ZABURU 61

1 To kapalana molaguna. Tee kagasiana kecapi. Zaburuna Daud. 2 E Aulataʼala rangoa igoraakaku, perangoia o doʼaku. 3 Minaaka i tapana alamu kugoraakako wakutuuna amate akalaku. Bhawaaku i gunu bhatu molabhina kalangana minaaka i karoku 4 roonamo Ingkoomo peulusaku, munara momakaa to kupeuluaka minaaka i musuku. 5 Taroakamo saʼumurua dhadhiku kumboore i nuncana Kema Momangkilomu, mamudhaakana kuʼamani i nuncana peulusana panimu. Sela 6 Sababuna Ingkoo padhamo urango tolauna oniku, e Aulataʼala, tee padhamo udhawuaku tinauraka idhawuakamu to mia momaekako. 7 Maasangia upekarambe umuruna raja, mamudhaakana incia adhadhi saʼumurua. 8 Maasangia incia amembali raja saʼumurua i aroana Aulataʼala, parintaakamea o kaasimu molagina tee janjimu inda momabhotu to mojagania. 9 Sumaimo iaku sadia bhekulaguaka lagu kapujia to saromu, tee kupomea tolauna oniku saesaeo.