LUUKAS 22

1 Jaibu yuma’asekan ju’u pajko taewai, jume’ paanim ka reberuakame bwa’anaao, ju’u, bwaram aet jissu’awame pajkopo ta’eewame. 2 Jume’ te’opopo tekiakammeu yo’owe intok jume’ Moiseejtuka’uta nesaurim yee majtame, inime’e, juka’ Jesujta, jachin ayuka bem a’ me’enee’uta jaiwan. Bwe’ituk bempo juka’ yoemrata majjaen. 3 Junak intok ju’u bebeje’eri, ju’u Juraj teamtat kibakek. Ini’i ket ju’u Ijkariootimmea ta’eewame. Ket jume’ woj mamni ama wooim mak na’ikiatuka’u. 4 Ini’i intok, jume’ te’opopo tekiakammeu yo’owemmeu intok jume’ ama nesawemmeu siika, intok inime mak etejok, jachin ayuka aapo’ik juka’ Jesujta ameu a’ su’u tojinee’u betana. 5 Inime’e intok tua alleak. Intok nau eaka, tomita a’ mak rokak. 6 Ju’u Juuraj teame junuen amemak a’ tu’ureka, intok junama naateka a’ bwiseka ameu a’ su’u toji betchi’bo, jakwoo che’a kaabeta aamak ane’uta bo’o bichan. 7 Junak yuumak ju’u taewai, paanim ka reberuaka aet bwabwa’awaao, inim junak, bwalata wasuktemta junaet a’ meme’ewaao. 8 Jesus intok, juka’ Peota intok juka’ Joanta sawek: âEme’e aman sajaka, kupteo, pajkot itom bwa’anee’uta, itoas a’ yaaka ama a’ jipu’une âti ameu jiakai. 9 Bempo intok: âJakunsa empo junaka’a itom a’ yaa i’a âti au nattemaek. 10 Jesus inen am yoopnak: âJunaman bwe’u jo’arau eme’e yajako, seenuk, bwe’u babu soto’ipo ba’am weiyaamta eme’e bitne. Inika’a eme’e, jo’arau a’ yepsa’u tajtia eme’e aamak aman yajine. 11 Intok eme’e, junama jo’arapo yo’otau: “Ju’u yee majtame: Jaksa inim karipo inepo jume’ in majtimmak, pajkot kupteo inepo ji’ibwane, ti jiia”, ti au jiune. 12 Junak intok aapo, junama’a karipo, juchi senu bwe’u kari, bepa katekamta enchim tejwaane. Inika’a jaibu tu’uteita. Junama’a eme’e a’ ya’anee juka’ itom bwa’anee’uta âti ameu jiiak. 13 Bempo intok aman sajaka intok si’imeta juka’ Jesujta tua junuen ameu a’ teuwaari benasi ama a’ bichak. Intok junama’a, inime’e pajkot tukaapo bwa’anaamta ama a’ yaak. 14 Junama’a junak ka machiao yumakai, ju’u Jesus intok jume’ aapo’ik yeu pu’arim, mesau ruktek. 15 Junak intok ju’u Jesus inimmeu: âTua ne lutula wee’po inika’a pajkot tukaapo bwa’awamta emomak ne a’ ya’apean, ketun kee inepo me’etukai âti ameu jiiakâ. 16 Bwe’ituk inepo inen a’ lutu’uria ti jiia, ka intok inika’a pajkopo ka machiao bwa’awamta emomak juchi in a’ bwa’anee’u. Chukula teekau junak achai Liojta che’a yo’otaka a’ kateka’u, i’an inika’a a’ teuwaa’uta in a’ yuma’u tajtia âti jiiak. 17 Junak intok, pa’asi ba’awata ama auka’uta nu’uka, Liojta bai saeka intok: âInika’a em nu’uka, si’ime nau a’ ji’ine âti ameu jiiakâ. 18 Bwe’ituk inika’a pa’asi ba’awata, ka intok nee a’ ji’ine, chukula junak, achai Liojta yo’otaka a’ nesauneeo itom a’ bicha’u tajtia âti jiiak. 19 Chukula ket jume’ paanim nu’uka, Liojta bai saeka junak intok juname’e am rebektaka, bempo’immeu am bwisek inen jiakai: âIni’i in taka o’oben, emou tu’ineeka, jiokot ya’atuka me’etuneeme. Inika’a eme’e, neu waati betchi’bo a’ joone âti ameu jiiak. 