2 KINGS 3

1 U lan e duw ni ragag nge meruk ko gagiyeg rok Jehoshafat ni Pilung u Judah, me mang Joram nib mo’on ni fak Ahab e pilung u Israel, me par nge yog e thin u Samaria ni ragag nge l’agruw e duw. 2 Me denen nib togopluw ngak SOMOL, machane gathi rib gel e kireb riy ni bod e chitamngin nge chitinngin i Jezebel; me luf nga but fare yaan Baal ni ngongliy e chitamngin ni nguun meybil ngay. 3 Machane, ku bod Jeroboam ni Pilung ni fak Nebat nib m’on rok, i waliy yu Israel nga fithik’ e denen mde tal. 4 Mesha ni Pilung nu Moab e ma chugliy e saf, ma gubin e duw nma pi’ e mokun rok ngak e pilung nu Israel, ni 100,000 e fak e saf nge bunu’en 100,000 e saf. 5 Machane nap’an ni yim’ Ahab ni Pilung nu Israel, me togopluw Mesha nga Israel. 6 Ma kangiyal’ nem me chuw Joram ni Pilung u Samaria me yan i kunuy urngin e yu raba’ i salthaw rok. 7 Me pi’ e thin nge yan ngak Jehoshafat ni Pilung nu Judah ni ga’ar: “Fare pilung nu Moab e ke togopluw ngog; mog ga ra un ngog ngad maelgow ngak?” Me fulweg Jehoshafat ni Pilung, ni ga’ar, “Gu ra un, ke milfag ngom, ma ku errogon e salthaw nge pi os rog. 8 Pa’ ni ngan e kanawo’ e nga darow riy ko mael?” Me fulweg Joram, ni ga’ar, “Nga darow ko fare kanawo’ nib n’uw ni yan nge th’ab daken e ted nu Edom." 9 Ma aram me yan Joram ni Pilung nge fagali pilung nu Judah ngu Edom. Mranod ni medlip e rran, me m’ay e ran rorad, mdakuriy boch ni magey ni fan ngak e pi salthaw nge fapi gamanman ni yad be fek e chugum. 10 Me non Joram ni Pilung nib ga’ laman, ni ga’ar, “I SOMOL e ke pining e re dalip i pulung ney ni nge pi’ nga pa’ yu Moab!" 11 Me fith Jehoshafat ni Pilung, ni ga’ar, “Mogew, bay ba profet u roy nrayag ni ngad fithed laniyan’ SOMOL u daken?” Me fulweg ba tolang ko fare raba’ i salthaw rok Joram ni Pilung, ni ga’ar, “Bay Elisa nib mo’on ni fak Shafat u roy. I ir e immoy ni tama’ayuw rok Elijah." 12 Me ga’ar Jehoshafat ni Pilung, “I ir e rib riyul’ nib profet.” Ma aram me yan fa dalip i pilung ngak Elisa. 13 Me ga’ar Elisa ngak fare pilung nu Israel, “Mangfan ni thingar gu ayuwegnem? Mman ngam fith laniyan’ fapi profet ni i fith e chitamam nge chitinam laniyan’rad.” Me fulweg ni ga’ar, “Dangay! Ye SOMOL e ke pining mad e dalip i pilung ney ni nge pi’mad ngalan pa’ yu Moab." 14 Me fulweg Elisa, ni ga’ar, “U daken SOMOL ni be par nib fos, ni gu ma pigpig ngak, e gube micheg riy ndab gu rin’ ban’en ni fan ngomed ni fa’an mang e dariyfan Jehoshafat ni Pilung nu Judah u wun’ug ni gimed nga bang. 15 Mu pi’ ba girdi’en e musik ngog e chiney.” Nap’an ni be chubeg fare girdi’en e music e harp rok, me yib gelngin SOMOL nga daken Elisa, 16 me ga’ar, “Ba’aray e n’en ni be yog SOMOL: ‘Mu fu’og wol’ e ran u lan e ra pa’ i lul’ ney nib mlik’. 17 Yug aray rogon ndab mu guyed e n’uw fa nifeng, ma bay i sug e ran u lan e ra pa’ i lul’ ney, me gur nge pi gamanman rom, nge pi gamanman nma fek e chugum e bayi yo’or e garbad romed.’" 18 Miki ul ul’ Elisa ngay me ga’ar, “Machane ran’ey e rib mom ngak SOMOL ni nge rin’; ma ku bayi ta’med ngam gelgad ngak e pi Moab. 19 Bay mu koled urngin e pi binaw rorad ni kani yororiy ni fan ko mael ni bfel’ ya’an; bay mu th’abed nga but’ urngin e pi gek’iy rorad ni bay wom’ngin, mi gimed taleg urngin e pi alublub rorad, mi gimed kirebnag gubin yang e yungi milay’ rorad nib yong’ol ko malang ni bay mu tharayed ngay." 20 Me yan i reb e rran ni kakadbul, nike taw nga nap’an ni yima pi’ e maligach ni kakadbul, me yib e ran u Edom nge tharey e but’. 21 Nap’an ni rung’ag piyu Moab nike yib fa dalip i pilung ni ngar maelgad ngorad, ma urngin e pumo’on nrayag ni ngar feked talin e cham, ni mus ko en nth’abi ilal me mada’ ko en nth’abi bitir, mi yigo’ ni piningrad ngranod ra pired ko mathil. 22 Ma nap’an nra odgad ni kakadbul u reb e rran, ma be gal ra’en e yal’ nga daken e ran, ke row ra’en ni bod e racha’. 23 Mar tolulgad, ni be lungurad, “A racha’! Fa dalip raba’ i salthaw ni yad e to’ogor e dabisiy ni kar chamgad kar li’ed yad karm’ad! Darod ngad feked u yargal e chugom ko pi tent rorad!" 24 Machane nap’an nra tawgad ko fa gin ni kar n’ufed e tent rorad riy, me cham e pi Israel ngorad ngar tulfedrad ngar sulod. Mar tulfedyad ngar li’ed fapi Moab ngarm’ad 25 mar gathayed fapi binaw rorad. Ma nap’an ni yad ra yan u to’oben bang e milay’ nib yong’ol, mra reb e pi Israel me yin’ reb e malang nga daken fare milay’ nge mada’ ko ngiyal’ ni urngin e yungi milay’ ma ke mathrow; mu ku arita’ fapi alublub ni kur ninged mar th’abed nga but’ e pi gek’iy ni bay wom’ngin. Me yan i tomur ma kemus ni fare binaw ni tafen e pilung nu Kir Heres e yan i magey, me yan fapi girdi’ ni ur paged e malang ra liyeged ngar maelgad ngay. 26 Nap’an ni nang fare pilung nu Moab nike waer ko fare mael, me fek 700 e girdi’en e saydon me guy rogon ni nge gelnag ir nge yan u fithik’ fapi to’ogor nge mil nge yan ngak fare pilung nu Syria, machane de yag rok. 27 Ma aram me fek e bin nth’abi nganni’ ko pumo’on ni fak, ni ir e ra yan nga luwan nge mang pilung, me pi’ u daken e yoror ko fare binaw nib maligach ngak fare got nu Moab. Mri rus fapi Israel ma aram mar chuwgad ko fare binaw ngar sulod ko nam rorad.