LOMA 3

1 Amana khi yawu ndandu ya kukala Muyuta, ho loni khi wawu mupfunu wa kukota mukhanda? 2 Ndandu ya lawu yenina mu mutindu wosu. Theti kwena Bayuta, kaÌhana Nzambi ndinga zandi. 3 Ni bweti dyenina, yuka ni ndambu ya batu bakonda lukwikilu, kukonda kwa lukwikilu kwa bawu kwalenda katula kwikama dya Nzambi? 4 Bwalendakanaku! Bulungi mu kuzaya ni Nzambi kyedika kisi zonza amana mutu wosu kenina kingumba, bwosu baÌsonikabwa: «Bulungi bakuzayilaka mutu wa masonga muna ndinga zaku, amana wakala yi kinunga ho bakufundisini.» 5 Kaasi yuka ni kukonda kwetu kwa masonga kwalubulaka masonga ma Nzambi, biki hika twazoÌnza? Ni Nzambi keku masonga kikuma kya buna katuzyatudini mu khabu zandi? -Mbati zonza mu nzonzidi ya kimutu-. 6 Bweku buna! Kondilo abweti Nzambi kafuÌndisilaya tsi? 7 Kaasi honi mu luvunu lwama, kyedika kya Nzambi kyavulaka, mu kusongila khembu yandi, kikuma kya biki bapfuÌndisila hika hanga musumuki? 8 Amana, kikuma kya biki twalendaku zonzila, bwosu bisi tuzodila kuzonza bingumba byahika: “Tusalenu mbi ndangu mamboti malenga kwisa”? Bulungi kwena batu babana ni babonga ndola! 9 Ni biki si? Betu tubahitini batu bahika? Loni, ka mu mambu moosu ku. Mukuma twaÌzonzilama kedi mambu mana ni boosu, Bayuta yi bana bakondi kala Bayuta benina mu luyalu lwa masumu. 10 Bwosu bwaÌsonama: «Kweku mutu wa masonga, keti mosi loni, 11 kweku ata mutu wa ngangu, kweku keti mosi wisi sanda Nzambi. 12 Boosu bayekukini mu nzila, kibuka kyosu kiditotisini, kweku keti mosi wisi hanga buweti, keti mosi loni. 13 Madinga ma bawu menina mazyamu ma muhululu, luluma lwa bawu lwa lengu ndinga, muna malebu ma bawu mwenina yi ndikila ya nyoka, 14 munwa mya bawu myabasa yi bisibu yi khadi. 15 Malu ma bawu misi tyakula mu kutekuna menga, 16 kuzanga yi kiwayi byenina muna nzila za bawu, 17 Nzila ya ngemba baÌzayayoku kwabawu. 18 Muna mesu ma bawu, mweku keti bweya bwa Nzambi.» 19 Kinga tuzayibwa ni moosu mana misi zonza mitsiku, myisima zimbula kwena batu bana benina mu sina dya mitsiku, ndangu munwa wosu wadibata yi tsi yosu yadibedisa ku mesu ma Nzambi. 20 Kikuma, kunima mihangu mya mitsiku, heku mutu banuÌngisa hanga mutu wa masonga ku thwala ya yandi, mukuma mitsiku myisi hana nzila ku nzayilu ya disumu. 21 Kaasi buthwena bwabu, masonga ma Nzambi mana baÌtila kimbangi mu mikanda mya mitsiku yi bambikudi mamoniki, konda kutala keti mitsiku: 22 Nzambi kisi bakitula batu, ba masonga, mu lukwikilu lwa bawu mwena Yesu Kidisitu. Kisibwa hanga kikuma kya boosu babana bisi kwikila mwena Kidisitu, mukuma heku diswaswanu ha kati dya bawu: 23 kikuma boosu baÌsumuka amana baÌbakanda khembu ya Nzambi. 24 Amana, mu khatu kwandi, baÌbanungisina muna khenda zandi, muna nzila ya luhulusu luna lwenina mwena Kidisitu Yesu. 25 Yandi wuna kaÌtambika Nzambi, muna nzila ya lufwa lwandi, hanga kimenga kya ndoluka ya masumu, kina baÌtambula muna lukwikilu, mu kusongila masonga mandi kikuma waÌyambula mu kuhana ndola mu masumu mana baÌhola tuka thama, 26 muna kulewula kwa mbundu yandi, Nzambi kaÌzola ni kasongila masonga mandi muna tangwa dyadi, ndangu kakala mukwa masonga mu kukitula mutu wa masonga wuna wisi kwikila mwena Yesu. 27 Khi kyawu kikuma kya lulendu lwetu? Heku kikuma! Kikuma kya khi mitsiku? Mina mitadidi mihangu? Loni, kaasi mu nzila ya mitsiku mya lukwikilu. 28 Mukuma tutambwasini ni mutu kisi kituka mutu wa masonga mu lukwikilu, heku ni mu mihangu mya mitsiku. 29 Ho loni, Nzambi wa Bayuta lwesi kenina? Keti keku hika Nzambi wa bana bakondi kala Bayuta? Kyedika, kenina phi Nzambi wa bana bakondi kala Bayuta, 30 yuka ni mukyedika Nzambi kenina mosi lwesi. Yandi wabaÌkitula batu ba masonga, muna lusadisu lwa lukwikilu, bana baÌkota mukhanda yi bangulungu, muna nzila ya lukwikilu. 31 Hanga, kikuma kya lukwikilu twakatudini mupfunu wa mitsiku? Kabwaku, kaasi tubatimya zyamisa.