Yuba Sora 39

1 “I a kolon ba bolen diin xalima waxatin naxan yi? I xɛnle toma ba, e nɛma diin xalɛ? 2 I e kuiin maxali waxatin yatɛma ba? I e dii xali waxatin kolon ba, 3 e na e felen e dii xalin tɔrɔni, e yi e diin xali? 4 E diine sɛnbɛn sɔtɔma, e gbo xunnabani. Na xanbi ra, e keli e ngane fɛma, e mi fa fama sɔnɔn." 5 “Nde burunna sofanla xunnabaxi? Nde a fulunxi? 6 N bata tonbonna findi a dɔxɔden na, fɔxɔ bɔxɔn yi findi a konna ra. 7 A na sɔnxɔ sɔnxɔ xuiin mɛ taane yi, a gele, a mi soo ragiin xuiin mɛ mumɛ! 8 A sigama a dɛgɛdeni geyane nan fari, dɛnaxan xinde, a yi mɛn fen." 9 “Burunna ɲingen tinɲɛ findɛ i ya walikɛɛn na ba? A xiyɛ i ya xuruseene balon sa seen dɛxɔn ba? 10 I nɔɛ a xidɛ alogo a xa i ya xɛɛn bi ba? A xɛɛ rabɔnbɔ seen bandunɲɛ i fɔxɔ ra mɛrɛmɛrɛne yi ba? 11 I yigin sɛ a yi ba, bayo a sɛnbɛn gbo? I ya wali xɔdɛxɛne luyɛ a ma ba? 12 I yengi sɛ a ma ba? A fɛ i ya se xabaxine ra i xa, a fa e sa i ya lonna ma? 13 Dangaranfulene gabutɛne yitema sɛwani, koni e mi nɔɛ tuganɲɛ alo xɔliin bodene. 14 A xɛlɛne luma biraxi bɔxɔn nan ma, a yi e lu burunburun wolonni. 15 A mi mirixi a ma fa fala e nɔɛ yibɔɛ nɛn, a burunna subena nde tiyɛ e yi nɛn. 16 A ɲaxu a diine ra alo a tan xa mi e xalixi, a mi gaxuma fa fala a bata tɔrɔ fuuni e xalideni. 17 Ala bata a kuma fe kolonna ra, a mi xaxili fixi a ma. 18 Koni, a na keli a gideni, a gelema nɛn soon nun soo ragiin ma." 19 “I tan nan sɛnbɛn fima soon ma ba? I tan nan a kɔɛ ma xabene saxi ba? 20 I nɔɛ a ratuganɲɛ alo suɲɛna? A gbelegbele xuiin magaxun nan tima. 21 A bɔxɔni sɔxɔnma a torone ra lanbanni, a sɛwaxi a fangan na, a sigama ganla yɛɛ ra yɛngɛni. 22 Gaxun bɔtɛ mi a xa, a mi kuisanna kolon, a mi xɛtɛma a xanbi ra silanfanna yɛɛ ra. 23 Xalimakuli sa seen nun tanban gbeen nun a xurin naxan xidixi a fari, ne xuiin minima a nɛma a giyɛ. 24 A kunfaxin tuganma, a siga. Xɔtaan na fe, a mi fa nɔɛ tiyɛ yɛngɛni. 25 Xɔta xuiin na mini, a gbelegbele sɛwani, a yɛngɛn xirin mɛma hali a nɛma sa wulani, e nun kuntigine gbelegbele xuiin nun yɛngɛ so xuina." 26 “Sɛgɛn tuganma i ya xaxilimayaan nan xɔn ba, a yi a gabutɛne yibandun sogeteden yiifanna binni? 27 Singbinna tuganma i ya yamarin nan bun ba, a yi a tɛɛn sa geya matexine fari? 28 A yigiyaxi gɛmɛ yirene nin, a yire makantanxine nin geyane xuntagi. 29 A a donseen fenma mɛnna nin a nɛma dɔxi, a yi sa a to yire makuyeni. 30 Binbine dɛnaxan yi, a mɛnna nin, a diine baloma wunla nan na."