PSALMS 97

1 Yawe sor suen la bitaruwoso, buta se ali sor suen la amilmilaralko; lang korang se tual gotektek, amilmilaralko! 2 Taiti nuwi se sor tiromorom biya mu nu lautam ilak bagoso; nu kiwem ningo diram se tutera ningo mu noko barim, te ira sanamoso. 3 Tama nu koma ko giriso ale kager kari memek nu ilak barimawara mu suen la nunga kai saposo. 4 Nu pure nikim beteso se ali lilim la awote kaposo; se ali lilim arigiso ale uririkiso. 5 Yawe mu nu ali sor suen la ko Kari Biya, se duruk bibiya mu nu koma te parasa kapasan. 6 Taiti gomang mu noko munan ningo diram mu ko balu pagaruwoso, se kariimet sor suen la te mu noko nikinang biya mu arigisan. 7 Kariimet awiriya kaem kawel nunup patawuwasan mu dolomonko; nuna kuar anapeya te nunumi patawuwasan mu dolomonko; mu awuk, kaem kawel suen la mu Kari Biya koma te nubugura kulukurmonko. 8 Zion ko kariimet mu owore iki gilingiman ale amilmilasan, se Judah ko wonong suen la mu agotala ko amilmilasan, mu awuk, nuna nika tutera ko munan ninguru ko kuesan. 9 O Yawe, ni Kaem Kalel Biya, ni ali lilim pulawurem; ni kaem kawel suen la nunga kiarem ale kalel biya bagasam. 10 Awiriya Yawe ko kueso mu kiwem memek suen la buring tuokko; mu awuk, nu kariimet munan diram la karo tusan mu nunga bitarso, ale kariimet memek nuguting te nunga bataguru taso. 11 Kariimet ningo diram la bagasan mu nikinang te bagasan; uwutatala kariimet nongomang motam ningo diram mu amilmilasan. 12 Nina kariimet ningo diram la bagasan mu, Yawe ko amilmilaral, ale ko nup laili mu patawuralko.