JOAN 19
TBL1 Junako ju’u Pilaato, juka’ Jesujta, sep tua jiokot maisi a’ bepsu tebok. 2 Jume’ sontaaom intok, juya wichakamta nat ko’elaa yaaka, Jesujta kobat a’ yechak. Kutko sikiim intok a’ supetuak. 3 Chukula inime’e, au rukteka: āKetchi allea, empo jurio yoemratau che’a yo’o ya’ari āti au jiiak. Intok inime’e, pujbat a’ chonan. 4 Junako ju’u Pilaato juchi yeu sika intok junammeu: āAke’em a’ bicha. Inim ne yeu a’ tojilaa junuen enchim ju’unee i’akai juka’ ka tu’ik, kaita in aet tettea’po āti ameu jiiak. 5 Jesus intok aman yeu siika, juka’ juyata wichakamta nat ko’elaisi ya’arita, kobat jipuekai intok jume’ kutko sikiim supe simekai. Junak ju’u Pilaato: āIni’i juna’a, ju’u o’ou āti ameu jiiak. 6 Junak jume’ te’opopo tekiakammeu yo’owe intok jume’ te’opopo yee suuatuawame a’ bichaka: āKuuset a’ popon tebone, kuuset a’ popon tebone āti chaai japtek. Junak ju’u Pilaato inimmeu: āEme’e a’ weiyaaka intok junuen kuuset a’ poponnee ma. Bwe’ituk ineponee tua kaita ka tu’ik aapo’ikut tettea āti ameu jiiak. 7 Taa inime’e juriom aapo’iku: āItepo te inim itom ae nesawee’uta a’ jipue. Intok inia nesauripo a’ jia’a benasia a’ muknee’uta au chupne. Bwe’ituk ini’i, Liojta betana a’ yoemiarituka’a benasi au ta’aa tebon āti au jiiak. 8 Inika’a ju’u Pilaato jikkajaka, che’a juni’i majaek. 9 Aapo juchi wee’po junama bwe’u kariu bicha kibakeka intok aapo Jesujtau: āJakunsa empo joome āti au jiiak. Taa ju’u Jesus kaita a’ yoopnak. 10 Junak ju’u Pilaato: āNee empo kaita yoopnabae ja’ani. Jaisa empo ka ju’unea ja’ani, kuuset enchi popon tebo betchi’bo, intok ketchia, enchi su’u toji tebo betchi’bo juni’i, in a nesawe’u āti au jiiak. 11 Ju’u Jesus inika’a: āTua kaita empo yo’otaka em net a nesaunee’uta jipu’u ean, Liojta betana ka a’ maktuko. Inia betchi’bo, wa’a, nee eu tojakame, che’a juni’i ee bepa ka tu’ik ya’ari āti a’ yoopnak. 12 Jiba inim naatekai ju’u Pilaato, jatchin juni’i ayuka, Jesujta a’ su’u tojibaeka ean. Taa jume’ juriom: āInika’a empo yeu su’u tojako, juka’ che’a yo’o ya’arita Sesar teamta, empo a’ beje’eka annee. Inim jabetaka juni’i, aapo che’a si’imem bepa au yo’o joobaeme, ini’i juka’ Sesar teamta, jum Romapo che’a yo’otaka katekamta a’ beje’eka annee āti aet chaaek. 13 Junak ju’u Pilaato, inika’a jikkajaka, Jesujta pa’akun yeeu a’ toji teboka, intok aapo, jum yo’o ya’arim yeyesa’po yejtek. Ebreo nokpo Kabaata’ tea’po. Ini’i nooki, bwiapo teta chitta chibelai, ti jiubae. 14 Inimi’i jaibu senu taewai be’een, Liojta yo’ori betchi’bo bwala jissu’uawaka, pajkota weeneeo. Jaibu jumak luula yejteo. Junak ju’u Pilaato, jume’ juriommeu: āInim aane ju’u, emou che’a yo’o ya’ari āti ameu jiiak. 