ZABURU 85

1 To kapalana molaguna. Zaburuna miana Korah. 2 E KAWASANA OPU, Ingkoo padhamo upewau malape to lipumu minaaka i piamo itu, Ingkoo padhamo upekalapea pendua o kadhaangiana miana Israel. 3 Ingkoo padhamo uʼamponia o dosana uumatimu, tee ututubhia bhari-bharia dosana manga incia. Sela 4 Bhari-bharia iʼamaraakamu padhamo upauntoa, tee upanaindamea o pamurumu mokarore-rorena sumai. 5 Sii-sii pambulimea pendua o kadhaangiamami mboomo i piamo itu, e Aulataʼala, manga mopasalaamatina, tee upekaridhomea o pamurumu to ingkami. 6 Buaka saʼumurua Ingkoo bheupamuru tee ingkami? Buaka saʼumurua bheutorotorosu uʼamara tee ingkami tee siwulumami? 7 Buaka Ingkoo umendeu manga padhadhi pendua mamudhaakana o uumatimu akaunde-unde rampaakanamo Ingkoo? 8 E KAWASANA OPU, susuakamea o kaasimu molagina to ingkami, tee mangadhawuakamo kasalaamatimu. 9 Iaku gauku kuperangoi opea bheifirimaniakana KAWASANA OPU, siitumo o Aulataʼala, roonamo Incia bheafirimaniaka kasanaa to uumatina tee manga mia mosaalihi. Maka manga incia bholi apendua akabhongo-bhongo. 10 Satotuuna o kasalaamati minaaka i Kawasana Opu amakasu tee manga mia momaekana tee Incia mamudhaakana o kamuliangina amembali amboore i liputa. 11 Kaasi molagina tee pojanjia inda momabhotu bheapokawa, kabanara tee kasanaa bheaposakulaka. 12 Kataʼatina maanusia i Kawasana Opu bheatuwu minaaka i tana, tee o kabanara bheapotonto minaaka i sorogaa. 13 KAWASANA OPU uka bhearahumatiaka kalapena, tee o liputa bheakohasiliaka timpua motaralabhi-labhi. 14 Kabanara bheaporikanaaka dhalana Aulataʼala, tee apasiapuakea dhala to Incia.