwatunemta, Liojtau bicha am nokrian. 17 Aapo intok, junama’a yeu sikaa, bo’ot a’ weyeo, senu au tajtia buiteka, aapo’ik bichapo, tonommea kikteka au nattemaeka: âTu’u yoeme âtiiaâ. Yee mamajtame âti Jesujtau jiiakâ. Jaisa ne auka tua, juka’ yuu jiapsiwamta net aune âti a’ temaek. 18 Jesus intok: âJaisaakai empo nee tu’u jiapsek, tiia. Bwe’ituk inim kaabe aane, tu’u jiapsekame. Taa ju’u Lios jiba tu’u jiapsekame âtiiaâ. 19 Empo jaibu Liojta nesaurim ta’aa: “Jubeka, ka ta’abwi jamuttamak emo tu’uribaane. Etbwawamta juni’i, ka bo’o jooriane. Intok yee su’ana’uta juni’i. Ka aa noki’ichiata nokne. Intok yetet, juka’ ka lutu’uriata, kate’e amet a’ nokne. Intok em achaita intok em malata, tu’isi am yo’orinee” âti au jiiak. 20 Juna’a intok inen a’ yoopnak: âYee maj majtame âti au jiakaiâ. Inika’a weemta, in usituka’po naateka, yuma’isi ne si’imeta ya’ari âtiia. 21 Junak intok ju’u Jesus, a’ noka’utat betana aet mammateka, a’ jiapsipo a’ naktaitek, intok inen au jiakai: âSenu weeme jiba eu be’e âti au jiiakâ. I’ane’e sik, juka’ si’imeta em jipue’uta nenkaka, intok pooberaatat a’ na’ikimtene âtiiaâ. Junak intok, aman teekapo ee betchi’bo, che’a eu tu’uwatunemta aune âtiiaâ. Chukula intok, in bo’o jooria’uta, nemak a’ joo simne. Intok nee betchi’bo em jiokot emo bitne’po, ka jain emo eetuaka, kiala’a inne’aka jiapsine âtiia. 22 Taa juna’a intok, Jesujta inien au a’ teuwa’ betchi’bo, ka au alleetuaka siika. Bwe’ituk tu’isi jita yu’in beje’ewakamta jipuen. 23 Junak intok ju’u Jesus a’ majtim naj bitchuka, inen ameu jiiak: âTua tu’isi ameu obiachi, jume’ yu’in totomekammewi, Liojta utte’a nesawata kateka’u bem yajine’po âtiia. 24 Junak intok, jume’ a’ majtim, inien bem ameu nokwaka’uta betana aet emo suum’eetuak. Taa ju’u Jesus intok, juchi ameu noktaiteka: âIn yoemiam âti ameu jiiakâ. Tu’isi ameu obiachi, Liojta utte’a nesawata kateka’po, bem yajine’po, jume’ yu’in tomeka, junaet eaka aet jiapsekammewi âti ameu jiiakâ. 25 Kameota ji’ikia pusimpo ama yeu a’ weene’po bepa, ju’u yu’in tomekamtau che’a obiachi, Liojta utte’a nesauta kateka’u a’ yebijne’po âti ameu jiiak. 26 Bempo intok, inia weemtat aet ee majjautuan. Bem jiapsimpo inen emo eetuakai: âJunuentuka’ateko intok, jabesa tua a jinne’utune âti emo eetuan. 27 Jesus intok bempo’im naj bitchuka, inen ameu jiiak: âYoemtau obiachisi machiaka’u, Liojta betchi’bo, tua ka obiachi. Bwe’ituk aapo’ik betchi’bo kaita obiachisi machika aayuk. 28 Peeo intok inen au jiutaitek: âAchai âtiiaâ, itepo, itom atteata si’imeta to’o saka’alataka intok te em ea’po aneka, emak te rejte âti au jiiak. 29 Jesus intok a’ yoopnaka: âLutula wee’po âti au jiiakâ. Kia jabetaka juni’i, tu’isi nee au naktuakai, intok in nok lutu’uriata a’ bo’o jooriaka, yee a’ majtabaekai, intok junue betchi’bo a’ jo’awata to’o sika’ateko, oo jume’ aamak werim to’o sika’ateko, intok kia a’ jubiawata intok a’ yoemiawaim juni’i to’o sika’ateko, intok waj bwiawata to’o sika’ateko, 30 ju’u inien aukame, che’a juni san, si’imeta juka’ a’ su’u tojaka’uta bepa, i’an, inime’e taewaimmetchi, che’a bu’uuk atteane, jume’ Liojpo betana aamak werimtuneeme, intok yoemiamtuneeme, intok yu’in jo’araata jipu’unee a’ mabettune’po, intok waj bwiawam juni’i. Taa junuentaka juni’i, watem betana omtanaa. Intok juka’ jiokot au a’ bicha’u, jiba aet aune. Taa chukula, Liojtau bicha juka’ yuu jiapsiwame aet aune. 31 Taa juebenaka jume’ che’a emo eeyame, juname’e junen, aman che’a ko’om’eeyarimtune. Intok juebenaka jume’ ka emo che’a eeyame, juname’e junen, aman che’a eeyarimtune. 