LOMA 15

1 Ho ni twakala ngolu mu lukwikilu, tufweti sadisaka babana beku ngolu mu lukwikilu. Tusandakaku mambu mana misi tusephidisa. 2 Kosu mutu kahanga mana misi sephidisa mukwenu, kikuma kya mana menina mboti yi mana misi kodisa; 3 Kikuma, Kidisitu kakalaku hanga mana makala musephidisa; kaasi, bwosu bwaÌsonama: «Ngusi za babana bakala kutukwana zaÌbwila mwena meni .» 4 Mukuma mosu mana maÌsonama theti maÌsonama kikuma kya kutulonga, ndangu, muna kikwamina yi muna kikesa kya Masonuku, twakala yi kivuvu. 5 Yambula Nzambi mukwa kikwamina yi kikesa kalusadisa lwayukana benu yi benu bwosu menina mabanza ma Kidisitu Yesu, 6 ndangu, muna mbundu mosi yi ndinga yimosi, lwamikembisa Nzambi yi Tata wa Pfumu wetu Yesu Kidisitu! 7 Yi hakana ni, lwadiyambaka benu yi benu, bwosu buna kaÌluyamba yandi meni Kidisitu Yesu, kikuma kya khembu ya Nzambi. 8 Mukuma nzimbudini ni Kidisitu waÌkituka musadi wa Bayuta kikuma kya kyedika kwena Nzambi, mu kulungisa bilangi bina kaÌsila Nzambi kwena bakhaka betu. 9 Amana baba beku Bayuta bamukembisini Nzambi kikuma kya buweti bwandi, bwosu bwaÌsonama: «Yihana ni yikuÌzitisa mu kati dya makanda amana yiyiÌmbila kikuma kya luzitu lwa khumbu yaku.» 10 Wuzimbudi hika: «Benu lweku Bayuta, sangwalenu hakimosi yi batu bandi!» 11 Amana hika: «Muzatulenu Pfumu, benu boosu lweku Bayuta, batu ba tsi zoosu, bamuzatula!» 12 Yesaya wuzimbudi hika: «KamoÌnika, musodi wa Yese, wuna wateÌlema mu kutwadisa makanda; makanda masya kivuvu kwena yandi .» 13 Nzambi mukwa kivuvu kalubasisa yi kyesi kyosu yi ngemba yosu muna lukwikilu, ndangu lwabasa yi kivuvu mu ngolu za Kitembu Kyatoma! 14 Kikuma kya mana malutadidini benu, baphangi bama, meni yenina yi kikumbwala meni-meni ni benu lwaÌbasa yi mamboti, lwaÌbasa yi mazaya moosu amana balunga lwenina mu kudilwengisa benu yi benu. 15 Amana phi, matangwa mahika, yiÌlusonikina yi khwakasu yosu, kikuma kya kulubambukisa mambu mana maÌluta kedi, kikuma kya khenda zina kaÌpheka Nzambi 16 mu kukala mu kisalu kya Kidisitu Yesu kikuma kya babana beku Bayuta; yibati dihana mu kusala kisalu kyatoma kya Musamu wa Bukheti wa Nzambi, ndangu baba beku Bayuta bakala kabu dina baÌtambwasa, baÌtambika kwena Kitembu Kyatoma. 17 Yenina yi tsambu mu Kidisitu Yesu mu kikuma kya kisalu kyama kwena Nzambi. 18 Mukuma honi kima yizonzila, kaka kina kasadi Kidisitu mwena meni mu kutwadisa baba beku Bayuta ndangu kabanata mu kulemvuka. Nzambi kahangabwa mu ndinga yi mu mihangu, 19 mu ngolu za bidimbu yi biphadi, mu ngolu za Kitembu kya Nzambi. Yihana, tuka ku Yelusalemi yi muna kinzunga kya Yiludi, yiÌsamuna kosu homa Musamu wa Bukheti wa Kidisitu. 20 YiÌsya lukumu lwama kikuma kya kusamuna Musamu wa Bukheti mu bifulu bina khaniku kedi bayuka khumbu ya Kidisitu, ndangu tutungaku ha thandu ya mipfundila mya mutu wahika. 21 Kaasi yisadila bwosu bwaÌsonama: «Kwena batu babana khaniku kedi babasamwana kikuma kya yandi baÌmumona, amana kwena babana baÌmuyukaku kumuzonzila kikuma kya yandi bamuÌbakisa .» 22 Kyakina kyakala yi khakalakanu mbala za hika mu kwisa kwena benu. 23 Kaasi buthwena, mbanisikini kisalu kyama mu binzunga byabi, amana mvula lawu zilutini yiÌkala yi tsambu za lawu mu kwisa lutala, 24 Ha yikweÌnda ku tsi ya Siphani; yenina yi kivuvu ni yiluÌmona mu kuhita amana yibonga lusadisu lwenu mu kukwenda ku tsi ya Siphani kumanima ma kunanga mwa bilumbu yi benu. 25 Kaasi buthwena yendi ku Yelusalemi, mu kwenda sadisa batu ba kanda dya Nzambi. 26 Mukuma, bisi Masetwani yi bisi Lakhayi baÌzodiki ni babundikisa makabu kikuma kya kusadisa ba phutu babana benina mu kati dya bakwikidi ku Yelusalemi. 27 Bawu meni batambwasa mu kusalabwa, kaasi kikuma kya bawu dyenina hanga pfuka; mukuma bakwikidi ba Bayuta bakabisi kimvwama kyabawu kya kitembu kwa batu babana beku Bayuta; yihakana batu bana beku Bayuta bafweti basadisa Bayuta mu kubaheka bima bina bibakondi bawu . 28 Ha yimaÌnisakya kisalu kina, amana yibaÌheka makabu mana ma bakwikidi ba ku Yelusalemi, yihitila kwena benu mu kukwenda ku tsi ya Siphani. 29 Nzayi ni mu kukwisa lutala, yikwiÌsa wa kabasi yi lusakumunu lwa Kidisitu. 30 Amana yiluhekini kikesa, baphangi bama, muna Pfumu wetu Yesu Kidisitu yi muna zola dya Kitembu, mu kunwana hakimosi yi meni mu lombilu kwena Nzambi kikuma kya meni, 31 ndangu yihuluka kwena batu babana bakolama ba ku kinzunga kya Yuteya amana lusadisu mbati nata kikuma kya mamboti ma Yelusalemi bayambalwa mboti kwena bakwikidi. 32 Yihana ni yikwisa lutala yi kyesi, mu luzolu lwa Nzambi, amana yilembwa ndambu hakimosi yi benu. 33 Ni Nzambi mukwa ngemba kakala yi benu boosu! Abwabuna!