Taalifi cant 57

1 Mu jëm ci njiital woykat yi, dëppook galan bi ñuy woowe Bul yàq, diy ñaan, ñeel Daawuda, gannaaw ba mu dawee Buur Sawul, ba dugg ca xunt ma . 2 Éy Yàlla, baaxe ma, ngalla baaxe ma, fi yaw laay làqu, yiiroo sa kiiraay, ba musiba yi jàll. 3 Ma woo Yàlla, Aji Kawe ji, Yàlla, mi may matalal. 4 Mooy yónnee fa asamaan, musal ma, dumaal ma ku may noot. Selaw. Yàllaay yónnee jëfi ngoram ak wormaam. 5 Maa ngi tëdd ci biiri noon yu mel niy gaynde, di yàpp doom aadama. Seeni sell niy xeej aki fitt, seen làmmiñ di saamar yu ñaw. 6 Éy Yàlla, yaa màgg, ba sut asamaan, sag leer tiim suuf sépp. 7 Noon yi di ma fiir, sama xol jeex. Ñu gasal mam pax, far tàbbi ca. Selaw. 8 Yàlla, dogu naa, dogu naa woy, di la kañ. 9 Na sama jëmm jépp yewwu, xalam ak moroom ma yewwu; ma yee leeru njël. 10 Boroom bi, naa lay gërëm ci biir xeet yi, kañ la ci biir waaso yi. 11 Sa ngor a màgg, ba àkki asamaan, sa worma àkki fa kaw-a-kaw. 12 Éy Yàlla, yaa màgg, ba sut asamaan, sag leer tiim suuf sépp.