JOAN 21

1 Iniat chukula ju’u Jesus, jume’ a’ majtimmeu juchi au yeu machiak, jum bwe’u bau ba’a Tibeeriaj tea’po bwikola. Inen aapo ayukai. 2 Inimi’i, Simoo Peeo, intok Toomas ju’u wo’ori ti ta’eewame, ju’u Natana’el teame, ini’i jum bwiaraa Kalileapo ili jo’ara Kanaa’ teapo joome, jume’ Sebereeo’ teamta u’usim intok juchi wate woika jume’ Jesujta majtim, inime’e ama nau aanen. 3 Wa’a Simoo Peeo’ teame inimmeu: âKuchum ne yeu bause âti ameu jiiak. Bempo: âItepo ket te aman emak katbae âti au jiiak. Inime’e aman sajaka intok kuta kanoau ja’amuk. Taa bempo junae tukaariat kaita yeu wikek. 4 Junak junama’a jaibu yeu matchuu, Jesus junama’a bawe mayoat yeu machiak. Taa jume’ a’ majtim ka ju’unean, juka’ ama anemta aapo’ik juna’atuka’po. 5 Junak ju’u Jesus, inimmeu: âUusim, jaisa eme’e kee jita yeu wike ja’ani âti ameu nattemaek. Bempo intok: âKaita âti a’ yoopnak. 6 Junak intok ju’u Jesus, inimmeu: âBatatana bicha am jimmaanee jume’ jite’im, intok eme’e junama’a yeu am wikne âti ameu jiiak. Inien inime’e aayuk. Intok chukula bempo, jume’ jite’im junama ba’apo ka a yeu am wiken, kuchum inim tua yu’in am weiyaakai. 7 Junako ju’u aapo’ik majti, Jesujta tua nake’u, ju’u Peotau: âJu’u itom yo’owa ama weama âti au jiiak. Ju’u Simoo Peeo, junaka’a juka’ bem yo’owata ama ane’uta a’ jikkajakai jiba, tajo’po kobateka, ba’au au jimaak, mayoau tajtia bajumbaekai. Bwe’ituk tajo’owattilatukan. 8 Jume’ waate Jesujta majtim, kuta kanoapo ba’a mayoau yeu yajak. Inime’e, jume’ jite’im kuchummea tapunim yeu wik sakakai. Bwe’ituk junama’a mayoau tajtia kia jumak mamni taka waaktitukan jiba. 9 Bwiau yeu yajakai, inime’e junama’a taji oubampo kuchuta ama bo’okamta intok ket paanim ama teak. 10 Ju’u Jesus inimmeu: âJume’ kuchum ju’ubwa enchim yeu wikeka’um watem a’abo tojine âti ameu jiiak. 11 Ju’u Simoo Peeo, kuta kanoau ja’amuka intok mayoau tajti jume’ jite’im, kuchummea tappunim yeu wikek. Woo busan taka ama woj mamni ama baji kuchum tukan. Inime’e intok tua juebenaeka juni’i, ka chuktek jume’ jite’im. 12 Junak ju’u Jesus, inimmeu: âA’abo kateka em ji’ibwa âti ameu jiiak. Inime’e a’ majtim betana, tua kaabe au nattemaek aapo’ik jabetuka’ut, bwe’ituk juka’ bem yo’owata ama ane’uta emo ju’unea’ati ean. 13 Junako ju’u Jesus, aman rukteka intok jume’ paanim nu’uka intok bempo’immeu am bwisek. Intok juka’ kuchuta juni’i jiba junaen ameu a’ bwisekai. 14 Inim iniamak ju’u Jesus, a’ majtimmeu bajisi ameu au yeu machialatukan aapo chukula kokkoarim nasuk jiabijtesukai. 15 Junama’a ketwoo, bempo ji’ibwasukai, ju’u Jesus, Simoo Peeotau: âSimoo, Jonaj teamta yoemia, jaisa empo inime’ebepa nee nakke ja’ani âti au nattemaek. Ju’u Peeo intok: âJeewi in yo’owe, empo ju’unea in enchi eiyaa’u âti a’ yoopnak. Ju’u Jesus iniau: âInientuko, empo jume’ ju’ubwa nee sual japteme, bwala aso’olam benasia in eiyaa’um, inime’e am majtaka tu’isi nee am suuariane âti au jiiak. 