20 Ket chukula ji’ibwasukai, juka’ pa’asi ba’awata auka’uta junuen ameu bwisek intok inen jiiak: âIni’i pa’asi ba’awa juna’a, ju’u emou tu’ineeka, bemelasi weyeka, Liojtamak emo tu’utewamta, ojbo in wo’otaka’ue a’ chupiatuka’uta a’ teuwaame âti ameu jiiakâ. 21 ‘Taa ne ju’unea, juka’ nee yeu bwijneemta, inim itom ji’ibwa’po, nemak a’ ane’epo. 22 Bwe’ituk ju’u inim yoeme, Liojta nok lutu’uriapo aapo’ik betana a’ ji’ojteituka’po aman junaen au chupe. Taa tua jiokot au machine, ju’u, junuen yeu a’ bwijneemtawi âti jiiak. 23 Junak intok bempo naas nau nattemai japtek, jabeta tua junen yeu a’ bwijne’po betana. 24 Chukula inime’e, bempo’im nasuk, jabeta ama che’a ameu a’ yo’otunemta au a’ lutu’uriatunee’u betana aet nau etejok. 25 Taa ju’u Jesus inen ameu jiiak: âJume’ inim bwere yoemratau che’a yo’o ya’arim, junaka’a yoemrata am tekoka’a benasia a am kuakta. Intok ketchia inime nasuk jume’ che’a yo’owe, inime’e, tu’ik si’imem jooriame ti ta’eewa. 26 Taa emo nasuk ka junuen weene. Ala emo nasuk ju’u che’a eiyaawame, ini’i, si’imem bepa che’a chukula a’ weye’e benasia au eiyaane. Ju’u intoko nesaweme, ini’i, jume’ waatem nesauta a’ jooria’a benasia au eiyaane. 27 Bwe’ituk inime’e betana, jabesa juna’a ju’u che’a eiyaawame, ju’u mesau rukteka ji’ibwaneeme, oo ju’u, bwa’amta iniau totojame. Ju’u mesau yejteka ji’ibwaneeme juna’a o’oben. Taa inepo, nee inim emo nasuk aneka, jabeta nesauta a’ joa’a benasia nee jiapsa âti ameu jiiak. 28 ‘Eme’e su intok juname’em, jume’e, inim tua obiachiku, sioksi in ino bicha’po, jiba i’an tajtia nemak naj kuakteme. 29 Inia betchi’bo san, inepo, chukula, yo’otaka enchim nemak annee’u betana, lutu’uriata nee enchim makne, in achai Liojta betana in a’ makrituka’a benasia. 30 Junuen junaman, che’a yo’otaka in annee’po, mesau kateka in ji’ibwanee’u, enchim nemak ama ji’ibwane’ betchi’bo. Intok eme’e, jume’ che’a yo’owem jojoye’po jote’ene, junuen jume’ woj mamni ama wooika, Ijra’eltuka’uta betana yoemrata, a’ ya’uraa bittua betchi’bo. 31 Ket inen jiiak ju’u Jesukrijto: âEmpo Simoo, a’ ju’uneiyaane, juka’ bebeje’erita emou suuaka, kia tiikota, jekae naas a’ beba’a benasia enchim a’ ji’optuabae’ betchi’bo, Liojtau bicha a’ noklatuka’po. 32 Taa inepo, nee jaibu Liojtau bicha enchi nokriasula, junuen, jiba Liojtat eaka em a’ suale’uta, ka em a’ koptane’ betchi’bo. Intok empo aet chukula, inia betana tu’isi yeu simlatakai, junak jume’ Krijtopo emak werim inime’e Liojta bem suale’u betana, ka ta’abwisi intok bem eene’ betchi’bo am aniane. 33 Ju’u Simo’o teame intok: âAchai, emak eta’anaaka juni’i, intok kia ne emak me’etuneeka juni’i, jiba ne emak weene âti au jiiak. 34 Taa ju’u Jesus: âInen ne eu jiia Peeo, jiba i’ani, juka’ totoi o’owiata kee a’ kukuseeo, bajisi empo nee betana temaiwaka, ka nee emo ta’a’a ti jiune. 