Yaburin Sora 44
PBT1 Koraa diine fala ɲaxumɛna, bɛti baane kuntigin xa. 2 Ala, nxu bata a mɛ nxu tunle ra. Nxu benbane bata yi a fala nxu xa nun, i fe gbeen naxanye liga e xa na waxatini, lɔxɔn naxanye bata xunkuya. 3 I tan nan siya dɛnkɛlɛyatarene kedi i sɛnbɛni, i mɔn yi nxu benbane radɔxɔ na. I siya gbɛtɛne raxuya ayi nɛn, i yi nxu benbane rasabati. 4 E mi na bɔxɔn sɔtɔxi e silanfanne xa ra! E mi a nɔxi e yɛtɛ fangan xan xɔn. E a nɔxi i yɛtɛ fangan nan xɔn ma, i fangana, e nun i lu fena e xɔn, bayo e rafan i ma. 5 N ma mangan nun n ma Ala nan i tan na. I tan nan nɔ sɔtɔn nagidima Yaxuba bɔnsɔnna xa. 6 Nxu nxu yaxune raxɛtɛma i tan nan baraka yi. Nxu e nɔ i xinli. 7 N yigin mi saxi n ma xanla xan yi. N ma silanfanna mi a ra naxan nɔɔn fima n ma. 8 Koni i tan nan nɔɔn fima nxu ma nxu yaxune ma. I tan nan ne rayarabima, naxanye nxu raɲaxuxi. 9 Nxu Ala nan matɔxɔma waxatin birin, nxu i tan nan xili tantunma habadan! Bɛti xuini te. 10 Koni iki, i bata i mɛ nxu ra, i yi nxu rayarabi. I mi fa minima nxɔ ganle fɔxɔ ra sɔnɔn. 11 I bata nxu ragi nxu yaxune yɛɛ ra, e yi nxu yii seene birin tongo. 12 I bata nxu rabeɲin alogo e xa nxu faxa alo yɛxɛɛne. I bata nxu raxuya ayi yamana gbɛtɛne ma. 13 I bata i gbee muxune mati sare xurin na alo dɛ mi seen naxan na. 14 I bata nxu rayarabi nxu dɔxɔ bodene yɛtagi, nxu rabilin muxune yi nxu makonbi, e nxu magele. 15 I bata nxu findi gelema seen na siyane yɛ. E e xunne yimaxama nxu mageledeni. 16 N fɛyani waxatin birin. N bata yagi 17 xɔnnantenne falane xɔn naxanye n bɛsɛnxɔnyama, e nun n yaxun naxanye e gbeen ɲɔxɔma n na. 18 Ito birin ligaxi nxu ra nɛn, hali nxu to mi ɲinanxi i xɔn ma, hanma nxu yi i ya layirin kala. 19 Nxu mi xɛtɛxi i fɔxɔ ra. Nxu munma yi fata i ya kiraan na. 20 Koni hali na, i nxu lu nɛn kankone bun. I nxu rabeɲin banban dimini. 21 Xa nxu yi ɲinan nxɔ Ala xinla ma nun, nxu yi ala gbɛtɛne batu, 22 i yatin yi na kolonma nɛn nun amasɔtɔ i nxu miriya wundone kolon. 23 Koni e nxu faxama i tan nan ma fe ra fɛriɲɛn gbɛn! E nxu ligama alo yɛxɛɛn naxan faxa daxi a ra! 24 Xulun Marigina! Nanfera i xima? Keli, i nama i mɛ nxu ra habadan! 25 Nanfera i i yɛtagin luxunma nxu ma? I nama ɲinan nxɔ tɔrɔne nun marayarabine xɔn! 26 Nxu niine bata bira gbangbanni, nxu gbindin mi fa nɔɛ kelɛ bɔxɔn ma. 27 Keli, i fa nxu mali! Nxu xunba i ya hinanna nin!