WAHIYUU 7

1 Sapadhana incia sumai kukamatamo uka pata mia o malaaʼekati akabhale-bhale i pata angua singkuna dunia. Manga incia ataangi pata angua matana ngalu i dunia mamudhaakana inda akongalu, siitumo i ati atawa i tawo atawa uka i manga puuna kau. 2 Kasiimpo kukamata malaaʼekati mosagaanana apene minaaka i timbu. Incia akeni segele minaaka i Aulataʼala o Kawasana Opu modhadhi. Malaaʼekati sumai agora tee suara makaa i pata miaia malaaʼekati mopadhana motodhawuna kuasa to adhaki-dhakiaka ati tee tawo, 3 pogauna, “Bholi udhaki-dhaki ati, tawo, atawa manga puuna kau ande ingkami indapo tadhawu tanda segele i bhawona rouna manga bhatuana Aulataʼalata." 4 Kasiimpo kurangoa uka ande o kabharina mia motosegelena dhaangia 144.000 mia, bhari-bharia aminaaka i sapulu rua sukuna miana Israel, 5 Saasaangu sukuna miana Israel dhaangia 12.000 mia o kabharina motosegelena, Siimo manga suku incia sumai: suku Yuda, suku Ruben, suku Gad, 6 minaaka i suku Asyer, suku Naftali, suku Manasye, 7 minaaka i suku Simeon, suku Lewi, suku Isakhar, 8 minaaka i suku Zebulon, suku Yusuf, tee suku Binyamin. 9 Sapadhana incia sumai kukamatamo abhari mpuu o mia moporomusakana, kabharina manga incia inda dhaangia o mia momembalina molentua, manga incia minaaka i sagala pogau, kaomu, suku tee lipu. Manga incia akabhale-bhale i aroana kauncuramakana Aulataʼala tee i aroana Anana Dumba sumai apake juba maputi tee limana manga incia akeni tawana palem. 10 Kasiimpo manga incia agora tee suara makaa, “Kasalaamati dhaangia i Aulataʼalamami mouncurana i bhawona kauncuramaka tee i Anana Dumba." 11 Bhari-bharia malaaʼekati akabhale-bhale abulilingi kauncuramaka sumai apobhawa-bhawa tee manga mancuana tee pata mbaaia mahaluku sumai. Kasiimpo manga malaaʼekati asuju i aroana kauncuramaka sumai tee asomba Aulataʼala. 12 Tee manga incia apogau, “Aamin! Bhari-bharia kapujia tee kamuliangi, tee kaʼaarifu tee kasukuru tee kahoromati, tee kuasa tee kakaa to Aulataʼala saʼumurua! Aamin!" 13 Kasiimpo sala samia minaaka i manga mancuana sumai aabha tee iaku, “Incema manga mia mopakena manga juba maputi sii tee aminaaka i iapai manga incia?" 14 Iaku kulawania, “Ingkoomo momataua, opuku.” Kasiimpo mancuana sumai apogau, “Siimo manga mia molimbana minaaka i kanarakaa maoge. Manga incia padhamo atapasi jubana tee apekaputia i nuncana raana Anana Dumba. 15 Rampaakanamo sumai, manga incia adhaangia i aroana kauncuramakana Aulataʼala, tee alaiania eo tee malo i nuncana Baitulla. Incia mouncurana i bhawona kauncuramaka sumai bheamboore i tanga-tangana manga incia to ajagani manga incia. 16 Manga incia inda bheamaara atawa amatuu bhorokona uka. Kapanena eo atawa o giu momasodhona mpuu uka inda bheapekangau manga incia, 17 Roonamo Anana Dumba mokabhale-bhalena i saripina kauncuramaka sumai bhemomembalina gembalana manga incia; Incia bhemotondana manga incia i matana uwe modhawuakana dhadhi. Tee o Aulataʼala bheagigisi bhari-bharia lolu minaaka i matana manga incia."