35 Junak intok ju’u Jesus inen ameu nattemaek: âSejtul, junak nee enchim naas saweko, enchim ama nu’u sakanee’uta oo tomi boosata intok kia bocham juni’i ka enchim weiyaane’eti jiakai, jaisa junak jita emou be’eka ja’ani âti ameu nattemaek. Bempo intok: âTua kaita âti au jiiak. 36 Junak intok aapo inen jiiak: âTaa i’ani, wa’a ama a’ nu’unee’uta oo tomi boosata a’ jipueme, ini’i a’ weiyaane. Ju’u intoko ka tebe sisi’iwook kuchi’im jipueme, ini’i jume’ a’ bepa supewam nenkaka junae tomie am jinune. 37 Bwe’ituk inepo nee a’ lutu’uriatune’eti jiia, inika’a, jum Liojta nok lutu’uriapo inen ji’ojteita junuen neu a’ chupne’po: “Intok ini’i, jume’ ka tu’i yoememmak na’ikiatuk”, ti jiamta. Bwe’ituk si’ime ju’u Liojta nok lutu’uriapo nee betana ji’ojtei, utte’a junuen a’ chupnee’u âti ameu jiiak. 38 Junak intok bempo: âYuu achai, woika im aayuk jume’ tettebe sisi’iwook kuchi’im âti jiiak. Aapo intok: âInime’e jibatune âti jiiak. 39 Junak intok ju’u Jesus junama yeu sikaa, jiba aapo’ik aman yeepsa’a benasia, oliibo’okawi’ tea’u bicha siika. Jume’ a’ majtim intok aamak yeu sajak. 40 Junak, jum a’ sika’u yepsakai, inen ameu jiiak: âLiojtau bicha eme’e emo nokriane, junuen ka tu’ik enchim ya’anee’ut ka enchim ji’opne’ betchi’bo âti ameu jiiak. 41 Chukula sep ju’u Jesus, junama’a am ane’epo, che’a bichau jeela siika, senuk tetata a’ mekka a’ jimmaala’abe’emu. Junama intok Liojtau bicha nok betchi’bo tonommea kiktek. 42 Intok: âIn yo’owa, empo junen ea’ateko, inika’a bettesi jiokot machika neu weyemta betana ka nee a’ bittuane. Taa ka in ea’po amantunee taa tua em junen ea’po amani âti jiiak. 43 Junak intok teeka betana senu Liojta ankeles junama au yeu machiak, ini’i junuen utte’ata aet autuasekai. 44 Intok aapo junuen tua jiokot bettesi au bichakai, che’a juni’i bepa Liojtau bicha au nokria simen. Ju’u intok a’ tata bujtiawa, kia bwere ojbo chaktiam benasi bwiau ko’om yojten. 45 Junama’a Liojtau bicha a’ noka’apo kikteka, jume’ a’ majtim tawala’u bicha siika. Inime’e intok siokrimmea yumiataka, kokocheme teak. 46 Junak intok: âJaisaaka eme’e kokoche. Jote’em intok Liojtau bicha emo nokrianee junuen ka tu’ikut, ka enchim ji’opne’ betchi’bo âti ameu jiiak. 47 Juka’ Jesujta junama’a ketuni a’ nokao su, waate juebenaka ama au yajak. Ju’u Juuraj ti teaka’u, ini’i jiba jume’ woj mamni ama wooika Jesujta yeu pu’arimmak na’ikiatuka’u, juname bepat weyen. Intok ini’i Jesujtau ruktek a’ pujbawat aet tente betchi’bo. 48 Junak ju’u Jesus: âJuuras, jaisa empo inien aet tenteka, juka’ inim emo benasi yoemta, yeu a’ bwiseka, watem mampo a’ su’u toja ja’ani âti au nattemaek. 49 Jume’ Jesujtamak rejteme, juka’ ama weyemta bichakai aapo’iku: âAchai, jaisa tua itepo inime’e tettebe sisi’iwook kuchi’immea nassuanee ja’ani âti au nattemaek. 50 Jume’ Jesujta mak rejteme betana, seenu, ju’u te’opopo tekiakammeu yo’ota sawee’uta, batatana naka chukti a’ beebak. 