Yuba Sora 32
PBT1 Elifasi nun Bilidada nun Sofara yi ba falan tiyɛ Yuba xa, bayo a yi a yɛtɛ mirixi tinxinden nan na. 2 Nayi, Elihu yi xɔlɔ, Busi kaan Barakɛli a dii xɛmɛn naxan Rami xabilani. A xɔlɔ Yuba xili ma, amasɔtɔ a yi a falama nɛn a a tinxin Ala yɛtagi. 3 A mɔn yi xɔlɔ xɛmɛ saxanne ma, bayo e mi yabi faɲin sɔtɔxi Yuba ra, na feen yi lu alo Ala nan findixi fe kalan na. 4 Bayo e yi fori a xa, Elihu yi a sabari, a munma yi falan ti Yuba xa. 5 Koni Elihu to a to yabi mi yi fa xɛmɛ saxanna ne dɛ, a yi xɔlɔ. 6 Nayi, Elihu, Busi kaan Barakɛli a dii xɛmɛn yi falan ti, a naxa, “N tan nan mɔn foningeyani, fonna nan ɛ tan na, nanara n yi xuruxurunma, n gaxu n ma kolonna yitɛ ɛ ra. 7 N yi a mirixi nɛn, n naxa, ‘Fonne nan lanma e falan ti, fonne nan lan e fekolonna xaranna ti.’ 8 Koni ɲɔndin naxan na, naxan xaxinla fima muxun ma, niin nan na ra, naxan kelima Ala Sɛnbɛ Kanna niiraxinli. 9 Siimayaan xa mi tun fama fekolonna ra, kiti kɛndɛn kolonna mi fama foriyaan xan xɔn tun. 10 Nanara, n na a falama, n naxa, ‘Yuba, i tuli mati n fan na. N fan xa n ma kolonna yita i ra.’ “ 11 “Han iki, n bata ɛ falane ramɛ, n yi waxi ɛ fe kolon falane nan namɛ fe yi, han ɛ yi ɛ falane yɛba. 12 N na n tuli matixi nɛn ɛ ra ki faɲi, koni ɛ tan sese a fala mi Yuba kɛnɛnxi, ɛ tan sese mi a falane yabixi a faɲin na. 13 Ɛ nama a fala, ɛ naxa, ‘Nxu bata yabin sɔtɔ fekolonni fa fala Ala nan keden nɔɔn sɔtɛ Yuba ma, muxun mi a ra.’ 14 Yuba mi a falane tixi n tan xan xili ma, n mi a yabima alo ɛ tan." 15 “Yuba, i lanfane bata tunnaxɔlɔ e ma, e mi fa i yabima, fala mi fa e xɔn. 16 N mɔn xa lu sabarixi ba, hali e to mi fa fala tima, bayo e bata e dundu, e mi fa yabi tima? 17 N fan waxi n ma yabin ti feni. N fan waxi n ma kolonna yita feni, 18 bayo fala gbegbe n kui, n xaxinla n nadinma n xa falan ti, 19 na bata n bɔɲɛn nate, alo manpa nɛnɛn naxan wuyenna a sa seen balanxini bɔma. 20 N xa falan ti, nanara a godɛ, n xa n dɛni bi, n yi n ma yabin fi. 21 N mi muxu yo rafisama a bode xa. N mi muxu yo matɔxɔma. 22 A yɛtɛna, n mi fatan muxu matɔxɛ, xanamu, naxan n daxi na yi n faxama nɛn mafurɛn."