MATEEO 19

1 Ju’u Jesus, chukula inika’a teuwaasukai, jum bwiaraa Kalilea’ tea’po yeu sikaa, jum bwiaraa Jurea’ tea’po, batwe Joran tea’po, ta’ata ama yeu we’e betana aman yepsak. 2 Yoemra juebenaka aamak sajak. Intok junama’a aapo, wame’e ko’okoeme emo am ine’etetuak. 3 Junak intok jume’ paiseom teame, waate Jesujtau ruktek junuen jita’apo a’ ji’optuabaekai intok inime’e: âJaisa seenu, jita betchi’bo juni’i, juka’ a’ jubiawata jimmaa betchi’bo, ya’uraatau, junae betchi’bo ji’osiam a ya’atebo ja’ani âti au nattemaek. 4 Inime’e aapo inen yoopnak: âJaisa eme’e jum Liojta nok lutu’uria ji’ojteita kee a’ bicha ja’ani, inen, juka’ che’a bat naataka am ju’unaktekamta, o’outa intok jamutta, aapo’ik am ju’unakteka’po. 5 Inen ket ji’ojtei: “Inia betchi’bo san, ju’u o’ou, juka’ a’ achaiwata intok juka’ a’ aewata am to’o simnee intok junuen ju’u a’ jubiawamak jiapsine. Intok inime’e junuen woikai, wepul yoemta beasi tawane." 6 Junuen san inime’e jaibu ka wooi benane, ala wepul yoemta benakai, inia betchi’bo ju’u inim yoeme, juka’ Liojta wepu’ulai benasi a’ ya’ari, kaachin a am na’ikimtene âti ameu jiiak. 7 Junak intok inime’e: âJaisaaka junen ju’u Moiseejtuka’u, juka’ jubiarita ya’uraatau ji’osia ya’arita a’ makaka junae a’ jimmaa betchi’bo aet nesawek âti au nattemaek. 8 Ju’u Jesus inimmeu: âJiba junuen, tua ka enchim yee nak jiokole’ betchi’bo ju’u Moiseejtuka’u junuen enchim jujubim a enchim am wo’otane’ betchi’bo enchim a’ tu’uteriak. Taa che’a bat naataka ka junuen weyen âti ameu jiiakâ. 9 Inepo intok ne inen emou jiia, ju’u a’ jubi jimaakame, taa ini’i ka juka’ a’ juubi ta’abwiku mak ka tu’isi a’ tawako, intok ini’i ta’abwik jubeko, ka tu’ik ya’arine. Intok kia ju’u jamutta jimaarita a’ jubeko, ini’i ket ka tu’ik ya’arine. 10 Jume’ Jesujta majtim junak inen au jiiak: âInika’a weyemta inien machiako, ju’u kunawaita a’ jubimake, senuk betchi’bo ka jujupwame che’a tu’i âti au jiiak. 11 Ju’u Jesus inimmeu: âIniat ka si’ime a aet ju’unea. Kia wame’e wepulsi Liojta betana a’ ju’uneiyaatuawame jiba âti jiiakâ. 12 Waatek ka nanau machik ayukamta betchi’bo, wate o’owim ka jujjube. Waate ka a jubineeka junen yoemem. Waate intok ket, inim yoemem betana junuen ya’ari ka jujjube. Intok ketun waate, juka’ Liojta che’a yo’otaka a’ kateka’u betana juka’ nok lutu’uriata che’a bem eiya’ betchi’bo ka jujubeka tatawa. Inika’a a’ chupa’aneeme a’ mabetne. 13 Junak intoko waate ili uusim, ju’u Jesujtau tojiwak, aapo’ik amet mamteka intok Liojtau bicha inime’e a’ nokriane’ betchi’bo. Taa jume’ Jesujta majtim, jume’ aman au am tojame, am beje’eka nok japtek. 14 Taa ju’u Jesus inen jiiak: âAke’em am su’u toja jume’ ili uusim, ela’pom a’abo neu katne, intok iniat ka ameu suuane. Bwe’ituk Liojta che’a yo’otaka a’ kateka’u, aman lutu’uriakame, inime’e benasi emo eetuame juname’e âti jiiak. 15 Intok aapo, juname’e ili usimmet mamteka intok am nokriasuka, intok chukula, junama’a a’ ane’epo yeu siika. 16 Senu ju’ubwa yo’otume Jesujta a’ bitbaeka au siika intok ini’i: âTu’i yoeme, yee majtame. Jitasa inepo tu’ik yaaka junuen juka’ jiba yuu jiapsiwamta a’ bitne âti au nattemaek. 