51 Taa ju’u Jesus: âKate’em ameu suua, ini’i jibatune âti jiiak. Junak intok ju’u Jesus, junaka’a ya’uraapo sawamta nakammet mamteka, a’ tu’utek. 52 Junama sep, te’opopo tekiakammeu yo’owemmeu intok jume’ te’opopo nesaweme intok ju’u yoemratau yo’owemmeu, jume’ a’ weiyaabaeka aman au yajilammeu: âEme’e tettebem kukuche’ekai intok kukutakai, nee jita etbwareo tuka’a benasia eme’e a’abo neu yeu sajak âti ameu jiiakâ. 53 Junako chikti ta’apo jum te’opopo nee emo nasuk aneeo, eme’e kia juni’i ka neu suuak. Taa i’an ka machiku emou tu’i, juka’ bebeje’erita utte’ata emot ayuka a’ weyeo. 54 Junak intok inime’e, juka’ Jesujta bwiseka, ju’u te’opopo tekiakammeu che’a yo’ota kariu aman wajiwa a’ tojak. Ju’u Peeo intok mekka aet cha’aka weyen. 55 Junama’a wajiwa, waate jum bwe’u tebat nasuku nayaka intok junama ameu jootek. Ju’u Peeo intok ket amemak ama yejtek. 56 Junak intok senu jamut, junama sawame, aapo’ik junama tajiu katekamta bichakai, tua a’ bitchuka, intok: âIni’i o’ou ket Jesujtamak weaman âti jiiak. 57 Taa ju’u Peeo, ka a’ lutu’uria’ati jiubaeka: âKannee a’ ta’aa âti jiiak. 58 Che’a chukula intok juchi senu a’ bichaka: âEmpo ket juname betana weye âti au jiiak. Taa ju’u Peeo: âE’e, kannee juna’a âti jiiak. 59 Che’a chukula, jumak senu orata weyekai, juchi senu ket: âTua lutu’uriapo ini’i yoeme aamak weaman bwe’ituk Kalilea bwiaarapo joome âti jiiak. 60 Junak intok ju’u Peeo inen jiiak: âEmpo achai, tua kannee ju’unea jitat em etejoo’ut âti jiiak. Jiba junama lautipo juka’ Peota ketuni a’ nokao su, totoi o’owia kukussuk. 61 Junak intok ju’u yo’owe Jesukrijto au bicha kuakteka junama’a Peotat remtek. Ju’u Peeo intok, ju’u yo’owe Jesukrijtota au teuwaala’u wawaatek: “I’an empo, totoi o’owiata kee kuseo, bajisi empo ka nee emo ta’a’ati jiulatune”, ti au a’ jiaka’ubewi. 62 Junak intok ju’u Peeo junama yeu sikaa, intok tua ka alleaka bwaanak. 63 Jume’ Jesujta a’ suuatuawame, ka a’ yo’oreka au nookan intok ko’okosi a’ jooan. 64 Intok a’ puj pattaika, pujbat a’ chonaka au nattemaek: âKa ju’uneaka itom tejwaa, jabeta enchi chochonak âti jiakai. 65 Intok ket wate juebenak au teuwaan junuen ka a’ yo’oribaekai. 66 Yokotuko taewapo, jume’ junama jurio yoemratau yo’owe intok jume’ te’opopo tekiakammeu yo’owe intok jume’ Moiseej tuka’uta nesaurim yee majtame, inime’e emo nau tojak. Intok juka’ Jesujta si’ime ju’u ama ya’uraatau yeu a’ tojak. Junama bempo: 67 âItom tejwaane, jaisa empo juna’a ja’ani ju’u Krijto’ teame âti au jiiak. Aapo inime’e inen yoopnak: âInia betana, lutu’uria ti ne emou jiao, eme’e ka nee sualne âti ameu jiakaiâ. 68 Intok kia nee emou nattemaeo juni’i, eme’e kaibu nee tejwaane. Intok kia eme’e ka nee su’u tojinee juni’i. 69 Taa i’an naateka ju’u inim emo benasi yoeme, Lios, che’a si’ime utte’akamtamak a’ batatana aamak yejtene âti jiiak. 70 Junako sep juname’e si’ime: âJunak su, jaisa empo juna’a ja’ani ju’u Liojta u’usi âti au nattemaek. Ju’u Jesus intok: âJeewi, inepo nee juna’a, jiba enchim a’ teuwaari benasia âti ameu jiiak. 71 Junak bempo inen jiiak: âKaabe intok waatiatune, ju’u a’ beje’eka a’ na’atejoneeme. Jiba itepo te a’ teuwaarita aet a’ jikkajila.