15 Taa bempo: āMe’etune, me’etune, kuuset a’ popon tebone āti chaaen. Ju’u Pilaato inimmeu: āJaisa inepo inika’a emou yo’o ya’arita kuuset a’ popon tebonee ja’ani āti ameu nattemaek. Taa jume’ te’opopo tekiakammeu yo’owe: āItepo kaabeta intok ta’abwik che’a itou yo’o ya’arita te a’ jipue, waka’a jum bwe’u jo’ara Roma’ tea’po yo’otaka katekamta jiba āti a’ yoopnak. 16 Junak ju’u Pilaato ameu a’ su’u tojak junuen kuuset a’ popontune’ betchi’bo. Bempo intok yeu a’ nuk sajak. 17 Junuen ju’u Jesus yeu siika, juka’ kuujta pu’atekai. Junuen, jum ili kawi Mukia koba’ tea’u yebijneekai. Ebreo nokpo Kolkota’ tea’u. 18 Junama’a, aapo kuuset popontuk. Intok aapo’iku mak ket woika kuusimmet jikat poponwak, aapo’ik kecha’awaka’po nau bicha, Jesujta nasuk tawaakai. 19 Ju’u Pilaato, ji’ojteita kuuset bepa jikat a’ popon tebok: “Jesus, Nasaret tea’po joome, juriommeu che’a yo’o ya’ari”, ti jiamta. 20 Jume’ juriom betana juebenaka inika’a ama ji’ojteita nookak. Bwe’ituk jum Jesujta kuuset a’ poponwaka’po, bwe’u jo’arau ka mekkaekan. Ini’i ji’ojtei intok, ebreeo nokpo intok rieeko nokpo intok latin nokpo ji’ojteitukan. 21 Inia betchi’bo juriom betana jume’ te’opopo tekiakammeu yo’owe, inime’e Pilaatotau: āInika’a ka junuen: “Juriommeu che’a yo’o ya’ari”, ti a’ ji’ojtene. Ala empo: “Ini’i, ju’u juriommeu che’a yo’o ya’ari ti au teuwaame”, ti ji’ojtene āti au jiiak. 22 Taa ju’u Pilaato, inime’e: āJu’u in ji’ojteka’u junuen tawane āti am yoopnak. 23 Chukula jume’ sontaaom, Jesujta kuuset a’ poponsuka, a’ tajo’oriwata nu’uka intok naikisi nat a’ na’ikimtek, inika’a bempo’im we’epulaim betchi’bo. Bempo ket, jume’ tebe tajo’orim bepa a’ jineka’um, am nu’uka. Inime’e intoko, ka jak nau am ji’ikrituka’ betchi’bo, jikat ko’om tajti wepu’ulaikai, 24 jume’ sontaaom: āKatte am siutane āti nau jiiakā. Ala te amet nau ja’atek tu’inee junuen jabeta amemak a’ tawaanee’ut ju’unee betchi’bo āti nau jiiak. Inien chupuk wa’a bat naataka jum Liojta betana ji’osia ji’ojteimpo: “Inime’e, juka’ in tajo’ori nat na’ikimtek, aet nau ja’atekai”, ti a’ jiaka’po. Inien, inika’a junen yaak jume’ sontaaom. 25 Junama’a kuuseu, Jesujta aet poponiu, Jesujta ae intok a’ aewata akkoowa, intok Maria, Kleeopaj teamta jubiawa, intok Maria Maareena’ teame ama aanen. 26 Ju’u Jesus, a’ malawata intok waka’a a’ majtita, tua a’ nake’uta ae naapo weyekamta bichakai, a’ aebeu: āJu’u eu weyekame, em yoemiatune āti au jiiak. 27 Chukula ket ju’u a’ majtibeu: āInika’a eu weyekamta, empo aek āti au jiiak. Intok junama’a naateka, ini’i majti, aapo’ik jo’au a’ jo’ane’ betchi’bo a’ mabetak. 28 Iniat chukula ju’u Jesus junuen juka’ a’ ya’a’ea’uta si’imeta jaibu a’ chupsuka’ut ju’uneakai, juka’ jum Liojta betana ji’osia ji’ojteimpo ji’ojteita a’ chupne’ betchi’bo: āBa’ae ne muuke āti jiiak. 29 Junama’a ili soto’i, binaakre’ teamtae tapunika ama manekan. Junak intok juname’e, junama’a, ba’ata nunu’emta, ejponja’ teamta komoniaka, tebe kuta, isoopo’ teamtat a’ chayaka intok jikau, teniu au a’ noitak. 