KRIJTOTA YEU PU'ARIM YA'ARI 12

1 Junako, jiba juname’e taewaimmet, ju’u Eroorej ti teaka, junama yoemratau che’a yo’o ya’ari, aapo junama’a jume’ Krijtota sualeme betana, watem ka tu’isi am bit taitek. 2 Junak juka’ Jakoobo’ teamta, Joan teamtamak werik, tebe kuchi’immea a’ me’e tebok. 3 Intok inika’a aapo’ik yaaka’uta, jume’ juriom a’ tu’urekame am bichakai, aapo juka’ Peota ket a’ bwij tebok. Ini’i yeu sikame, jume’ paanim ka reberuakame bwa’awaao taewaimmet yeu siika. 4 Juka’ Peota bwijsukai, chukula a’ eta’atebok. Intok junama’a, sontaaom, naikisi nanaikika nau a’ suuatuawan. Junuen, Liojta yo’ori betchi’bo, paanim ka reberuakame bwa’awaka a’ pajkosuako, si’ime junama’a ju’u jurio yoemrata bichapo yeu a’ tojaka a’ me’ebaeka ean. 5 Junuen san, ju’u Peeo junama’a a’ eta’ipo katekan, ini’i tu’isi suuawakai. Taa jume’ Krijtota nau sualeme, bempo tua junen jiaka, jiba Liojtau bicha a’ nokria sakan. 6 Jiba junae tukaariatchi, aapo’ik yokoriapo juka’ yo’o ya’ari Eroorej teamta junama’a jurio yoemratau yeu a’ tojineeo, ju’u Peeo, junama’a wooi sontaaom a’ suuame nasuk bichapo wooi sisi’iwook wikiammea suma’itaka kochen. Waate jume’ sontaaom intok junama’a yee e’etawa’po pueetapo ama aneka a’ suuan. 7 Seej chukti intok, achai Liojta betana senu ankeles ama yepsak. Intok junama’a yee e’etawa’po si’imekut taobiakai. Ini’i ankeles intok, juka’ Peota sana’po aet mamteka a’ busak. Intok iniau: âLauti yejte’e âti au jiiak. Junako jume’ sisi’iwook wikiam, mampo ammea a’ suma’im, ko’om wattek. 8 Junak intok ju’u ankeles: âTu’isi’ee tajo’oteka intok bochampo wokte’e âti au jiiak. Junako juka’ Peota junuen auko, ju’u ankeles: âBepa em tajo’oreka’um et tekaka, nemak weye âti au jiiak. 9 Ju’u Peeo junuen junae ankelejtat cha’aka yeu siika. Junuen juka’ ankelejta aamak ane’uta, a’ lutu’uriatuka’ut oo ka a’ lutu’uriatuka’ut tua ka ju’uneakai, ala, junae betana, aapo, Liojta betana jitaa au bittuawa’ati eakai. 10 Taa junuen bempo junama’a jume’ a’ suuatuawaka che’a bat ja’abwekammet wa’am sajaka, chukula intok juchi waate, inime’e bepat ja’abwekammet wa’am sajaka, intok bempo’im pa’akun yeu kat betchi’bo, sisi’iwookie ya’ariu am yajako, ini’i, aapola au etapok. Junama’a bempo yeu sajak, juchi senu bo’ou katekai, ju’u ankeles junama’a a’ to’o siika. 11 Junak ju’u Peeo, ju’une’eaka intok aapo: âI’an nee ju’unea, ka jita ta’abwika, tua a’ lutu’uriatuka’u, ju’u achai Lios a’ ankelwata neu bittuak junuen Eroorejta intok si’imeta juka’a, jume’ juriom neu ya’abae’u betana, nee jinne’uk âti eak. 12 Junau ketun waateka su, ju’u Peeo, Maria’ teamta, Joan Maekoj teamta ae jo’au bicha siika. Junaman jo’arapo intok, juebenaka Liojtau bicha aapo’ik nokriaka ama aanen. 