Yaburin Sora 33

1 Ɛ bɛtin ba sɛwani Alatala xa, ɛ tan naxanye tinxin! Muxu faɲine lan e xa a tantun. 2 Ɛ barikan bira Alatala xa bɔlɔnna ra, ɛ barikan bira a xa kondenna ra. 3 Ɛ bɛti nɛnɛn ba a xa. Ɛ maxa seene maxa ki faɲi, ɛ yi ɛ xuini te a ma. 4 Ɲɔndin nan Alatalaa falan na. A kɛwanle birin kamalima tinxinna nin. 5 Tinxinyaan nun sariya suxun nafan Alatala ma, dunuɲa birin wasaxi a hinanna ra. 6 Alatala kore xɔnna daxi a fala xuiin barakan nin, e nun yanban seene a dɛ xuiin na. 7 A fɔxɔ igene birin malanma yire kedenni, a fufane ramara. 8 Bɔxɔn birin xa gaxu Alatala yɛɛ ra! Dunuɲa muxune birin xa a binya! 9 A falan nan tixi, dunuɲa yi da. A yamarin fi, seen birin yi taran na. 10 Alatala siyane natane kalama nɛn. A mi tinɲɛ siyane yi e miriyane rawali. 11 Koni Alatalaa fe ragidixine luma nɛn habadan! A miriyane yi lu habadan! 12 Sɛwan na siyaan xa naxan ma Ala findixi Alatala ra. Sɛwan na muxune xa Alatala bata naxanye sugandi! 13 Alatala a yɛɛ ragodoma keli ariyanna yi, a muxune birin mato. 14 Keli a mangaya yireni, a dunuɲa muxune birin xun mato a ra. 15 A e sɔndɔmɛne rafixa, a a xaxili lu e kɛwanle birin xɔn. 16 Manga yo mi kisɛ a ganla sɛnbɛn ma. Sofa yo mi ratangɛ a fangan xɔn. 17 Xunba se mi soon na yɛngɛni, a fangan na gbo ki yo ki, a mi marakisin tiyɛ. 18 Koni Alatala yɛɛn tixi a yɛɛragaxu muxune ra, naxanye e xaxili tixi a hinanna ra. 19 A ne rakisima sayaan ma nɛn, a mɔn yi e niine rakisi fitina kamɛn ma. 20 En xaxili tixi Alatala nan na. A tan nan en mali muxun na e nun en yɛ masansan wure lefana. 21 En bɔɲɛne sɛwaxi a tan nan ma fe ra, bayo en bata en yigi sa a xili sariɲanxini. 22 Alatala, i ya hinanna xa lu nxu xɔn bayo nxu nxu yigi saxi i tan nin.