MATEEO 26

1 Junak juka’ Jesujta, si’imeta inika’a jaibu a’ teuwaasukai, jume’ a’ majtimmeu: 2 âEnchim jaibu ju’unea’a benasia, wooi taewaim be’ee, ju’u bwara jisu’awaka pajkonaamta aet weeneo. Ju’u intoko emo benasi yoeme, watem mampo su’u tojitunee junuen kuuset a’ popontune’ betchi’bo âti ameu jiiak. 3 Juname’e taewaimmet jume’ te’opopo tekiakammeu yo’owe, jume’ Moiseejtuka’uta betana nesaurim yee majtame intok jume’ juriommeu che’a yo’owe, inime’e, ju’u te’opopo tekiakammeu che’a yo’owe, Kaipaaj teamta bwe’u karipo ama yaajiwa’po emo nau tojak. 4 Junama’a inime’e junuen juka’ Jesujta junuen a’ bai ta’aaka a’ bwiseka intok a’ me’ betchi’bo aet nau etejok. 5 Taa inime’e: âKa pajko taewaimmetchi a’ bwijne, junuen ju’u yoemratau ka yanti elwamta ka ameu ya’a betchi’bo. 6 Jesus, ili jo’ara Betaania’ tea’po aanen, senu Simon teamta jo’apo. Ini’i, Lepra’ teamta ko’okoak ti ta’eewame. 7 Senu jamut intok, jita’apo tosai tetae ya’aripo, ochokok ba’ata benak tua win jubaka, unnaa beje’emta weiyaakai au ruktek. Junak, juka’ Jesujta mesau a’ kateko, aapo kobat, junaka’a ba’ata si’imeta aet yaak. 8 Jume’ Jesujta majtim junak, inika’a bichakai, o’omtek intok inime’e: âJaisa betchi’bo inika’a kia beuti a’ wo’otak âti jiu japtekâ. 9 Ini’i, yu’in tomipo a nenkitun. Junuen jume’ jiokot eame am ania betchi’bo âti jiakai. 10 Ju’u Jesus inika’a jikkajaka intok inimmeu: âJaisaaka eme’e inia jamuttau suua. Ini’i, aapo’ik neu ya’ari, tu’uwa jiba âti ameu jiiakâ. 11 Bwe’ituk jume’ jiokot jiapsame eme’e jiba inim emo mak am bitne, taa nee eme’e ka jiba inim emo mak bitne. 12 Ju’u inika’a jamutta ya’ari junuen inika’a ba’ata benak win jubak net a’ ya’arikai, iniae aapo, nee ma’atuneeo juka’ net ya’a’eewamta jaibu a’ ya’ari. 13 Lutu’uriapo ne inen emou jiia, jak juni’i, inika’a nok lutu’uriata a’ teuwaawa’po si’ime aniatchi, ket inika’a jamutta ju’u a’ ya’ari teuwaatunee junuen aapo’iku waatina’ betchi’bo. 14 Junak intoko jume’ woj mamni ama wooika, Jesujta majtim betana, seenu, Juuras Ijkarioote’ teame, te’opopo tekiakammeu yo’owemmeu sikaa, amemak etejok. 15 Intok ini’i: âJaikiksa eme’e nee makne, junuen juka’ Jesujta enchim mampo in a’ su’u tojine’ betchi’bo âti ameu jiiak. Junako bempo, senu taka ama woj mamnik tosai tomim a’ beje’etuak. 16 Junama’a naateka ju’u Juraj teame, junammeu juka’ Jesujta su’u toji betchi’bo, jakwoo che’a a’ tu’ireaka’uta bo’o bichan. 17 Bat ju’u taewait, jume’ paanim ka reberuakame bwa’awaka pajkota aet naateeo, jume’ Jesujta majtim Jesujtau rukteka intok inen au nattemaek: âJakunsa empo, juka’ pajkot kupteo em bwa’anee’uta, itom a’ tu’ute i’a âti jiakai. 18 Aapo inen ameu jiiak: âBwe’u jo’arau eme’e katnee, aman inia senu yoemta a’ jo’awi. Junama’a intok iniau eme’e: “Nee betana si’imeta aet chupnee’u, ju’u taewai yuma’asek. Intok jum em jo’apo ne, jume’ in yeu pu’arimmak, juka’ pajkot joowamta a’ chupa’abae”, ti jiia âti eme’e au jiune. 19 Jume’ a’ majtim, Jesujta am saweka’po aman aayuk. Intok pajkot kupteo bwa’aneemta yaakai. 20 Junak tukaariau yuma’aseka, ju’u Jesus, jume’ woj mamni ama woika yeu a’ pu’arimmak mesau ruktek. 