1 Yahaya 4

1 Wapendani wangu, musiwakubali piya wamba wáfunda kwa Roho wa Mwenyezimungu, fala kwanza watunzeni nowo wanuâwo, mwijiwe kuwa wa Mwenyezimungu au siwo. Konta mulumwenguâmu wankulawirira minabii wengi walongo. 2 Umwe mumwijiwa Roho wa Mwenyezimungu kwa namunaâyi: piya roho zakwakikisha kuwa Insa Almasihi kaja kibinadamu, wanuâwo wa Mwenyezimungu. 3 Fala piya roho za wanu zinkána Insa, wanuâwo siwo wa Mwenyezimungu. Roho zawo za uaduwi ka Almasihi. Kamba vyamusikire kuwa roho ya aduwiâyo ikúja kulawirira, nepa iwapo futi mulumwengu nomu. 4 Wasimana wangu, umwe muwa wa Mwenyezimungu, mwisa kuwashinda maaduwiâwo. Konta arípo nkati yenu ndi ari na uwezo pakulu koliko ire arípo mulumwenguâmu. 5 Ewo wanu wa mulumwenguâmu, ndimana wásowera mambo a mulumwengu, na wanu mulumwenguâmu wásikiriza. 6 Ofwe tiwa wanu wa Mwenyezimungu. Amwijíwa Mwenyezimungu onse atisikiriza, fala saari upande wa Mwenyezimungu aatisikiriza. Javyo ndi patijiwa roho ya ukweli na ya ulongo. 7 Wapendani wangu, tipendane, konta kupendana kulawa ka Mwenyezimungu. Apénda ndi mwana wa Mwenyezimungu na ndi amwijiwa Mwenyezimungu. 8 Saapenda aamwijiwa Mwenyezimungu konta Mwenyezimungu ndi pendo. 9 Javi Mwenyezimungu ndi vyolote pendo rake kwetu ofwe: Mwenyezimungu kampereka mulumwengu Mwanawe mmoja tu basi ipate tiinshi julu yake iye. 10 Pendo riwoneka javi: siyo kwa kuwa ofwe timpenda Mwenyezimungu, fala kwa kuwa iye ndi atipendire ofwe, kâmpereka Mwanawe awe kafara yakutipatanisa naye kwa madambi etu. 11 Wapendani wangu, kamba Mwenyezimungu vyaatipenda, nofwe novyo tíjuzi tipendane. 12 Manziro, aapo ammónire Mwenyezimungu. Tikipendana, Mwenyezimungu alungana nofwe, na pendo rake ritimiziwa kati yetu. 13 Tukwijiwa kuwa tikilungana naye na iye alungana nofwe javi: kwa kuwa katipa ofwe Roho wake. 14 Nofwe timmona na timwakikisha kuwa Baba kâmpereka Mwanawe awe Nvushi wa mulumwenguâmu. 15 Mwenyé kwakikisha kuwa Insa Mwana wa Mwenyezimungu, Mwenyezimungu kawa nkati yake, na iye kawa nkati ya Mwenyezimungu. 16 Tukwijiwa na titumaini pendo raatipenda Mwenyezimungu. Mwenyezimungu ndi pendo. Munu asaka kuwa onse ari nkati ya pendo kawa nkati ya Mwenyezimungu, na Mwenyezimungu kawa nkati yake. 17 Kwa javyo, pendo ritimiziwa kati yetu, ipate tiwe nawo uhakika suku ya Kiyama. Ndi javyo konta kamba vyaari Almasihi, nofwe tiwa novyo mulumwenguâmu. 18 Aupo wofi nkati ya pendo, fala pendo kamilifu rikwefya wofi kunundu. Konta wofi úlungana na hukumu, na mofi onse, pendo rake arinamba kukamilika. 19 Ofwe típenda konta Mwenyezimungu ndi ntanzi kutipenda. 20 Ikiwa munu kaamba: “Nímpenda Mwenyezimungu”, fala amwina nduye, eyo munuâyo nlongo. Avi iye nduye waari kummona aampenda, futi Mwenyezimungu saammona? 21 Na tanawo eyi ámuriâyi yaatipa ofwe javi: ampénda Mwenyezimungu, ajuzi ampende nduye novyo.