16 Chukula juchia, iniamak woosa: âSimoo, Jonaj teamta u’usi, jaisa empo nee nakke ja’ani âti au nattemaek. Ju’u Peeo: âJeewi in yo’owe, empo ju’unea in enchi eiyaa’u âti a’ yoopnak. Aapo: âJunuentuko, jume’ nee sualeka, bwaram benasi in eiyaa’um, inime’e nee betana weyemtat am aniane âti au jiiak. 17 Iniamak bajisia aapo: âSimoo, Jonaj teamta u’usi, jaisa empo lutu’uriapo tu’isi nee eiyaa ja’ani âti au nattemaek. Ju’u Peeo intok junak au sioktua taitek junuen, iniamak bajisia: “Jaisa empo tu’isi nee eiyaa”, ti au a’ nattemaeka’ betchi’bo, intok aapo: âIn yo’owe, empo’e si’imekut ju’unea, empo ju’unea junuen in enchi eiyaa’u âti au jiiak. Ju’u Jesus iniau: âJunaentuko, empo wame’e nee sualeka, bwalam benasi in eiyaa’um, nee betana weyemtat am majtaka, nee am suuariane âti au jiiakâ. 18 Iniat empo nee sualne, junak empo bat che’a ju’ubwa yo’otukai, empo em tajo’po kobateka intok empo em yeu weebae’u bicha wewe’aman. Taa chukula, empo jaibu yo’otuitakai, junak em mamam empo na’ikim am to’one, intok ta’abwika enchi tajo’otuane, intok juna’a, ka em weebae’u bicha juni’i, enchi weiyaane âti au jiiak. 19 Inika’a teuwaakai ju’u Jesus, juka’ Peota jachin ayuka, mukuka intok iniae aapo’ik Liojta a’ yo’ori tebonee’uta a’ teuwaak. Chukula intok aapo ju’u Jesus, Peotau: âEmpo jiba nemak eaka jiapsine âti au jiiak. 20 Juchi bicha kuaktekai, ju’u Peeo, juka’ Jesujta majti aapo’ik tua nake’uta, inika’a amet cha’aka weyemta bichak. Jiba wa’a, kupteo ka machiako, Jesujta amemak ji’ibwaka’po aapo’iku pitti kateka’uta, intok ini’i: “Achai, jabesa juna’atune, ju’u enchi yeu bwijneeme”, ti au nattemaeka’uta. 21 Junako, ju’u Peeo inika’a bichakai, Jesujtau: âIn achai, iniau su, jaisa au chupne âti au nattemaek. 22 Jesus inika’a: âJunuen inika’a, chukula nee a’abo notteo tajtia inim nee a’ jiapsi i’ao juni’i, empo inim iniat kaachin eene. Empo jiba nemak eaka jiapsine âti a’ yoopnak. 23 Junako, jume’ Krijto nau sualeme nasuk, inika’a Jesujta majti ka a’ muknee’uta etejowan. Taa Jesus iniau ka junuen ka a’ muknee’uta au teuwaak, ala aapo: “Inika’a, chukula nee a’abo notteo tajtia inim nee a’ jiapsi i’ao juni’i, empo inim iniat kaachin eene”, ti jiiak jiba. 24 Ini’i jiba juna’a ju’u Jesujta majti, inim ae betana etejowame, ju’u inika’a a’ lutu’uriateka a’ teuwaaka intok inika’a weyemta ji’ojtekame. Ite intok ju’unea, si’imeta juka’ a’ teuwaa’uta, lutu’uriataka a’ weye’uta. 25 Ketchia tua juebenaka, wate weyeme aayuk, Jesujta ya’ari, ini’i intok we’epulaka ji’ojte tuko, si’ime jume’ ji’osia ji’ojtei tu’ea’um, kia jumak inim aniapo ka kia ean, ti ne ea. Tua junuentune.