1 Timotiyu 4

1 Sambi, Roho wa Mwenyezimungu atambira bila kutifisa kuwa ewu wakati wa mwinshoâwu, wálawirira wamojawapo wakwasa kwamini. Ewo wafulata roho sazina ukweli na inlimu yakushongezeriwa na mashetwani. 2 Watenda javyo julu ya unafiki wa wanu walongo, myoyo yawo saiwasusuka yociwe na cuma ca moto. 3 Ewo wáwakataza wanu kulomba na wasirye vyakurya vimojawapo, ingawa Mwenyezimungu ndi ombire vyakurya-vyo. Iye vimwajibu kuwa wenye kwamini, wejiwifu wa ukweli, warye kwa shukurani. 4 Kweli, kila kiyumbe ca Mwenyezimungu halali, acipo kinu cijuzi kukatariwa, ila cipokereriwa na shukurani, 5 konta cihalalishiwa julu ya usemi wa Mwenyezimungu pamoja na duwa. 6 Vyanukwambiraâvi ukiwambira wenziwo wenye kwamini, ukuwa maudumu wa Almasihi Insa mwema, urisiwa julu ya usemi wa kwamini na inlimu ngema yauri kufulata uweâyo. 7 Fala ezo hadisi za kunyata na sazina faidaâzo, ukatare. Urizowereze mwanyewe kutenda ibada. 8 Ingawa kurolola kwanawo faida aba, fala kutenda ibada kwanawo faida pakulu konta kutipa tamaa ya mainsha a sambiâpa na mainsha a mbere. 9 Ewu usoweziâwu kamilifu na újuzi ukubaliwe nfululu. 10 Ndi ntamana tikola kazi pakulu na titenda juhudi, konta tamaa yetu iwa ka Nlungu hai. Iye ndi Nvushi wa wanu piya, pakulu-pakulu wenye kuntumaini iye. 11 Evi vinuâvi vyanukwambireâvi, amuru, na ufunde. 12 Usimwase awaonse kufezeyi unemba wako. Ila ka wenye kwamini, uwé nfano mwema, kati ya namuna yako yakusowera, yakuinshi, yakupenda, yakuntumaini Mwenyezimungu, na ya uswafi wako. 13 Mpaka omi nije, vinuâvi shugulikira: kufyoma baina Mandiko, kuwarimbisa myoyo wenye kwamini, na kuwafunda. 14 Usase uwezo maalumu wawisusiriwe. Kumbukira kuwa uwezoâwu kupewa julu ya kubushuriwa pawakuturire makono wakulungwa wa jamati. 15 Vyanukwandikireâvi tunza sana-sana, vinuâvi ufulate. Kwa javyo, kukula kwako kolotiwa baina ka wanu piya. 16 Risunge sana mwanyewe na usunge vyauri kufunda. Zidi kushugulikira novyo. Ukitenda javyo, urivusha uwe pamoja na wanu wari kukusikiraâwo.