Bobotimatimale 7

1 Epedeme koko ita tame gudlati na꞉ banakaka so dapiyamte dapiyamte dleta ta꞉lamota tame gugudle dapiyamte dapiyamte dle dla tame ha꞉ha꞉la natiwa. Godta yia꞉ dla itiyamale hamiyo, yia꞉tapo ta꞉lamo mate kaula pato mate epo dalupa mateye mosisita bobtalimelepo depame. Amasiyama yia꞉tapo mosisita bibikilimalala depame ala me-himomeleme ha꞉ha꞉uwa. Epame na꞉ ma banakaka oplami haleta salita matlalo tiyama tle matla natiwa. Ya꞉ matamama pasakalo hallalo Godta ya꞉ watle hamili ukule mate hampuwa. Epame ya꞉tapo yu teta꞉le mate banakaka so dapiyamte dapiyamte dle dla epo atluwa, 3 “Wua꞉ ta꞉lamo mate kaula pato mate epo dalupa mate yipta bobtalimiya. Wua꞉ aseka me-ha꞉ha꞉lati di tatle God dla salladepo siyamalalo so opa hapuloma yia꞉ daptala dla ukule mate ulu hatitimtlowama. Dita yia꞉ dla ulu hatitimtepo gudlati wua꞉ alotle mosisita ta꞉lamo mate epo kaula pato mate epo dalupa mate bobtalimaiya,” duwa. 4 Epame na꞉ opa ulu halomale so sukulu daluwa. Eye 144,000 so opata ulu halomuwa. Opa iwoloye Isalael so elele 12 halomalepo. 5 Yuda elele dulu dla 12,000 opata ulu halomuwa. Epame Luben elele dulu dla 12,000 opata ulu halomuwa. Epame Gad elele dulu dla 12,000 opata ulu halomuwa. 6 Epame Asel elele dulu dla 12,000 opata ulu halomuwa. Epame Naptali elele dulu dla 12,000 opata ulu halomuwa. Epame Manase elele dulu dla 12,000 opata ulu halomuwa. 7 Epame Simiyon elele dulu dla 12,000 opata ulu halomuwa. Epame Libai elele dulu dla 12,000 opata ulu halomuwa. Epame Isakal elele dulu dla 12,000 opata ulu halomuwa. 8 Epame Sebulun elele dulu dla 12,000 opata ulu halomuwa. Epame Yosep elele dulu dla 12,000 opata ulu halomuwa. Epame Benyamin elele dulu dla 12,000 opata ulu halomuwa. 9 Koko ita tame gudlati na꞉ matle toko ipo natitepo opa alumale patota Godta pollalo mo mila꞉pi dla epo La꞉m mila꞉pi tle ha꞉ha꞉la natiwa. Yia꞉ye oplami haleta sesa꞉loweye po-ala꞉na. Yia꞉ mo meyelope meyelope dle tle epo elele meyelope meyelope dle tle epo yu meyelope meyelope dle tle puame ha꞉ha꞉uwa. Epame yia꞉ta tluka kamkamale didiyepo ha꞉ha꞉mama dota bikisi halopo ha꞉ha꞉uwa. 10 Epame yia꞉tapo yu teta꞉le mate epo atlamyeuwa, “Di Godye ya꞉ta pollalo mo dla mo-polapo. Epame dita pasakalo ha꞉ha꞉lowe kokoye ya꞉ mate epo La꞉m mateta di watle ma-hapiwapo,” demyeuwa. 11 Epame dokopala so mate epo pasakalo ha꞉ha꞉ alisisi mateta Godta pollalo mo mateka꞉pi dla ha꞉ha꞉lati banakaka so hapulomatapo alikili tle sillidepo ha꞉ha꞉mama God mila꞉pi tle heodepo ya꞉ dla siyele ta꞉demama epo atlamyeuwa, 12 “Ikadepe, siyele mate hela꞉dle mate malamale ka꞉dle mate itiyamale mate di God dla kokó hutiyelepe. Epedeme dita ya꞉ dla sisiyemama ya꞉ hi di dla ta꞉dlowe ka꞉dena. Eye ikadepepo,” demyeuwa. 13 Epalati dokopala oplami haleta na꞉ watle epo atluwa, “Tluka kamkamale didiyepo ha꞉ha꞉ iwoloye anawolota꞉? Epame yia꞉ye adi tle pumulo?” duwa. 14 Epalati na꞉ta asiyama ya꞉ watle epo atluwa, “Dokopala oplami, na꞉ pona꞉malamana. Wa꞉ tlo koko eye wa꞉malamana,” duwa. Epalati asiyama ya꞉ta na꞉ watle epo atluwa, “Iye ta꞉lamo pato dla wotiyalle pato pua dulu tle alikili dla wowoyamale opapo,” duwa. “Opa iwoloye La꞉m omali mate yia꞉ tluka howahalomalati ma kamkamuwapo. 15 Epapedeme yia꞉ta Godta pollalo mila꞉pi tle ha꞉ha꞉mama ya꞉ aiyalma aya dulu dla alila mate utula꞉la mate ya꞉ hi di dla ta꞉demha꞉ha꞉po. Epalati Godta meyelo yia꞉ye omhalemama yia꞉ gademhalapo. 16 Epedeme yia꞉tapo matle daya mate yú mate pota꞉ta꞉mha꞉ha꞉lowa. Epame sali alemalleta yia꞉ dla podomhallowa. 17 Adipalati, Godta pollalo mateka꞉pi dla hallalo La꞉mta meyelo yia꞉ye omhalemama yia꞉ye pasakalo yú kolomale dla elemta demhallepe. Epalati Godta yia꞉ inoma kaiyo hapulomaye hihiyotipo wellipe."