Taalifi cant 24

1 Ñeel Daawuda, dib taalifu cant. Aji Sax jee moom suuf ak li ko fees, ak àddina ak li ci biiram. 2 Moo samp suuf biir géej, dëj ko ci kaw wal mi. 3 Ana kuy yéegi tundu Aji Sax ji, kuy taxawi bérebam bu sell ba? 4 Xanaa ku mucc ayib te xolam laab, xemmemul caaxaani neen, du giñey fen. 5 Kookooy jagoo barkeb Aji Sax ji, ak àtteb dëggu Yàlla mi koy musal. 6 Ñooñooy waa làng gi lay wut, di maasug Yanqóoba giy sàkku sa yiw. Selaw. 7 Neleen bunt yi kulbét, ubbileen bunti cosaan yi, Buur, Boroom ndam duggsi. 8 Buur, Boroom ndam booboo di kan? Xanaa Aji Sax ji Boroom dooleek njàmbaar, Aji Sax ji jàmbaaru xare ji. 9 Neleen bunt yi kulbét, ubbileen bunti cosaan yi, Buur, Boroom ndam duggsi. 10 Buur, Boroom ndam booboo di kan? Xanaa Aji Sax ju gàngoor yi. Kookooy Buur, Boroom ndam. Selaw.