21 Bempo’im intok ketuni ji’ibwaao, aapo: âLutu’uriapo ne inen emou jiia, emo betana senu nee yeu bwijne âti ameu jiiak. 22 Junak intok bempo tua emo sioktuak. Intok inime’e we’epulaka: âAchai, jaisa inepo juna’atunee ja’ani âti au nattemai japtek. 23 Jesus intok inime’e: âWa’a in pu’atopo nemak ji’ibwakame, ini’i juna’atunee wa’a nee yeu bwijneeme âti am yoopnakâ. 24 Ju’u emo benasi yoemtau, Liojta nok lutu’uriapo aapo’ik betana junuen a’ ji’ojteituka’po aman au chuppe. Taa tua jiokot au machine, ju’u yeu a’ bwijneemtawi. Inia o’outau che’a juni’i tu’i ean, ju’u ka yeu a’ yoemtu’ea’u âti jiiak. 25 Junak intok nookak ju’u Juuras, ju’u aapo’ik yeu bwijneeme intok: âYee majtame, jaisa tua inepo juna’atunee ja’ani âti au jiiak. Jesus: âJeewi, empo juna’a âti a’ yoopnak. 26 Bempo’im ketuni ji’ibwao su, ju’u Jesus, paanim nu’uka, ame betchi’bo Liojta baisaek. Intok juname’e rebektasukai, jume’ a’ majtimmeu am bwisek: âAke’em am bwa’ee, ini’i in taka o’oben âti ameu jiakai. 27 Chukula ket juka’ pa’asi ba’awata ama ayuka’u nu’uka, ae betchi’bo Liojta baisaeka intok inika’a bempo’immeu bicha a’ bwisek: âSi’ime eme’e inika’a ji’ine âti jiiakâ. 28 Bwe’ituk ini’i in ojbo o’oben, Liojta mak bemelasi emo tu’utewamta a’ lutu’uriatuka’uta a’ teuwaame. Intok ini’i, juebenammeu tu’ineeka, bem ka tu’uwa ya’arim betana am jiokoi betchi’bo wo’otituneeme âti jiiakâ. 29 Taa inepo ne inen emou jiia, inika’a pa’asi betana ba’ata, kannee intok emomak a’ ji’ine, ju’u taewait, chukula in achai che’a yo’otaka a’ kateka’u, pa’asi ba’awata bemelaka ka inile benak, itom nau a’ ji’ineeo tajtia. 30 Intok chukula, jume’ bwiikim bwiksuka, Oliibo’okawi’ tea’u bicha yeu sajak. 31 Junak intok ju’u Jesus inimmeu: âSi’ime eme’e inia tukaariat nemak enchim ea’uta a’ koptane âti ameu jiiakâ. Bwe’ituk jum Liojta nok lutu’uriapo: “Juka’ bwaram suuamta ne a’ me’ene, jume’ bwalam intok na’ikimtune”, ti ji’ojtei. 32 Taa chukula, inepo kokkoarim nasuk jiabijtesuko, jum bwiaraa Kalilea’ tea’u ne emo pat anne âti ameu jiiak. 33 Junak intok ju’u Peeo: âSi’imem junuen emak bem ea’uta am koptak juni’i, inepo ne kaibu junuen aune âti au jiiak. 34 Ju’u Jesus junak: âLutu’uriapo ne eu inen jiia, inia tukaariat, totoi o’owiata kee a’ kuseo, empo, temaiwaka, bajisi ka nee emo ta’a’ati jiune âti au jiiak. 35 Ju’u Peeo: âKia nee emak me’etuneeka juni’i, kannee ee betana tiune âti au jiiak. Intok si’ime jume’ a’ majtim ket jiba junaen jiian. 36 Junak intok ju’u Jesus, jume’ a’ majtimmak, aman jum Jetsemani’ tea’u yepsak. Junammeu intok: âInim jooye, ket imin, Liojtau bicha ne noka’u tajtia âti ameu jiiak. 37 Intok Peota intok wooi jume’ Sebereeo’ teamta u’usim nunuka, junama’a tua siokaka intok ka allee taitek. 38 Junak intok aapo inimmeu: âTua nee ama butti ka ine’emaisi sioka. Inim eme’e tawane, intok nemak eme’e eaka ka kokotne. 39 Junako ju’u Jesus, juchi ili bichau bicha sikaa, intok tonommea weeka, bwiau ko’om cha’aka, Liojtau bicha nookak: âIn yo’owa, a junuen yeu a’ weyeo juni’i, inika’a bettesi jiokot machika neu weyemta, ka junuen yeu a’ weetuane. Taa ini’i, ka in ea’po amantune, taa tua em junen ea’po amantukai âti jiakai. 