32 Intok bo’ot, Jerusaleneu bicha jikau bo’okamtat kateka, Jesus bat weyen, a’ majtim intok aet cha’aka kateka, aman Jerusaleneu bem yajine’ewi aman, emo majjaituaka juni’i, aet cha’aka kaaten. Bwe’ituk aman, bempo’im betchi’bo, ka tu’ik au machian. Junak intok ju’u Jesus, jume’ woj mamni ama wooim a’ majtimmeu, junama’a bo’ot omot bicha bempolaim yeu wikeka, junama’a bempolaimmeu, si’imeta waka’a au ya’anaa’uta ameu teuwaak: 33 âI’an te Jerusaleneu yajako âtiiaâ, junama’a, ju’u emo benasi yoeme, te’opopo yo’o yaa’uchim mampo intok jume’ maejtom mampo su’u tojitune. Intok a’ me’ena’ betchi’bo, ta’abwi yoemrata mampo su’u tojitune, junuen nau a’ wepul lutu’uria yaakai. 34 Junama’a intok, juname’e a’ beebaka, jaana a’ jiawaane. Intok aet im chit wat wattine. Intok im a’ me’ene. Taa juna’a, baji taewaita weyeo, jiabijtene âti ameu jiiak. 35 Junak’intok, ju’u Jakoobo’ teame, intok ju’u Joan teame, Sebereo’ teamta u’usim, Jesujtau rukteka, inienim au jiia: âAchai âtim au jiiakâ. Itom eu a’awa’uta, itom a’ ya’ariane âtim au jiiak. 36 Aapo intok: âJitasa eme’e waataka âtiiaâ, enchim nee a’ ya’aria’ii’a âti am temaek. 37 Bempo intok: âIto tana âtiianâ, senuk em batatana yej betchi’bo, senuk intok, em mikko’otana yej betchi’bo, itom junen autua’e âti au jiiakâ, emak ama an betchi’bo, enchi yo’otaka yejteko. 38 Jesus intok am yoopnaka: âTua em ka ju’unea âti ameu jiiakâ, ju’u enchim a’awa’ut. Jaisa eme’e si’imeta juka’ ko’okosi machik neu weyemta, intok waka’a in jiapsipo, ko’okosi in inne’enee’uta, jaisa eme’e nele benasi a’ inne’ene âti am temaek. 39 Bempo intok: âJeewi âtim a’ yoopnak. Jesus intok inen ameu jiiak: âLutula wee’po âtiiaâ, inien neu aunemtat betana, wate weeme emou aune âtiiaâ. Intok a eme’e a’ inne’e sakane. 40 Taa batatana senuk neu yejtenemta, intok mikko’otana senuk neu yejtenemta, junaka’a weemta, inepone ka a yeu am pu’a. Taa wame’e Lioj’achaita betana yeu pu’awame, juname’e junuen ama jote’etuanaa âti ameu jiiak. 41 Jume’ waate, woj mamni a’ majtim intok, inien jiame jikkajaka, Jakoobo’ teamta intok Joan teamta emo ameu omtituan. 42 Taa ju’u Jesus, si’imemmeu chaaeka, inen ameu jiiak: âEme’e tu’isi ju’unea âtiiaâ, inim bwiapo, jume’ tekiataka ya’uttuko, yoemratau au yo’o joaka, nesawamta weetua. Taa juname’ebepa ket aane, ame bepa nesaweka, bempo’im juni’i saweme âtiiaâ. 43 Taa emo nasuk ka inien weye. Bwe’ituk kia jabetaka juni’i, emo nasuk au yo’o joobae’eteko, juna’a, che’a, enchim si’imem nesauta jooriane âtiiaâ. 44 Intok kia jabe juni’i, emotana, bat au yo’o joobaeme, juna’a, emou si’imemmeu, nesaureopo tawane âtiiaâ. 45 Bwe’ituk ju’u emo benasi yoeme, kaabeta, nesauta a’ ya’ariane’ betchi’bo a’abo yepsak. Taa che’a juni san, aapo, si’imem nesauta ya’ariabaekai a’abo ameu yepsak. Intok kia a’ jiapsiwata juni’i, juebenam betchi’bo nenkine âtiia. 46 Junak intok, bwe’u jo’ara, Jeriko’ tea’u bicha sajak. Junama’a intok, Jeriko’ tea’po, a’ majtimmak yeu siika. Intok juebena yoemem ket aamak sajak. Senu yoeme, liptitaka, Bartimeo’ teame, Timoteo’ teamta u’usi, juna’a bo’o mayoat kateka netanen. 47 Intok aman weyemta, a’ Jesus nasareeno’otuka’po aman, a’ jikkajaka, inen jiaka chaitaitek: âJesus âtiiaâ, Labii’ teamta u’usi, nee jiokole’e âti au jiakai. 48 Intok juebenaka, ka jaiti a’ jiusaeka, au omten. Taa juna’a che’a juni san kusisi chaaeka inen jiian: âLabiituka’utat yeu simria, nee jiokole’e âti jiian. 49 Junak intok, Jesus, kikteka, junae yoem liptitau chaitebok. Junau intok inen jiuwan: âAet yoem’ea’e, kikte’e. Bwe’ituk aapo eu chaae âtim au jiiak. 50 Junak intok juna’a, a’ jijine’um, kia ama to’o kikteka, Jesujtau bicha sikaa, aman au yepsak. 51 Jesus intok inen au noktaitek: âJitasa empo nee enchi ya’aria i’a âti a’ temaek. Juna’a yoem lipti intok: âAchai âtiiaâ. Juchi in bitne’ betchi’bo, in pusim tu’ute’e âti au jiiak. 52 Jesus intok inen au jiiak: âEm jiapsipo em a’ suale’ betchi’bo, ka jain eaka weene. Juche’e bitne’e âti au jiakai. Junak intok sep bittaitek. Intok Jesujtat cha’aka katemmak, amemak siika.