17 Ju’u Jesus iniau: âJaisaaka empo tu’i yoeme’eti neu jiia. Kaabe intoko, wepu’ulai jiba tu’ika jiapsame. Ini’i intok ju’u Lios juna’a. Taa empo jiba yuu jiapsiwamta a’ bitbae’eteko, Liojta nesaurim bo’o jooriaka jiapsine âti au jiiak. 18 Ju’u ju’ubwa yo’otume: âJitaa nesaurim ti au jiiak. Ju’u Jesus iniau: âKa yee sussu’ane. Jamutta ka jubeka, ka aamak emo tu’urine. Ka jita e’etbwane. Ka aa noki’ichiata yetet nonokne. 19 Juka’ em achaita intok juka’ em aewata, am yo’orine. Intok empo juka’ ele benasi yoemta, em emo eiya’a benasia a’ nakne âti au jiiak. 20 Ju’u ju’ubwa yo’otume intok: âSi’imeta inika’a inepo in ili usituka’po naatekai ne a’ chupa’i. Jitasa ketun neu be’ee âti au jiiak. 21 Iniau inen jiiak ju’u Jesus: âEmpo yuma’isi Liojta ea’po jiapsibae’eteko, sikaa, si’imeta juka’ em jipue’uta nenkakai, jume’ kaachin emo ania machim a’ mikne. Junak empo, teekau, Liojta yo’otaka a’ kateka’u, che’a si’imek bepa beje’emta intok tu’ik a’ bitne. Chukula empo a’abo neu sikaa, intok nemak eaka jiapsine âti au jiiak. 22 Taa junak, juna’a ju’ubwa yo’otume, inika’a jikkajaka, tua siokaka, ama yeu siika. Bwe’ituk unnaa yu’in jita tu’ik atteakan. 23 Junak ju’u Jesus, jume’ a’ majtimmeu: âTua nee lutu’uriapo ne inen emou jiia, ju’u yu’in tomekamtau tua a’ obiachiaka’po, inika’a, teekau, Liojta che’a yo’otaka a’ kateka’u a’ yebijnee’u. 24 Inika’a ne juchia emou a’ teuwaa, juka’ naikim wokekamta, kameeyo’ teamta, ji’ikia pusimpo yeu a’ weenee’u, che’a ka a’ obiachiaka’u, juuka’a yu’in tomekamta, jum Liojta che’a yo’otaka kateka’u a’ yebijnee’u bepa âti ameu jiiak. 25 Inika’a jiikkajakai, jume’ aapo’ik majtim tua aet suum eak. Intok bempo: âJunuentuko, jabesa tua a jinne’uitune âti emo naas tetemaen. 26 Ju’u Jesus am bitchuka: âInim jume’ yoemem, iniau ka yuuma. Taa ju’u Lios, si’imeku yumaka, a’ jooa âti ameu jiiak. 27 Junak ju’u Peeo: âAchai, itepo te si’imeta juka’ itom atteasuka’uta a’ to’o saka’i, intok itepo emak eaka te emak rejte. Jitasa tua itepo mabetne âti au jiiak. 28 Jesus inime’e inen yoopnak: âTua lutu’uriapo ne inen emou jiia, junak, chukula taewaimmet, si’imeta bemelasi a’ ayuko, juka’ inim emo benasi yoemta che’a eiyaawatchika yo’otaka a’ yejteko, junak eme’e, jume’ i’an inim nemak eaka, nemak rejteme, ketchia woj mamnika intok wooika, jume’ che’a yo’owem jojoye’po eme’e ama amet jote’ene, junuen jume’ woj mamni ama wooika, Ijra’el tuka’uta betana yoemrata a’ ya’uraa bittua betchi’bo. 29 Intok si’ime wame’e inim bem karim to’o sajakame, oo jume’ o’owimtaka oo jaamuchimtaka jume’ amemak werim, oo kia a’ achaiwata oo a’ aewata oo a’ jubiawata oo jume’ bem yoemiam, oo ket bem waj bwiam, junaka’a nemak bem ea’ betchi’bo junaka’a to’o sajakai, inime’e, junaka’a mamni takaasi junae beekik mabetne, intok ketchia, chukula, jiba yuu jiapsiwamta bitne. 30 Taa juebenaka jume’ i’an inim che’a eiyaawaka bitwame, junak che’a ka eiyaanaa. Wate intok, jume’ i’an inim che’a ka eiyaawaka bitwame, junak che’a eiyaanaa.