40 Junak intok, jume’ yeu a’ pu’arim tawala’u notteka intok kokochemmeu yepsak. Peotau intok: âJaisa eme’e kia senu orapo juni’i, ka kokocheka a in taawak ja’ani âti ameu nattemaekâ. 41 Kate’em kokkoche. Intok Liojtau bicha em emo nokria junuen ka tu’ikut ka enchim ji’opne’ betchi’bo. Lutu’uriapo eme’e tu’ikut jiapsek, taa ju’u inim enchim takaa, tua ka au yuuma âti ameu jiiak. 42 Inia mak, woosa aman sikaa: âIn yo’owa, inika’a jiokot neu weenemta, jiba junuen a’ utte’atuneo, junako, tua em ea’po amantune âti jiaka Liojtau bicha nookak. 43 Sep notteka intok juchi jume’ yeu a’ pu’arim kokochemmeu yepsak. Bwe’ituk inime’e yetem ka yu’een. 44 Inime’e kia am to’o sikaa, intok iniamak bajisi, juchi Liojtau bicha nokbaeka siika, jiba juka’ bat a’ teuwaaka’uta au teuwaakai. 45 Junak intok jume’ a’ majtim tawala’u nottek intok: âJaisa eme’e ketun yum jo’eka kokkoche ja’ani. Yuma’asuk ju’u oora juka’ emo benasi yoemta aet ka tu’i yoememmeu a’ su’u tojinaa’u âti jiiakâ. 46 Jote’em, jante bu. A’abo weye ju’u nee yeu bwijneeme. 47 Jesujta ketun a’ nokao su, junak ju’u Juuraj teame ama yepsak. Ini’i, jume’ woj mamni ama woika, Jesujta yeu pu’arimmak na’ikiatuka’u. Intok wate juebenaka aamak kaaten, tettebe kuchi’im intok kutam weiyaakai. Inime’e, te’opopo tekiakammeu yo’owem intok jume’ junama’a juriommeu che’a yo’owem betana katekai. 48 Ini’i Juuras, ju’u yeu a’ bwisekame, senu machilaata am tejwaalatukan: âJu’u, in aet tentenee’u juna’atune. A’ bwiseka a’ weiyaane âti jiakai. 49 Junak intok aapo, ju’u Jesujtau rukteka intok: âKetchi allea, yee majtame âti au jiiak. Intok aet tentek. 50 Ju’u Jesus: âJalla’i, jitasa empo a’abo nu’usek âti au jiiak. Junak inime’e au rukteka intok aapo’ik Jesujta bwiseka intok a’ nuk sajakai. 51 Ketun ama am aneosu, seenu, Jesujtamak eame, jume’ tebe a’ kuchi’im yeu wikeka intok juka’ te’opopo tekiakammeu yo’ota sawee’u nakammet a’ chuktak. 52 Junak intok ju’u Jesus iniau: âJume’ em tebe kuchi’im bem weeka’po am kecha âti au jiiakâ. Bwe’ituk si’ime wame’e bem tebe kuchi’immea nassuame, inime’e ket tettebe kuchi’immea su’atune. 53 Empo tu’isi ju’unea, inia betchi’bo in yo’owabeu bicha in a ino nokria’po, intok i’an lautipo, woj mamni ama wooika batayoonim bepa, ankelesim aapo’ik neu bittua’ea’po. 54 Taa junuentuko, kaachin yeu yumaa ean, jum Liojta nok lutu’uriapo junuen nee betana utte’a a’ chupne’po ju’u ji’ojtei. 55 Junak intok ju’u Jesus jume’ a’ bwijbokammeu: âEme’e, tettebem kukuche’ekai intok kukutakai a’abo yeu sajak nee jita etbwareotuka’a benasi nee bwijbaekai. Chikti ta’apo jum te’opopo nee emo nasuk aneka yee majtan intok junak eme’e ka nee nuk sajak. 56 Taa si’ime ini’i inien weye, juka’a, jume’ bat naataka Liojta betana ju’uneetuawaka, jum Liojta nok lutu’uriapo bem teuwaaka’uta a’ chupne’ betchi’bo. Junak intok si’ime jume’ Jesujta majtim, aapolaik su’u tojaka, tennek. 57 Jume’e, juka’ Jesujta bwisekame, Kaipaaj teamtau, ju’u jume’ te’opopo tekiakammeu che’a si’imemmeu yo’otau a’ tojak. Junama’a jume’ Moiseejta betana nesaurim yee majtame intok jume’ juriommeu che’a yo’owem emo nau tojilamtuka’awi. 58 Taa ju’u Peeo, mekka aet cha’aka weyen, jum junama’a che’a yo’o ya’arita bwe’u kariu kimuwa’u tajtia. Junama’a ini’i kibakekai. Intok jume’ waate junama’a ya’uraata betana yee suuatuawammak yejtek. Junuen junaka’a weyemta, jachin yeu a’ weene’po a’ ju’uneiyaabaekai. 