Sandane Sora 19

1 A fisa muxun yi findi yiigelitɔɔn na fɛtareyani, benun a xa findi wule fala xaxilitaren na. 2 Wɛkilɛn tɔnɔn mi na fe kolonna xanbi. Naxan na san mafura ayi, na sinma nɛn yinla ra. 3 Adamadina a sigati kiini dɔxɔma a xaxilitareyaan nan xɔn, a fa xɔlɔ Alatala ma. 4 Nafunla muxun xɔyine rawuyama ayi nɛn, koni yiigelitɔɔn xɔyina a makuyama a ra nɛn. 5 Wule serena fe saranma a ra nɛn. Naxan wulen falama, na mi xunbama. 6 Muxu wuyaxi kuntigin mafanma. Naxan muxune kima, na xɔyin nan birin na. 7 Xa yiigelitɔna ngaxakedenne birin a raɲaxuma, a xɔyine e makuyama a ra nɛn dangu ne ra! Hali a lu e fɔxɔ ra, a e mafan han, e mi fa toma. 8 Naxan na findi xaxilimaan na, na niin nafan a ma. Naxan na xaxinla fen, na bata hɛrin sɔtɔ. 9 Wule serena fe saranma a ra nɛn. Wule falan halagima nɛn. 10 A mi daxa xaxilitaren xa lu ɲaxunni, konyin fan mi lan a kuntigine yamari. 11 Xaxilimaan diɲa. Xunna kenla na a ra a xa, a na muxuna nde mafelu a hakɛn na. 12 Mangana xɔlɔn luxi nɛn alo yatan wurundun xuina, a hinanna fan luxi nɛn alo xiila sɛxɛn ma. 13 Gbalon nan dii xaxilitaren na a baba yii. Ɲaxanla a yɛngɛ xunxurine luxi nɛn alo igen na lu dindinɲɛ banxini. 14 Banxin nun hɛrisigɛn fataxi muxun fafe kɛɛn nan na, koni Alatala nan ɲaxalan xaxilimaan soma a yii. 15 Narin xixɔnla nan biran muxun na, koni kamɛn muxu narixin suxuma nɛn. 16 Naxan na sariyan suxu, na a niin nan nakantanma, koni naxan na sigan ti a ɲaxin na, na faxama nɛn. 17 Naxan na hinan sɛnbɛtaren na, na Alatala nan dolima, a saranna soma a yii nɛn. 18 I ya diin xuru, bayo i yigin na nan na. I nama tin a xa faxa. 19 Bɔɲɛ gbee kanna lan a yanginna fi. I na a xunba, i bata a rawɛkilɛ kalan ma. 20 I tuli mati kawandi xuine ra, i xurun sɔtɔ, alogo i xa findi fekolonna ra. 21 Miriya wuyaxi nan muxun bɔɲɛni, koni Alatala a fe ragidixin nan nakamalima. 22 Muxun waxi hinanna nan xɔn, anu, yiigelitɔɔn fisa wule falan xa. 23 Alatala yɛɛragaxun siimayaan nan fima. Na ma, muxun lugoxin yi a sa, a mi tɔrɔ. 24 Muxu narixina a yiin sinma donse goronna kui nɛn, koni a tagan a rasoɛ a dɛ. 25 I na magele tiin bɔnbɔ, fe kolontaren xaxili sɔtɔma nɛn. I na xaxilimaan maxadi, a kolonna sɔtɔma nɛn. 26 Naxan a baba rayarabima, a yi a nga kedi, na kanna fama yagin nun yarabin nan na. 27 N ma diina, i na tondi i xuru falane ramɛ, i yɛtɛ masigama kolonna falane nan na. 28 Wule seren gelema kiti kɛndɛn ma nɛn, tinxintareya falan nan muxu ɲaxin dɛ. 29 Yanginne saxi magele tiine nan xa, e nun bɔnbɔn xaxilitarene xa.