ZABURU 52

1 To kapalana molaguna. Lagu kaadharina Daud, 2 wakutuuna Doʼeg, miana Edom sumai, aumba apokawa tee Saul tee apaumbaaka ande o Daud akawamo i bhanuana Abimelekh. 3 E mia mobarani, pokia ingkoo usomboaka kadhakimiu? Kaasina Kawasana Opu sadhaadhaana to saʼumurua! 4 Saeo ingkoo uhaejati to upanarakaa mia sagaanana. Pogaumu amatadha mboomo piso motowinto, e mia pande pekagau! 5 Ingkoo ulabhi upeelu momadhakina tee inda upeelu momalapena, labhi upeelu kagau-gau minaaka i upogauaka kabanara. Sela 6 Ingkoo usanaa upekapii incana mia tee manga pogaumu, e pande pekagau! 7 Maka o Aulataʼala bheapahancuruko to saʼumurua. Incia bheasoroko tee apalimbako minaaka i mbooresamu, tee adhikako i nuncana duniana mia mate. Sela 8 Akamata incia sumai, mia mobanara bheamaeka tee amente, kasiimpo apotawaikiko, 9 Manga incia apogau, “Siitumo mia moindana moemanina peulusa i Kawasana Opu, tabeana soo atangkaaka karangkaeana motaralabhi-labhi, tee apahancuru mia mosagaanana to apekatangka karona." 10 Maka, iaku sii mboomo puuna zaitun mosuburu i nuncana bhanuana Aulataʼala. Iaku kuparacaea tee kaasina molagina Aulataʼala to saʼumurua. 11 Iaku sadiamo kusukuru i Ingkoo saʼumurua rampaakanamo opea ipewaumu. Iaku bhekuharapu i saromu i aroana manga mia mosaalihi sababuna saromu amalape.