13 Junak intok, junama korau pueetata a’ ponao, senu usi jamut, Roore’ teaka, a’ jabetuka’po a’ bitbaeka yeu siika. 14 Taa i’i, aapo juka’ Peota a’ jiawa ta’aakai, ka pueetata a’ etaporiak, ala aapo, tua alleaka, wajiwa bicha wantek, juka’ Peota ama weeka’uta, jume’ watem tejwaabaekai. 15 Junak intok bempo: âKia beja ee nooka âti au jiiak. Taa aapo tua a’ lutu’uria’ati jiian. Taa junuentaka juni’i, bempo naa buusti: âKa aapo juna’a, ju’u a’ suuame a’ ankelejwa ama weama âti jiiak. 16 Ju’u Peeo intok junama weyeka, jiba ameu a’ poonan. Intok junako, bempo beja pueetata etapokai, intok junama’a a’ bichaka, tua womtek. 17 Taa aapo, am yaatine’ betchi’bo, maammea am tejwaak, intok aapo, bempo’im, juka’ achai Liojta jum yee e’etawa’po yeu a’ nuk sika’uta am etejoriak. Intok aapo bempo’immeu: âInika’a eme’e, ju’u Jakoobo’ teamtau intok jume’ waate Krijtota sualemmeu a’ etejone âti jiiak. Junak intok aapo, junama’a omot bichaa siika. 18 Junama’a yokoriapo jume’ sontaaom nasuk, kaachin an machiwaka emo bwee weiyaawan. Bwe’ituk inime’e, Peota jachin yeu a’ sika’ut ka ju’unean. 19 Ju’u yo’o ya’ari Eroorej teame a’ jariu tebok intok junuen, chukula ka a’ teakai, jume’ sontaaom a’ sua’ummeu chaaeka, am tetemaisuk. Juname’e intok, kaita a jiawitekai, aapo amet nesawak bem su’atune’ betchi’bo. Chukula ju’u Eroores, jum Jurea bwiaarapo yeu sikaa, intok omot bwe’u jo’ara Sesarea’ tea’u jo’atek. 20 Ju’u Eroores, ju’u yoemra, bwere jo’aram Tiiro’ tea’po intok Siroon tea’po jomemmak ka allean. Taa bempo junau noiti betchi’bo, emo nau tu’utek. Inime’e intok, inika’a che’a yo’o ya’aritau chapti weyeka tekilta a’ jooriamta, Blajto’ teamta, au tu’u nokaka, amemak a’ eetuak. Intok bempo, jiba aapo’ik au noktuaka, bemo’im nasuk nau eewamta a’awak. Bwe’ituk ini’i yoemrata, si’imeta bem bwa’ee’uta, junae yo’o ya’ata, a’ bwiaraa betana a’ mabetan. 21 Ju’u Eroores, bempo’im, taewaita aman au bem yajinee’uta am tejwaak. Intok junaka’a taewaita yumako, aapo, junama’a, tajo’ori, che’a yo’o ya’arim sawa’po kobateka intok junama’a yoemrata bichapo, yo’o ya’arim jojoye’ut jikat yejtek. Intok aapo junama’a yo’o nokie ujyoisi ameu nookak. 22 Junako juna’a yoemra, ama a’ jikkajame: âIni’i nokame, ka kia beja yoeme, ala lios ini’i âti chaae japtek. 23 Jiba junama’a lautipo, achai Liojta betana senu ankeles, a’ ko’okoi wettuak, aapo’ik junuen au a’ yo’ori teboka’ betchi’bo, aapo Liojta yo’ori’eaka su. Intok chukula aapo, junae, bwichia bwa’ataka muukuk. 24 Taa Liojta betana ju’u a’ nok lutu’uriawa, che’a juni’i sualwan, intok si’imekut weyeka teuwaawan. 25 Junako chukula, ju’u Bernabee intok ju’u Saulo’ teame junaman bwe’u jo’ara Jerusalen tea’po, bem tekil chupakai, junama’a juka’ Joan Maekoj teamta amemak weiyaaka, bwe’u jo’araa Antiokia’ tea’u bicha nottek.