59 Jume’e, jum te’opopo tekiakammeu yo’owe, ket jume’ ama juriommeu yo’owe intok si’ime ju’u ama nau yo’oraa, inime’e, senuk Jesujta beje’eka, ka lutu’uriata teuwaanemta jaiwan. Junuen nesaubaekai a’ me’etune’ betchi’bo. 60 Taa inime’e, kaita a’ beje’eka ayukamta ju’uneiyaak. Juebenaekan o’oben, jume’ aman yajaka intok aa noki’ichiata teuwaakame. Taa inimmet chukula, woika, ka lutu’uriata teuwaaka ama yajak. 61 Inime’e: âIni’i o’ou, sejtul inen jiiak: “Juka’ Liojta te’opota inepo a’ tatabe, intok baji ta’apo ne juchi a’ yecha’aneekai”, ti jiakai. 62 Junak ju’u, jum te’opopo tekiakammeu che’a yo’owe, kikteka intok Jesujtau: âJaisa empo ka montibae ja’ani. Jitasa ini’i, inime’e enchi beje’eka teuwaa’u âti au jiiak. 63 Taa ju’u Jesus, kaita a’ yoopnak. Junak intok ju’u jume’ te’opopo tekiakammeu che’a yo’owe: âJu’u Lios, jiba yuu jiapsamta betana lutu’uriaka ne, inepo lutu’uriata enchi teuwaa i’a. Empo ju’u Krijto, ju’u Liojta yoemiatuko, itom tejwaane âti au jiiak. 64 Ju’u Jesus iniau: âInepo ne juna’a em a’ teuwaari benasi âti au jiiakâ. Intok ket ne inen emou jiia, juka’ emo benasi yoemta, Lios, si’ime utte’akamta, a’ batatana betana kateka intok inika’a, teeka betana namupo ko’om weyemta, eme’e a’ bitne âti au jiiak. 65 Junak intok ju’u te’opopo tekiakammeu che’a yo’owe, tua ka a’ tu’uree’uta teuwaakai, a’ supewam siutak, intok: âIni’i o’ou ju’u a’ noka’ue, Liojta beje’eka ka tu’ik teuwaala âti jiiakâ. Iniae, ju’u a’ beje’eka nokneeme ka utte’atune. Eme’e a’ jikkajila, Liojta beje’eka juka’ ka tu’ik a’ teuwaaka’uta. 66 Jaisa emou maachi. Bempo: âKa tu’ika aet aayuk intok ini’i me’etunee jiba âti jiiak. 67 Junak intok pujbat aet chit wattiwak. Intok ko’okosi joowan. Wate intok pujbat a’ chonan. 68 Intok inime’e: âEmpo ju’u Krijtotakai, ka ju’uneakai jabesa junuen enchi chochonak âti au jiian. 69 Junuen a’ weyeo su, ket ju’u Peeo junama’a tebatpo wajiwa tana ketun katekan. Intok senu jamut ama sawame, au rukteka: âEmpo ket, Jesus ju’u Kalilea’ tea’u jometamak weaman âti au jiiak. 70 Taa ju’u Peeo, si’imem bichapo: âKannee ju’unea jitat em noka’apo âti jiaka, ka au a’ ta’a’ati jiiak. 71 Juka’ Peota jaibu yeu a’ simbaeo su, junak juchi senu jamut a’ bichaka intok jume’ ama anemmeu: âIni’i ket, Jesus, jo’ara Nasaret tea’u jo’aakamtamak weaman âti jiiak. 72 Intok juchi wee’po ju’u Peeo, tua lutu’uriata au noka’ati jiaka: âKannee a’ ta’aa junaka’a o’outa âti jiiak. 73 Che’a chuubatuka jume’ junama’a ane’um, Peotau rukteka: âLutu’uria, empo ketchia junamemak weye. Bwe’ituk junuen em noka’ut juni’i, empo ju’unakkiachi âti au jiiak. 74 Junak intok ini’i, jita ka tu’ik au chupne, ka a’ junuentuko, tua lutu’uriata au noka’ati jiaka: âKannee a’ ta’aa inika’a o’outa âti jiakai. Junama’a lautipo senu totoi o’owia kukusuk. 75 Junak ju’u Peeo, Jesujta au teuwaaribeu wawaatek: “Juka’ totoi o’owiata kee a’ kukuseo, temaiwaka, bajisi empo ka emo nee ta’a’ati jiulatune”, ti a’ jiaka’u. Ju’u Peeo intok junama’a yeu sika intok a’ juiwaka tua bwaanak.