30 Jesus inika’a binaakreta je’eka, chukula aapo: āJaibu si’ime chupsuk āti jiiak. Junak intok aapo, ko’om kobateka, muukuk. 31 Inimi’i wepul taewai jiba be’een, bwala jisuawaka pajkota weene’ betchi’bo, jume’ juriom intok, jume’ takaam ka kuusimmet aet yum jo’e taewait am tawaa i’an. Bwe’ituk juna’a aet yum jo’e taewai, tua beja yo’oriwaka eiyaawan. Inia betchi’bo bempo, Pilaatotau nookak, jume’ kuuset cha’akame, aapo’ik am wok kotta tebone’ betchi’bo, intok junuen inime’e lauti kokoka, inime’e, bem takaam junama bem ko’om jo’ana’ betchi’bo. 32 Junako jume’ sontaaom aman sajaka, intok bempo junaman jume’ woika aman kuusimmet popontukame, inime’e nanancha nau bicha wokim am kottariak. Jume’ Jesujta mak ama popontukame. 33 Taa inime’e, Jesujtau japtekai, jaibu mukiata bichaka intok inia betchi’bo ka a’ wok kottak. 34 Taa jume’ sontaaom betana, seenu, aapo’ik tebe kuta sisi’iwookta bwawiakamtae, sana’ita betuk a’ so’ak. Inim intok sep, ojbo ba’amak ama yeu siika. 35 Ju’u inika’a inim a’ teuwaame, ini’i a’ bichak. Intok ini’i lutu’uriata nooka. Aapo, lutu’uriata a’ noka’apo ju’unea, intok aapo inika’a teuwaa, junuen ket enchim a’ sualne’ betchi’bo. 36 Bwe’ituk ini’i inien yeu sikame inien tuk, junuen, Liojta betana ji’osia ji’ojteimpo: “Ini’i, ota wepu’ulaik juni’i, ka a’ kottarianaa”, ti jiamta a’ chup betchi’bo. 37 Omot intok ket, Liojta betana ji’osia ji’ojteimpo: “Bempo, waka’a takaata bem so’aka’uta, a’ bitne”, ti jiia. 38 Iniat chukula ju’u Josee’ teame, wa’a ili jo’ara Arima tea’ati teaka’u jo’aakame, ini’i, Pilaatotau nookak, juka’ Jesujta takaawata a’ weiyaabaekai. Ini’i Josee, Jesujta mak eaka a’ sualen, junuen aapo ka au ju’uneiyaa teboika juni’i, jume’ juriom a’ majjae’ betchi’bo. Inika’a, Pilaato a’ nok mabetak. Ju’u Josee intok aman siika juka’ Jesujta takaata a’ nu’u betchi’bo. 39 Ketchia ju’u Nikoreemo’ teame, ini’i bat naataka tukaapo Jesujta mak etejokame, ini’i, senu taka ama woj mamni kiilom betteakamta, miira’ teamta intok alooej teamta nau kuutik aman au a’ nu’upak. 40 Junuen san ini’i Josee intok ju’u Nikoreemo, bempo juka’ Jesujta takaata toboktaka intok bempo, tajo’orim, tettebesi yeu wo’otim, iniae nau kuutia win jubasi ya’arimmea a’ biijtak, inika’a, jume’ juriom jume’ kokolam ma’a betchi’bo, bem a’ joa’a benasia ayukai. 41 Junama’a, jum Jesujta kuuset poponwaka’anaapo, ujyoisi juya etritukan, intok jiba inim, yee ma’a betchi’bo, tetapo wojo’oriata bemelasi ya’atukan, kee jabeta ama ma’awakai. 42 Junama’a bempo a’ teekak juka’ Jesujta takaata. Bwe’ituk ini’i tetapo wojo’oriata ya’ari, junama ka mekkaakai. Intok junama’a jume’ juriom juka’ aet yum jo’e betchi’bo taewaita jaibu abe a’ naate’ betchi’bo.